¹ Ko hɔn le ɖiye nu wɛ? Ɛmɛdindɔn hwɛn ko nyi wɛ? Ko hɔn kpɔn Xwetɔ mítɔn Yesu lɔ wɛ? Miye hwɛn nyi odan ke ko wa na Xwetɔ we josi wɛ? ² Na ko hɔn mɔ do nyi ɛmɛdindɔn le ŋumɛ na ɛmɛ gbokpwe ye can, ɛmɛdindɔn wɛ ko nyi na miye, ɖo xɔse ke na mi nyi, wɛ ɖexlɛ tun ko wa ɛmɛdindɔn we odan tɛye. ³ Ɛmɛ ke ko do ɛhwɛ na nɔ ye, oxo ke ko na lɔ a do ɖexlɛ tun ɛhwɛ tɛye mɔ jɔ i xin: ⁴ Mí hɔn ɖo ɛcɛ na do yi ɖuɖu kpo nunu do odan ke mi wa nɔ lɔ wu wɛ? ⁵ Bɛ mí hɔn ɖo ɛcɛ na do ɖe nyɔnu xɔsetɔ ɖe, a bo dɔn do ɛtɛ ɖi ke na ɛmɛdindɔn gbokpweye, kpo Xwetɔ lɔ nɔvye, kpo Sefasi ye wasi ɖo wɛ? ⁶ Blɔ kpo Banabasi kpo jan wɛ na wa odan gbɔxwe aɖu onu? ⁷ Sɔja nɛ lɛ na sɔ i tete ŋutɔ we oho do wa ahwan ? Ɛmɛ nɛ ɖo vɛntin e ko na ɖu sinsɛn etɔn? Alo kanlin kplɔtɔ nɛ lɛ na kplɔ kanlinye nɔ e ko na nuu anɔsin kanlin lɛye tɔn nɔ? ⁸ E hɔn ɛgbɛtɔ we susu ɖodyo jan hwɛn ko do oxo xinye nɔ, Mɔyi we osɛn lɔ can hɔn lɔ wɛ? ⁹ Ye wlan do osɛn wema lɔ me tun: « oglelɛtɔ ni ka bla onu na nyibu ke kpedo e wu do ɛjinukun lɛye ɖo ovo na getin lɛye nɔ.» Nyibu lɛye wɛ vɛ na Mawu nɔ doo? ¹⁰ Alo, míye wu hwɛn e lɔ oxo do nɔ wɛ? Ɛɛn míye wu wɛ ye wlan onu do. Ɛmɛ ke lɛ ogle nɔ, na lɛ ogle lɔ nɔ kpo omɔkpinkpɔn, ɛmɛ ke ɖe ɛjinukun lɔ nɔ, o ɖe nɔ kpo omɔkinkpɔn tun he can mɔ na yi hetɛye. ¹¹ Mi xwa gbigbɔ mɛ we onukunye do ɛgbɛ miatɔn mɛ, syɛ, na sinsɛn ke mi na ɖeye nyi dɔkunnu miatɔye, bɛ mí zɛ ojrɛ wu wɛ? ¹² NA enyi lɔ byo, ɛmɛ bye o ɖo ɛcɛ xin do mia ji nɔ, míye ke xwa nukun lɔ mia we ɛgbɛ mɛ, hɔn na ɖo ɛcɛ hu ye wɛ? Coo, mí hɔn byɔ ɛcɛ xinye ke nyi míatɔye. Vɔ na mí hɔn na do nyi afɔklinu na klisi, we Ɛwɛn Nywɛ lɔ, mí yi ogbe na onu bi sese. ¹³ Mi hɔn nywɛ lɔ byo odan watɔ ke nɔ wa odan le Mwu we xwegbeye, onuɖuɖu ke le xwe lɔ gbe wɛ ye nɔ ɖu, wɛ ɛmɛ ke na nɔ wa odan le Mawu we avɔsinsan we agba ji ye, nɔ ɖu le onu ke ye do san avɔ lɛye mɛ wɛ? ¹⁴ Emɔ ke mia we Xwetɔ lɔ na ogbe lɔ byo:« Ɛmɛ ke mɔ jra Ɛwɛn nywɛ lɔ nɔ ye mɔ na mɔ ɖu le Ɛwɛn lɔ jijra mɛ.» ¹⁵ Vɔ blɔ, ko hɔn zan ɛcɛ xin lɛye ti, ko ko wlan onu nɔ bo do byɔ ɛcɛ xin lɛye nɔ can, na ko na hu, ma ku, e nyɔ na hugan ye onu ke ko go do nɔ lɔ le sye. ¹⁶ Blɔ, na ko jra Ɛwɛn Nywɛ lo nɔ, e hɔn nyi gonyi wɛ onu ɖe na, ɖo odan wɛ nyi dɔn-ɔ tun bo mɔɔ wasi dandan, babaa na-a, na ko hɔn jra Ɛwɛn ɖagbe. ¹⁷ E do nyi bo tete wɛ sɔ'gbeta bo do wasi-i nɔ wɛ, bɛ ko ɖo na yi axɔtu, vɔ ke nyi dandan mɛ we onu wɛ, agban wɛ nyi le bo le okɔ na. ¹⁸ Axɔtu enɛ lɛ nyi taŋu? Iwɛ nyi tun ma jra Ɛwɛn Nywɛ lɔ vɔvɔ, ko ko zan ɛcɛ ke nyi tɛye le Ɛwɛn nywɛ lɔ mɛ nɔ. ¹⁹ Ko vo, ko ko le ɛmɛ ɖe kɔn, ganke, bo sɔ dye do wasi ɛmɛ xixɔ na bi, exin ko mɔ do kpewu na na ɛmɛ susu a do kpɔn hwlɛngan. ²⁰ Na ko le jwifu ye mɛ, ko nɔ wa onu ɖi jwifu ha, a bo do na na ye a do kpɔn hwlɛngan. Ko hɔn le Mɔyizi we osɛn lɔ gɔ, vɔ na ko le ɛmɛ ke osɛn lɔ gɔ ye mɛ, ko nɔ wa onu ɖi ɛmɛ ke le osɛn lɔ gɔ ha, a bo do na na ye a do kpɔn hwlɛngan. ²¹ Emɔha ke, na ko le ɛmɛ ke hɔn nyɔ Mɔyizi we osɛn lɔ ye mɛ, ko nɔ wa onu ɖi ɛmɛ ke hɔn nyɔ osɛn ha, a bo do na na ɛmɛ ke hɔn nyɔ osɛn lɔ ye a do kpɔn hwlɛngan. Vɔ ihwɛn e do nyi tun ko hɔn nɔ zɔn do Mawu we osɛn lɔ ji, ɖo ko le Klisi we osɛn lɔ gɔ. ²² Le ɛmɛ ke hɔn sinyɛnxu le xɔse mɛ ye mɛ, ko nɔ wa ɛmɛ ke hɔn sinyɛnxu le xɔse mɛ ye ha, a bo do na na ye a do kpɔn hwlɛngan. Ke na ɛmɛ ɖokpo-ɖokpo le, we'nu onu wɛ ko nɔ wa, a do walɔ ɖekpokpwe mɛ a do hwlɛn ɛmɛ ɖeye gan. ²³ Ɛwɛn Nywɛ lɔ wɛ dɔn na ko nɔ do na ko nɔ do wasi onu xin lɛye, bo can ko mɔ do kpɔn nyɔna ke le'me. ²⁴ Mi nywɛ ganji tun na ɛmɛye bi, o do wedun nɔ a do yi ajɔ, ɛmɛ ɖokpo ge wɛ na wa yi. Be mi bo do odun lɔ ni kena e jɛ ɖo ha, a bo do yi ajɔ lɔ. ²⁵ Odundotɔ ɖekpokpwe nɔ do osɛn sinsyɛnxuye na eɖe, a bo do yi xɔlugba ke nɔ gu, míye ogba ke hɔn nɔ gu kpɔn gbeɖe wɛ mí ba yi nɔ. ²⁶ Iwɛ dɔn na ko do odun lɔ nɔ, ŋukunsin tɛye nɔ le ofi ke ko yi nɔ lɔ ji. Bɔdewu, ko le ɖi datɔ ko hɔn nyi akɔn do jɛhɔn mɛ nɔ ha. ²⁷ Vɔ, ko nɔ do aya na gbaza taŋu, bo nɔ ɖu le eji ganji, exin, ko ko mɔ do jra Ɛwɛn ɖagbe lɔ na ɛmɛye vɔ, Mawu mɔ va gbɛ bo tete.