¹ Mí se nɔ tun ye mɔ lɔ nɔ gbɔn ofi ɖekpokpwe tun miye mɔ zan ɛgbɛ ɖuɖyu nɔ. Ɛgbɛ ɖuɖyu zinzan xin lɔ bo nyla gbɔɔn maxɔsetɔye can hɔn wa onu xin ha can. Ye lɔ nɔ tun ɛmɛ ɖe mɔ le mia mɛ, bo nɔ dɔ otɔyɔ de. ² Onu nyi ɖo emɔ ha ye bo mɔ nyigo nɔ! Avi bɛ e ɖo na nyi na sin, mi mɔ do ɖe ɛmɛ ke do oun xin ha lɔ te tɔn-ɛ le mia mɛ. ³ Blɔ, ko hɔn le mia kɔn le agbaza mɛ, vɔ ko kpɔkpɔ kpo mi le gbigbɔ mɛ. ɛmɛ ke do onu xin ha lɔ te, ko o do ɛhwɛ ni xoxoxo na ko do le mia kɔn. ⁴ Le hwekenu na mi na kple le Xwetɔ mítɔn Yesu Klisi we nyikɔ mɛ, ko, le mia me le gbigbɔ mɛ, iwɛ gbɔn Xwetɔ míatɔn Yesu Klisi we hɔnhlɔn mɛ, ⁵ mí na sɔ ɛmɛ xinha sɔ ve jɔ na Satana, mía do gu onunyinyla wiwa ke le ɛgbɛzan mɛ ni lɔ. Exin, okla etɔn mɔ do kpɔn hwlɛnga le Xwetɔ lɔ azangbe. ⁶ E hɔn jɛ tun mi na nyi hwɛn-xin! Alɔ mi hɔn nywɛ tun dokɔtinkɛn oviiɖe jan wɛ nɔ fɔn yɛvowɔ ke nya lɔ bi wɛ? ⁷ Mi sɔ dokɔtinkɛn xixo lɔ sɔ flɛn, na mia trɔ zun yɛvowɔ nyinya yɔyɔ ke mɛ na tinkɛn ti hɔn le. Le oxojɔxo mɛ, yɛvowɔ nyinya yɔyɔ xin lɔ wɛ mi o nyi. Ɖo Klisi ke nyi vivayi we oxwe we lɛngbɔvi mía tɔn lɔ, y'o sɔ-ɛ do san avɔ. ⁸ Iwɛ dɔn mía ɖu vivayi we oxwe lɔ; mi hɔn ɖu-i nɔ kpo dokɔtin xixo ke nyi onunyinyla wiwa kpo danu wiwa, vɔ mía ɖu-i kpo kpɔnɔ ma ɖo dokɔtinkɛn, ke nyi onu mimɛ wiwa kpo oxojɔxo lilɔ. ⁹ Le wema ke ko wlzn ɖodan mi saa mɛ, ko o lɔ tun mi mɔ ká do ogbɛ kpo ɛgbɛ ɖuɖyu zan tɔye. ¹⁰ E hɔn nyi ɛmɛ kpaa ke le ɛgbɛ ke mɛ ye, bo nyi ɛgbɛ ɖuɖyu zan tɔye, ɛmɛ ke na onu hɔn nɔ jɛŋu na ye, jagudaye, alo yehwesintɔye, we oxo hwɛn ko lɔ nɔ. E nyi mi na si na ɛme xinye bi, bɛ ɛgbɛ lɔ mɛ jan wɛ mi na lɛ le. ¹¹ Syɛ, oxo ke ko wlan na mi lɔ wɛ nyi tun mi mɔ ka do oha kpo ɛmɛ ke nɔ yɔ ɛɖe tu nɔvi xɔsetɔ, ganke bo nyi ɛgbɛ ɖuɖyu zan tɔ, alɔ ɛmɛ ke onu hɔn jɛŋu na, alo e bo nɔ sɛn yɛhwe nɔ, a bo nɔ lɔ ɛmɛxo nɔ, a bo nyi ahannumunɔ, a bo nyi ajotɔ. Onuɖuɖu vɔvɔ can, mi hɔn ɖo na ɖu kpo ɛmɛ xin ha ye. ¹² Maxɔsetɔye we ɛhwɛ ɖiɖɔ hɔn kan-a, xɔsetɔye wɛ mi ɖo na ɖɔ ɛhwɛ na. ¹³ Maxɔsetɔye, Mawu wɛ na ɖɔ ɛhwɛ na ye. Mi nya ɛmɛ nyinyla lɔ tɔn le mia mɛ.