¹ Syɛ ko na lɔ oxo do olan ke ye do san avɔ na yɛhwe wu. Mí nɔ lɔ tun, mí'mɛ bi wɛ ɖo onunyinyɔ, oxojɔxo wɛ, onunyinyɔ lɔ nɔ hɛn gonyi do va vɔ owanyiyi bo nɔ na na ye nɔ yi ŋukɔn le xɔse mɛ. ² Ɛmɛ ke bu-i nɔ tu he mɔ nyɔ onu ɖe, e hɔn nyɔ onu lɔ hɔndyo, ni ke e ɖo na nywɛ ɖo ha. ³ Vɔ ɛmɛ ke yi owan na Mawu, mawu nyɔ ɛmɛ lɔ. ⁴ Ke nyi y'a ɖu olan ke ye do san avɔ na yehwe tɔn, mí nywɛ tun yehwe ti mɔ le ɛgbɛ mɛ bwɛ, Mawu ɖokpo ge wɛ le. ⁵ Ganke, onu susu le jiŋukunsin kpo nyidan ji, ɛmɛye bo nɔ sɔ do kpɔn mawu, ɖi byo mawu susu kpo xwetɔ susu wɛ le ha. ⁶ Ganke Mawu ɖokpo guee wɛ lɛ na míye. E lɔ wɛ nyi Otɔ ke ɖo onu bi xloŋu, e lɔ wɛ mi le ɛgbɛ na. Xwetɔ ɖokpo gee wɛ bo mɔ le iwɛ nyi Yesu Klisu lɔ ke ji na onu bi gbɔn bo do le; do gbɔn e lɔ ji, mi le ɛgbɛ. ⁷ Vɔ le oxojɔxo mɛ, ɛmɛ bi hwɛn nywɛ do emɔha. Ɛmɛ dɛye le, yɛhwe we walɔ bo ci lanmɛ na ye gbɔɔn do jɛ egbe, exin lɔ bo dɔn ye ɖú alan ke ye dɔ san avɔ nɔ, ye nɔ lɛn nɔ tu yɛhwe tɔn mwɛ olan lɔ mɔ nyi. Kena ayixa yetɔn hɔn syɛnxu, e nɔ ci na ye ɖi osu wɛ ye ɖu nɔ ha. ⁸ Vɔ e hɔn nyi onuɖuɖu hwɛn dɔn na mi na do jɛŋu na Mawu mɔ! Na mí hɔn ɖu, e hɔn gu onu ti le mía wu. Na mí ɖu, ale ɖe hɔn e mɛ na mí. ⁹ Vɔ mi cɔ mia ɖe, na ɛmɛɖesijijɛ, ke mɛ na mi le, bo dowa onu nɔ, ni ká dɔn na ɛmɛ ke lido le xɔse mɛ ye a jɛ'nyi. ¹⁰ Ɖo na ɛmɛ ke hɔn lido le xɔse mɛ, kpɔn lɔ ke tun he mɔ ɖo onunyinyɔ, o bo ɖu onu lɛ yɛhwexɔ mɛ nɔ, exin lɔ hɔn na na oji ɖiɖe wu-i e mɔ jɛ onu ke ye do san avɔ na yɛhwe ye ɖuɖu ji? ¹¹ Exin, ɛmɛ ke hɔn lido le xɔse mɛ, mɔ crɔn do onunyinyɔ tɔwe lɔ wu. Nɔwe xɔsetɔ ke we ota na Klisu kudo bɛ e nyi. ¹² Na mi wasi onunyinyla xinha kpo mia nɔvyɔ xɔsetɔye nɔ, bo abi ayixa yetɔn ke hɔn syɛnxu lɔ wu nɔ, mi nywɛ tun Klisi lɔ tete wɛ mi wa onunyinyla kpo nɔ. ¹³ Iwɛ dɔn, na enyi onuɖuɖu wɛ na dɔn na nɔvye lɔ na do jɛ ɛhwɛ mɛ, bɛ ko hɔn mɔ ɖu olan gbeɖe, exin e ko na mɔ nyi wuye wɛ e sɔn na nɔvye lɔ do jɛ ɛhwɛ mɛ.