¹ Na tagba ɖe va va mia mɛ, onu nɛ dɔn na maxɔsetɔye kɔn wɛ mi nɔ gla a bo va yi yɔ ɛhwɛ lɔ do, mi ko nɔ hɛn do yi xɔsetɔye? ² Alo, mi hɔn nyɔ xɔsetɔye wɛ na ɖo ɛhwɛ na ɛgbɛ lɔ wɛ? Na e nyi tun miye wɛ nɔ ɖo ɛhwɛ na ɛgbɛ lɔ, oxo ma ɖi xo xin ha ye, na glo lilɔ na mi wɛ? ³ Mi hɔn nyɔ nywɛ tun miye wɛ na ɖo ɛhwɛ na Mawu we ɛwɛndotɔye wɛ? Zɔn nɛmu lɛ na va nyo ɛgbɛ mɛ bwɛ we onuye tɔn! ⁴ Na ɛgbɛ mɛ bwɛ we onu ɖe va hɛn tagba do va mia mɛ, onu nɛ jɔ na mi nɔ do sɔ yi ɛmɛ ke na agun hɔn nɔ sɔ do yɔ onuti ye kɔn? ⁵ Nunya ni wa mi o! Bɛ onunyɔtɔ ɖokpo tete, bo na kpewu gbo ɛhwɛ le nɔvi xɔsetɔye mɛ wɛ? ⁶ Vɔ, nɔvi xɔsetɔ ɖe mɔ yɔ ɛhwɛ nɔvyɔ xɔsetɔ do maxɔsetɔye kɔn! ⁷ Ɛhwɛ ke mi o do na mia ɖeye nɔ lɔ vɔvɔ, o ɖe xlɛ tun miye mɔ jɛ onyi sese le xɔse mɛ? Onu nɛ dɔn mi hɔn na yi ogbe na ye tafu wu mi? Onu nɛ lɛ jɔ mi hɔn na yi ogbe na ye a yi onu miatɔye? ⁸ Vɔ, miye lɔ gbɔɔn wɛ tafu ɛmɛye nɔ, a bo nyi onu le ɛmɛye si nɔ. Mia nɔvyɔ xɔsetoye, wɛ mi bo nɔ jrɛ ɛdɛn xin lɛye kpo. ⁹ Alo mi hɔn nywɛ tun ɛmɛ ke nɔ wa onu nyinylaye, hɔn ɖyɛ xɔluɖuɖu Mawu tɔn mɛ nɔ wɛ? Mi ká blɛ mia ɖe: ɛgbɛɖuɖyuzantɔye, yehwesintɔye, afɔdogbetɔye, nyɔnusiye na ɖe nyɔnusiye, ŋusunglo ke nɔ yixɔ do ha tɔ ŋusunglɔ ji, ¹⁰ ajotɔye, ɛmɛ ke onu hɔn nɔ jɛŋu na ye, ahannumunɔye, ɛmɛzuntɔye, ajoso-ɛmɛtɔye, ti hɔn ɖyɛ xɔluɖuɖu Mawu tɔn lɔ, mɛ nɔ. ¹¹ Le mia mɛ, ɛgbɛtɔ alɔkpa ke ha ɛmɛ ɖeye nyi saa va yi mɛ xɛn xin, vɔ Mawu bo le mi, bo ɖe mui do ovo, bo sɔ mi do wasi ɛmɛ jijwɛ, le Xwetɔ Yesu Klisi lɔ we nyikɔ mɛ, kpo Mawu miatɔn we gbigbɔ mɛ. ¹² « Omɔ ɖiɖe le na, na ma do wasi onu onu ɖekpokpwe.» Ganke, blɔ, ko hɔn jɔ ɖye nɔ gbɔɔn onu ɖe va xɛ ota na nɔ. « ¹³ Onuɖuɖu le na adɔ, adɔ can bo le onuɖuɖu.» Oxonugbo wɛ ganke Mawu bo na va crɔn ye'mɛ owe lɛye bi. Vɔ agbaza hɔn le na ɛgbɛ ɖuɖyu zinzan, Xwetɔ lɔ wɛ e le na, Xwetɔ lɔ can mɔ le na agbaza lɔ. ¹⁴ Iwɛ dɔn, Mawu ke Xwetɔ lɔ le ocɔye mɛ, na va fɔn míye can do gbɔn hɔnhlɔn etɔn mɛ. ¹⁵ Mi hɔn nyɔ tun agbaza wɛ nyi olɔklan vovwe ke kple do wasi Klisu we agbaza wɛ? Kena e le emɔ, bɛ ko kpewu na sɔ Klisi we agbaza we alɔklan ɖe, a do wasi agaletɔ we agbaza we akpaɖe? Gbeɖe kpɔn e hɔn kpewu na nyi emɔ! ¹⁶ Alo mi hɔn tun ŋusunglo dɔ kpo nyɔnusi kpaconɔ, e lɔ kpo agalɛtɔ lɔ trɔ zun agbaza ɖokpo ge wɛ? Ɖo ye wlan tun byo:« Ye ɛmɛ owe lɛye trɔ zun agbaza ɖokpo gee.» ¹⁷ Vɔ ɛmɛ ke wasi ɖokpo kpo Xwetɔ lɔ, e lɔ kpo Xwetɔ lɔ trɔ zun onu ɖokpo gee le gbigbɔ mɛ. ¹⁸ Mi si na ɛgbɛ ɖuɖyu zinzan. onunyinyla ɖekpokpwe ke ɛgbɛtɔ na wasi, e hɔn mɔ ca kpo agbaza, vɔ ɛmɛ ke jo ɛɖɛ do na ɛgbɛ ɖuɖyu zinzan, e wasi onu nyinyla do agbaza i tete tɔn nɔ. ¹⁹ Alo mi hɔn nywɛ tunagbaza miatɔn wɛ nyi oxwe na gbigbɔ kinkwɛn ke Mawu na mi, e bo le mia mɛ lɔ wɛ? Mi hɔn nyi mia ɖe tɔn mɔ! ²⁰ Ɖo Oho vivɛ wɛ Mawu do xɔ me. Iwɛ dɔn, mi sɔ agbaza miatɔn do do gigo na mawu.