¹ Syɛ, ko jro na kɛ onu do oxo ke mi wlan ɖodan-a wu. Onunyɔ wɛ e nyi tun ŋusunglo ni ká tɛkpɔ nyɔnusi. ² Ganke, a do gbɔn akpa na ɛgbɛ ɖuɖyu zinzan, ŋusunglo ɖokpo-ɖokpo ni ɖo nyɔnu etɔn, nyɔnu ɖokpo-ɖokpo mɔ ɖo osu etɔn. ³ Osu ɖo na nɔ yi osyɔ kɔn; onyɔnu can bo ɖona nɔ yi oswɔ kɔn. ⁴ Nyɔnu hɔn ɖo ɛcɛ ti do i tete we agbaza ji, vɔ oswɔ wɛ ɖo ɛcɛ do e ji, emɔ ha ke osu can hɔn nɔ ɛcɛ ti do i tete ŋutɔ we agbaza ji, vɔ osyɔ wɛ ɖo ɛcɛ do e ji. ⁵ Mi ka gbɛ oxɔ na mia ɖe. Gbɔxwe emɔ tɔn na va emɛ, bɛ mi ɖo ogbe kpoɔ a do nɔ e mɔ na ganxixo ɖe, a do ɖe mia ɖe do'vo na ɛɖɛ xixo. Exin godo, mi mɔ mɔ̀ jɛ okpɔ, ɖo na e hɔn nyi emɔha, mi hɔn kpewu na va ɖu le mia ɖe ji, Satana mɔ gbɔn blɛ a bo do tɛn mi kpɔn. ⁶ Ko lɔ oxo xin, bo ɖe omɔ na mi do onu xin lɛye wu, e hɔn nyi osɛn hwɛn ko do nɔ. ⁷ Ko jro tun ɛmɛ bi a ci emɔha ganke, onu nina vovwe wɛ mi bo yi sɔn Mawu si. E sɔ eke na ɛmɛ ɖe, bo sɔ bu na ɛmɛ xin daan. ⁸ Oxo ke lɔ nɔ na ɛmɛ ke hɔn ɖe osu ye a lɔ ɛmɛ ke hɔn ɖe nyɔnu ye, kpo kposyuye: Onunywɛ wɛ enyi tun mi na nɔ nyɔnu maɖe a lo osu maɖe, ɖo'mɔha. ⁹ Vɔ na mi hɔn kpewu na ɖu mia ɖe ji, mi bo ɖe nyɔnu alo osu. Ɖo e nyɔ tun mia ɖe osu alo mia ɖe nyɔnu hugan nyɔnu alo ŋusuglo a jro mi nɔ huu. ¹⁰ Ogbeɖiɖe ke ko na osu kpo osi nɔ wɛ nyi tun nyɔnu ni ká gbɛ oswɔ. E ko bo tete ŋutɔ hɛn na ogbeɖiɖe xin lɔ, Xwetɔ lɔ wɛ. ¹¹ Na ɛgbɛ oswɔ jan wɛ, bɛ ni bo ká mɔ de osu ti, alo e mɔ trɔ gbɔn va. Osu can ni ká gbɛ osyɔ. ¹² Ɛmɛ gbokpweye, oxo ke ko lɔna mi nɔ xɛn; e hɔn nyi Xwetɔ lɔ hwɛn lɔ-ɔ vɔ bo tete wɛ; ko lɔ nɔ tun byo: na nɔvi xɔsetɔ ŋusunglo ɖe ɖo nyɔnu maxɔsetɔ, nyɔnu lɔ bo yi ogbe na ye do nɔ kpɔokpɔ, bɛ osu lɔ ni ká bɛ-ɛ. ¹³ Emɔha ke, na nyɔnu xɔsetɔ ɖe ɖe osu maxɔsetɔ, osu lɔ bo yi ogbe na ye a do nɔ okpɔkpɔ, ni bo ká gbɛ osu lɔ. ¹⁴ Ɖo osu maxɔsetɔ lɔ trɔ zun ɛmɛ ke Mawu ɖe do ovo do gbɔn oxyɔ xɔsetɔ lɔ ji. Emɔha ke nyɔnu maxɔsetɔ lɔ trɔ zun ɛmɛ ke Mawu ɖe do ovo do gbɔn owɔ xɔsetɔ ji. E Nyi emɔ, vikpɛ mia tɔnye hɔn ba va nyi ɛmɛ mimɛ nɔ. Ganke, ɛmɛ mimɛ wɛ ye bo nyi. ¹⁵ Na maxɔsetɔ lɔ jro na gbɛ nyɔnu alo e jrɔ na gbe osu, ni gbɛ faa. Le hwɛxinnu nɔvi xɔsetɔ ŋusunglo lɔ o, nyɔnusi lɔ o, na jɛ e ɖe si. Ɖo na mía do nɔ ɛgbɛ le fifa mɛ wɛ dɔn Mawu do yɔ mí. ¹⁶ Ɛmɛ ɖe hɔn nɔ nyɔnu-i, nyɔnu xɔsetɔ, o ko na va hwlɛn suwe gan ma? alo osu xɔsetɔ o ko na va hwlɛn siwe gan ma? ¹⁷ Gbɔn ovo na exin, ɛmɛ ɖokpo-ɖokpo ni nɔ alɔ ke ji Xwetɔ lɔ ɖo-e, emɔ sɔgbe kpo ke e le saa gbɔwe Mawu do va yɔ-ɛ. Osɛn ke ko sɔ ɖo'nyi le agun ɖekpokpwe mɛ xɛn xin. ¹⁸ Na ɛme ɖe gbo ada gbɔxwe Mawu do va yɔ-ɛ, ni nɔ adagbigbo etɔn ji. Na ɛmɛ ɖe hɔn gbo ada gbɔxwe Mawu yɔ-ɛ, ni ká mɔ ve gbo ada. ¹⁹ Adagbigbo hɔn nyi nu ti, adamagbo can ko nyi onuti. Vɔ onu ke le vivɛ ɖe wɛ nyi a zɔn gbɔn osɛn Mawu tɔnye ji. ²⁰ Iwɛ dɔn ɛmɛ okpo-ɖokpo ni nɔ ke e le ɖo gbɔxwe Mawu do va yɔ-ɛ. ²¹ ɛmɛxixɔ wɛ o nyi gbɔxwe Mawu yɔ we? Ka lo onu kpɔn. Vɔ na okpewu na jɛ ɖiwe si, bo jɛ ɖiwe si. ²² Ɖo ɛmɛxixɔ ke Xwetɔ lɔ yɔ, trɔ zun ɛmɛ ke jɛ eɖe si le Xwetɔ lɔ mɛ. Emɔha ke, ɛmɛ ke le eɖe si, gbɔxwe Klisi yɔ-ɛ, e trɔ zun ɛmɛxixɔ etɔn. ²³ Oho vivɛ wɛ Mawu do xɔ mi, mi ká mɔ ve trɔ zun ɛmɛxixɔ na ɛgbɛtɔye. ²⁴ Nɔviyee mì, le Mawu we ŋukɔn, ɛmɛ okpo-ɖokpo ni nɔ ke e le saa gbɔxwe gbo yi oyɔ lɔ. ²⁵ Oxo ke kan ɛmɛ ke hɔn ɖe osu alɔ nyɔnu ye, tɔn ko hɔn yi ogbe ɖiɖe ti sɔn Xwetɔ lɔ kɔn, vɔ blɔ ɛmɛ ke na Xwetɔ lɔ sɔ ɖo wasi ɛmɛ wu ye na ɖe oji do, do gbɔn dɔmɛnyinyɔ etɔn mɛ, oxo ke ko gbɔn do e wu, i xɛn ke. ²⁶ Ko bu ota mɛ tun, do vivɛ sise ke le ɛgbɛ lɔ mɛ egbeye wu, onu ke na nyɔ wɛ nyi tun ɛgbɛtɔ a nɔ ke e le. ²⁷ Nyɔnu wɛ o ɖe, ká byo he a mɔ gbɛ-ɛ. O hɔn ɖo nyɔnu wɛ, ká mɔ ɖe. ²⁸ Vɔ, Na o mɔ do ɖe nyɔnu can o hɔn wa onunyinyla, na nyɔnuvi le alɔji ɖe can ɖe osu, e hɔn wa onunyinlya vɔ ɛmɛ ke ɖe nyɔnu alo osu, na gbɔn ɛgbɛ mɛ bwɛ we tagbaye mɛ, blɔ ko ko jro tagba xin lɛye na mi. ²⁹ Nɔviyee mì oxo kena ko lɔ nɔ, bo do lɔ emɔha xɛn: oganxixo viɖe jan wɛ drɔn. Bɛ sɔn syɛ mi ɛmɛ ke ɖo nyɔnuye, mi zan ɛgbɛ ɖi trɛnnɔ ha. ³⁰ Ɛmɛ ke vi avi nɔ ye, ye ni ci ɖi ɛmɛ ke hɔn vi avi nɔ ye ha, ɛmɛ ke kpɔn jijwɛ nɔ ye, ye ni ci ɖi ɛmɛ ke hɔn kpɔn jijwɛ nɔ ye ha. Ɛmɛ ke xɔ onu nɔ ye, ye ni le ɖi emɛ ke hɔn ɖo onuti ye ha. ³¹ Emɛ ke zan ɛgbɛmɛ bwɛ we onuye nɔ ye ni ci ɖi ɛmɛ ke hɔn zan nɔ ye ha. Ɖo, ninɔmɛ ɛgbɛ ke tɔn o sɔn yi vivɔnu nɔ. ³² Vɔ , ojro tɛye wɛ nyi tun onulilo ti ni ká mɔ nɔ ayixa mɛ na mi. Ŋusunglo ke hɔn ɖe nyɔnu, Xwetɔ we odan wiwa nɔ le ayixa mɛ ni-i, e bo nɔ kan nɔ ke e na hɛn ɖo a do jɛŋu na Xwetɔ lɔ nɔ. ³³ Vɔ ɛmɛ ke ɖe nyɔnu, ɛgbɛ mɛ bwɛ we onuye wɛ nɔ le ayixa mɛ ni-i, e mɔ nɔ kan ke e na hɛn ɖo a do jɛŋu na osyɔ nɔ, ³⁴ ayixa etɔn nɔ ma ɖo owe. Emɔha ke, nyɔnu alɔ nyɔnuvi, ke hɔn ɖe osu, Xwetɔ lɔ we odan wiwa wɛ nɔ le ayixa mɛ ni-i, e bo nɔ kan nɔ tun he a mɔ nɔ kinkwɛn le agbaza kpo gbigbɔ mɛ. Vɔ nyɔnusi ke ɖe osu, e lɔ, ɛgbɛ mɛ bwɛ we onuye wɛ nɔ ci ayixa etɔn mɛ, e mɔ nɔ kan ke e na hɛn ɖo a do jɛŋu na oswɔ nɔ. ³⁵ Miatɔn nywɛ wɛ ko ba nɔ bo do lɔ oxo ɖo emɔha nɔ. E ko nyi ma do zin gbigbɔ ji na mi hɛn, vɔ na mi a do wasi onu ke sɔgbe, a bo tɛ do Xwetɔ lɔ we odan wiwa wu, mi ko mɔ ve sin egbedagbe nɔ , exin lɔ wɛ dɔn. ³⁶ Na hwanjevi ɖe sɔ agɔ nyɔnuvi ɖe bo kpɔn tun nyɔnuvi lɔ mɔ jro he nɔ diin, hiye mɔ na ɖe hiey ɖe, na e hɔn nyi emɔha he mɔ na gbɛ va ɖe afɔ nyinyla do yi nyɔnuvi lɔ kɔn bɛ ni bo ɖe-e ɖi ke jro-e ɖo ha. Exin hɔn nyi e wa onu nyinyla. ³⁷ Vɔ na hwanjevi ɖe, sɔ ogbeta vivɛ ɖe le oji etɔn mɛ, tun he mɔ ɖe nyɔnuvi ke he mɔ sɔ agɔ lɔ nɔ, e ko nyi ye xo do okɔ ni-i hwɛn, e hɛn do alɔ ji, na ogbeta sisɔ nyi lɔ sɔn oji etɔn mɛ oxojɔxo, i tete we ojro wɛ e bo nyi, bɛ ogbeta nywɛ wɛ e sɔ. ³⁸ Ŋusunglo ke ɖe agɔswɛ etɔn wasi onu nywɛ, vɔ ŋusunglo ke hɔn ɖe-e wa onunywɛ hugan. ³⁹ Nyɔnu ke ɖe osu, osɛn bla-ɛ do osu lɔ wu, na osu gbɛ le ɛgbɛ. Na osu lɔ ku, e hɛn e na ɖe ɛme ke jro-e, vɔ e ɖo na ɖe-e le xɔse mɛ. ⁴⁰ Ganke, na nyɔnu lɔ nɔ osu ma ɖe, e na hɛn jijwɛ va ni ganji. Kena blɔ kpɔn ɖo xɛn xin, ko bo ni tun bo can ko ɖo Mawu we gbigbɔ lɔ.