¹ Pɔlu lɔ kpan ŋukɔn ɛhwɛɖɔtɔ lɛye, bo lɔ na ye tun: «Nɔvyee, ayixa tɛye hɔn nɔ do ɛhwɛ na do zɔnlin kena ko zɔn nɔ kpo Mawu gbɔɔn do va jɛ egbe ke.» ² Avɔsantɔ Ananyasi bo ɖe gbe na mɛ ke le adamɛ na Pɔlu ye tun ye ni mɔɔ gba onu ni-i. ³ I wɛ Pɔlu lɔ ni-i lɔ byo:«Mawu wɛ na va xo lɔ, ado ke ye si awɔn wewe na. O xinnɛnyi na do ɖɔ ɛhwɛ na ɖi kena osɛn lɔ ɖo ha vɔ osɛn lɔ wɛ itete bo gba nɔ bo tun ye ni mɔ xo blɔɔ?» ⁴ Ɛmɛ ke le Pɔlu we axaye lɔ n i-i tun: «Ɖemɔha wɛ ozun avɔsantɔ we oga lɔ ɖo nɔ?» ⁵ Pɔlu bo ɖ'ewu na ye lɔ byo:«Nɔvye, ko hɔn nyɔ-ɛ tun avɔsantɔye we oga mɔ-ɛ. Ɖo e nyi wiwlan tun:"Hɔn ɖo na lɔ oxo nyinyla do otoga tɔwe wu."» ⁶ Ke Pɔlu va nyɔ-ɛ tun Sadusitɔye kpo Falizitɔye susu mɛ mɔ le ahwan lɔ mɛ, e va lɔ oxo kpo axwa kpo na togun lɔ bo tun: «Nɔvyee, Falizitɔ wɛ ko nyi bo nyi didaye can bo nyi Falizitɔ. Ɖo ko tre kpɔn fifɔn sɔn oku ɛmɛ kukuyetɔn nɔ kpo kandeji kpo i wɛ dɔn na ye do ɖɔ ɛhwɛ na nɔ.» ⁷ Ke Pɔlu lɔ emɔha kpoŋu, Falizitɔye kpodo Sadusitɔye bo xwi onu dindɔn gbɔɔn togun lɔ bo ma. ⁸ Ɖo Sadusitɔye nɔ lɔ byo finfɔn sɔn oku mɔ hɔn le, gbɔɔn ɛwɛndotɔ Mawutɔn ɖe alo Gbigbɔ ɖe mɔ do le can. Vɔ Falizitɔye bo nɔ lɔ tun onu xin lɛye bisese mɔ le. ⁹ Axwa lɔ gbɛ syɛnxu d'eji nɔ, i wɛ osɛnkplan-ɛmɛtɔ ɖeye ke le Falizitɔye we gbeta mɛ ye, cite bo dɔn nu nɔ kpo akpasinsyɔn kpo lɔ byo:«Mí hɔn kpɔn ɛhwɛ ti bo na do na dahwe ke. Mí nyɔ na tun Mawu we ɛwɛndotɔ ɖe alo gbigbɔ ɖe o lɔ oxo ɖe ni wɛɛ? » ¹⁰ Onudindɔn lɔ mɔ syɛnxu nɔ gbɔɔn ahwanga lɔ bo va vɔ nɔ tun ye mɔ na vunvun Pɔlu, e bo va ɖegbe na sɔja ye byo ye mɔɔ ɖyɛ togun lɔ mɛ mɔɔ yi Pɔlu le ye si a mɔ kplɔ-ɛ do yi ahwankpa lɔ mɛ. ¹¹ Le ozan ke xodoe, Xwetɔ lɔ va ekɔn bo lɔ ni-i tun:«Ka vɔ, ɖo ɖi kena o ɖekunnu na le Jeluzalɛmu ɖo, ɖemɔha ke wɛ o mɔ ɖo na ɖe kunnu na ɖo le Hlɔmu.» ¹² Ke ŋukɔn ɖe, Jwifutɔ ɖeye va bla gbe bo ta Mawu tun e nyi tun hiye mɔ hɔn hu Pɔlu, mí hɔn ɖu nu nɔ gbɔɔn a do nu onu ɖe nɔ. ¹³ Ye mɛ ke bla osɛn xin lɛye, ye hugan wu gbɛtɔ kanɖe (40). ¹⁴ Ye bo ve kpɔn avɔsantɔye we ga lɔ kpo agunmɛhyɔnye bo lɔ na ye tun: «Mí va sɔ míaɖe sɔ do nudo ɖaxo ɖe gɔ, bo do lɔ tun na mí hɔn hu Pɔlu hun mí mɔ hɔn ɖu onu ti nɔ. ¹⁵ Syɛ, miye kpodo ɛhwɛɔtɔ ɖaxoye kpo na ɖo ogbekpɔ a bo lɔ na ahwanga lɔ lɔ byo ni mɔɔ kplɔ Pɔlu va na mí. Mi mɔ lɔ byo hiye mɔ ba gbɛje oxo etɔn lɔ kpɔn nɔ ceɖeceɖe. E xin, keŋu gbɔxwe na, e na gbo va bwɛ nɔ xin, míye mɔ le gbesisɔ mɛ a bo do hu-i.» ¹⁶ Vɔ ke Pɔlu nɔvyɔ nyɔnusi we vi ŋusunglo ɖokpo se tun, ye mɔ bla gbe ni-i, e yi, ahwankpa lɔ mɛ bo ve xo kpa na Pɔlu. ¹⁷ Pɔlu yɔ s̵ja kanwekoga lɛy ɖokpo bo lɔ ni-i lɔ byo:«Kplɔ hwanjɛvi ke do yi ahwanga lɔ kɔn, ɖo e ɖo oxo ɖe bo va lɔ ni-i nɔ.» ¹⁸ I wɛ sɔjakanwekoga lɔ va kplɔ hwanjɛvi lɔ bo do yi ahwanga lɔ kɔn bo l ni-i byo:«Ogantɔ Pɔlu wɛ yɔ-ɔ bo lɔ na lɔ byo bo mɔɔ kplɔ hwanj€vi ke do va kɔnwe, ɖo i mɔ ɖo oxo ɖe mɔ va lɔ na we nɔ.» ¹⁹ Ahwanga lɔ bo hɛn alɔ na hwanjɛvi, lɔ bo kplɔ-ɛ jɛ zɔga, bo kan se wu-i lɔ byo: «Oxo nɛ lɛ o ɖo, bo va lɔ na nɔ?» ²⁰ E bo ɖo ewu ni-i lɔ byo: « Jwifuye ɖo ogbekpɔ ba ba byɔ we nɔ tun i mɔ hɛn Pɔlu do va ɛhwɛɖɔtɔ ɖaxoye we ŋukɔn le swɛ, ɖi byo ye mɔ va gbeje oxo etɔn kpɔn nɔ ceɖe-ceɖe ha. ²¹ Vɔ, ko kan do oxo yetɔn ji, ɖo gbɛtɔ na yi kanɖe ha le ye mɛ o ɖo omɔ ni-i. Ye bo va do onu wu yeɖe tun e nyi tun hiye mɔ hɔn hu Pɔlu, hiye mɔ hɔn ɖu onu ti nɔ gbɔɔn a mɔ do nu onu ɖe can. Syɛ, ye le gbesisɔ bo trɛ kpɔ ogbe yiyi tɔwe kɛɖɛ nɔ.» ²² Ahwanga lɔ bo va jo hwanjɛnvi lɔ do bo lɔ ni-i tun:«Ka lɔ oxo xin lɛye na mɛ ti», e xin we godo, e bo jo-e do tun ni mɔɔ va sɔn. ²³ E xin we godo, ahwanga lɔ yɔ sɔjakanwekoga lɔ bo lɔ na ye lɔ byo:«Mi kple sɔja sandi owe (200), sɔja osɔjinɔtɔ kanɖegban (70), kpodo sɔja kanhwandatɔ sandi owe (200), ye mɔ le ogbesisɔ a do yi Sezale, le zangan acɛnnɛ mɛ. ²⁴ Mi jla osɔye ɖo na Pɔlu can na mia do kplɔ-ɛ yi otoga Felisi kɔn, e xin onu ti ko do wɛ-ɛ le omɔ lɔ ji nɔ.» ²⁵ E bo va wlan wema bo lɔ byo: ²⁶ «Blɔ Klodu Lisyasi, ko do ogbe ɖodan otoga Felisi nɔ! ²⁷ Jwifuye wle dahwe kena ko sɔ ɖodan we nɔ ke, bo ba hu-i nɔ, kena ko se tun Hlɔma we otovi mɛ e mɔ nyi, ko kplɔ sɔja tɛyee mí bo ve yi-i le ye si. ²⁸ Ke ko ba na nyɔ onu ke we ɛhwɛ ye do ni-i nɔ, ko kplɔ-ɛ do yi ɛhwɛɖɔtɔ ɖaxo yetɔnye kɔn. ²⁹ Ko bo va kpɔn onu jɛ ewu tun lɔ byo osɛn yetɔnye we xo ɖeye mɛ mɔ wanu na ye mɔ do do ɛhwɛ ni-i nɔ, vɔ, e ko hu ɛhwɛ ɖe ke jɛ na oku alo gankpamɛ ninɔ. ³⁰ E xin we godo ye va xo kpa na byo Jwifuye mɔ bla ogbe do ewu. I wɛ ko do sɔ gbeta trololo tun ko mɔ na mɔ sɔ-ɛ ɖodan we, ko bo lɔ na ɛmɛ ke do ɛhwɛ wu-i nɔ lɛye lɔ byo, ye mɔɔ ve yi yɔ ɛhwɛ wu-i do kɔn we. E yi zanɖe!» ³¹ Sɔja lɛye bo wasi onu kena e dɔn ye lɛye, ye bo kplɔ Pɔlu do siin Antipatrisi we toxo mɛ le zanmɛ. ³² Le ŋukɔnɖegbe etɔn, sɔja osɔjinɔtɔ lɛye zɔn omɔ kpo Pɔlu, sɔja gbokpweye bo trɔ va sin ahwankpa lɔ mɛ. ³³ Kena osɔjinɔtɔ lɛye jɛ Sezale lɔ, ye sɔ wema lɔ sɔ na otoga lɔ, bo sɔ Pɔlu sɔ do alɔ mɛ ni-i. ³⁴ Otoga lɔ bo xlɛ wema lɔ, bo kan Pɔlu se tun kansin nɛ mɛ lɛ e sɔn jaa. Ke e va se tun Silisi we kansinmɛ mɛ e mɔ sɔn, ³⁵ e lɔ ni-i lɔ byo:«Na mɛ ke o do ɛhwɛ na we nɔ ye va vɔ, ko mɔ kan oxo se wu we.» E bo na ogbe wu ye tun ye ni mɔ hɛn ewu le xɔlu Elodu we xwegbe a mɔɔ cɔ-ɛ nɔ.