¹ Kena e le emɔ mi ɖo na nɔ sɔ mí do kpɔn Klisi we odansɔvi a bo mɔ sɔ mí do kpɔn ɛmɛ keye na Mawu sɔ onumakpɔndona etɔnye ɖiɖexlɛ we'dan sɔ do asi na. ² Ɛmɛ kena ye sɔ odan sɔ do asi na, onu ke ye ba do e si nɔ jan wɛ nyi ogbejininɔ. ³ Na blɔ tɛye tɔn, mi hɛn mi na do ɛhwɛ wu, kaka do yi ɛhwɛgbotɔ nyidan ji bwɛ tɔnye we ŋukɔn can. Ɖo, bo tete hɔn kpɔn tun ko hu ɛhwɛ ɖe. ⁴ Ɛhwɛdo-ɛmɛ ɖe hɔn le na ko flin tun ye mɔ do, vɔ exin hwɛn nyi lɔ byo ko nyi ɛmɛ jijwɛ. Xwetɔ lɔ wɛ nɔ do ɛhwɛ na. ⁵ Exin wutu, mi ko ɖɔ ɛhwɛ do ɛmɛti keŋu gbɔxwe ogan lɔ a va xo, le hwekenu na Xwetɔ lɔ na. I wɛ na ɖe onu onuhwihwla ke le vuvlu mɛ ye jɛ hinhɔn nu, a bo ɖe tito ke le oji mɛ ye jɛ agbaŋugba. Hwexinnu wɛ Mawu na kanfu ɛmɛ ɖokpo-ɖokpo ɖi ke e jɛ ɖo ha. ⁶ Nɔvyee mì, miye wɛ do na ko do lɔ oxo xinye do bo kpo Apolosu wu, mi mɔ do yi okplan do gbɔn kpɔdewu míatɔn mɛ, a bo nyɔ gɔnmɛ na oxogbe ke lɔ tun:« Mi ko mɔ zɛ onu kena winwlan lɔ́ lɔ wu» na ɛmɛti ko mɔ do nyigo le hatɔ wu nɔ. ⁷ Ɖo ɛmɛ nɛ lɛ na dɔn na o na do nyi ŋukunsinleji le ɛmɛye mɛ? Onu nɛ lɛ o ɖo na e hɔn nyi na wɛ ye na we vɔvɔ? Ke e nyi tun na wɛ ye na we, onu jɔ o do nyigo nɔ ɖi yi hwɛn o yi vɔnu ha? ⁸ Miye xɛn o ɖo onu bi ke mi na tɛnwu ɖo! Mi bo o jɛ dɔkun! Bo o lo ɖu xɔlu nɔ míye mɛvo. Na e do nyi tun xɔlu lɔ wɛ mi ɖu nɔ oxojɔxowɛ, bɛ míye can mɔ ɖu-i kpo mi. ⁹ Ɖo, le blɔ we onukpinkpɔn, mí'mɛ ke nyi ɛmɛdindɔnye, e ci ɖi Mawu sɔ mí sɔ ɖo tɛnxo kpotwi ha. Mí bo ci ɖi ɛmɛ ke ɖo oku hwɛ do bo na va hu le dogba ji ha. Mí bo trɔ zun onukpinkpɔn na ɛgbɛ lɔ, na ɛwɛndotɔ Mawu tɔnye kpo ɛgbɛtɔye. ¹⁰ Mí nyi oklenɔye do Klisi lɔ wu, vɔ miye bo nyi onunyɔtɔye le Klisi lɔ mɛ. Mí nyi hɔnhlɔnmaɖotɔye, vɔ miye bo ɖo hɔnhlɔn. Ye mɔ ɖo bubu na miye, a bo kɔn acɔn do míye wu. ¹¹ Gbɔɔn do va jɛ syɛ can, mí le xovɛ, bo le kɔmyɔ, bo le govɛ, ye nɔ xo mí nɔ, mí bo flu nɔ. ¹² Mí nɔ wa odan kpo alɔ míatɔnye gbɔɔn agbɔ mɔ kpe. Na ɛmɛye zun mí, mí nɔ xo fifa we ɛɖɛ na ye, na ye ɖe ofun na mí, mi nɔ do oji le

e nu.