¹ Nɔviye mì, bo can, ko hɔn kpewu lɔ oxo na mi ɖi ke ye na oxo na ɛmɛ ke le gbigbɔ mɛ ye ɖo ha, vɔ ko lɔ oxo na mi ɖi ɛmɛ ke le agbaza mɛ ye ha, ɖi vifeye ha le Klisi mɛ. ² Anɔsi wɛ ko na mi, ko hɔn na mi onuɖuɖu sinsyɛnxu, ɖo le hwexinnu, mi hɔn kpewu na ɖu onu sinsyɛnxu gbɔɔn do va jɛ syɛ can, mi kpewu na ɖu-i can. ³ Ɖo, gbaza mɛ wɛ mi gbɛ le. Ke enyi ɛwu hwinhwan kpo ojrɛye mɔ gbɛ le mia mɛ, agbaza mɛ hwɛn xin na mi do le bo zan ɛgbɛ mɛ bwɛtɔye we walɔ nɔ wɛ. ⁴ Kena ɛmɛye le mia mɛ, bo lɔ nɔ tun : « Blɔ Pɔlu tɔn wɛ ko nyi» Ɛmɛ bu bo lɔ nɔ tun: «Apolosu tɔn wɛ ko nyi» Ɛgbɛ mɛ bwɛtɔye we we walɔye hwɛn nyi exinye ke mi zan nɔ wɛ? ⁵ Vɔ ɖe, ɛmɛ nɛ Apolusu? ɛmɛ nɛ nyi Apolosu? Ɛmɛ nɛ nyi Polu? Odansɔvi ke ji na Mawu gbɔn de yɔ mi do wa xɔse mɛ jan hwɛn mi wɛ? ɖokpo-ɖokpo míatɔn bo wa odan ɖi kena Xwetɔ lɔ dɔn-ɛ ɖo ha. ⁶ Blɔ, ko do otin lɔ, Apolosu bo hu ɛsin ni-i, vɔ Mawu wɛ na na e do hwɛn nɔ. ⁷ E le emɔ, ɛmɛ ke do otin lɔ hɔn nyi onuti, ɛmɛ ke hu ɛsin ni-i can ko mɔ nyi onu ti vɔ Mawu ɖokpo gee ke dɔn na e do hwɛn nɔ lɔ wɛ le vivɛ ɖe. ⁸ Syɛ, ɛmɛ ke do otin lɔ kpo ɛmɛ ke hu ɛsin ni-i, onu ɖokpoŋumyɔ wɛ ye nyi. Ɛmɛ ɖokpo-ɖokpo, bo na odan ke e wa we ale. ⁹ Ɖo mí wa odan na Mawu nɔ ɖo kpɔkpɔ. Miye wɛ nyi Mawu we ogle lɔ bo mɔ nyi Mawu we oxɔ. ¹⁰ Do gbɔn Mawu we ɛfɛnu ke e na-a mɛ, ko do oxɔ lɔ gun ɖi kena oxɔgbatɔ adodwe nɔ wasi ɖo ha. Ɛmɛ bu bo gbá do e ji nɔ. Vɔ, ɛmɛ ɖokpo-ɖokpo we ayxixa ni nɔ ote do kena e gbá do e ji nɔ ɖo wu. ¹¹ Ɖo ɛmɛ ɖe hɔn mɔ kpewu na mɔ ɖo dodwe bu gbɔvo na ke ye o ɖo; exin lɔ wɛ nyi Yesu Klisi. ¹² Sika wɛ e do gbá do e ji o, oganve wɛ o, ɛkpɛn oho vivɛ tɔn wɛ o, otin wɛ o, dema wɛ o, ɛtɛ wɛ o, ¹³ ye na wa ɖe odan ɛmɛ ɖokpo-ɖokpo tɔn sɔ xlɛ le ɛhwɛ ɖo'zan lɔ gbe e mɔ ze, ɖo azan xin lɔ na va va kpo ozo, ozo wɛ bo na gbeje odan ɛmɛ ɖokpo-ɖokpo tɔn, na e nyi odan adodwe e na ɖe sɔ xlɛ. ¹⁴ Na ɛmɛ ɖe we odan nɔ ote le dodwe lɔ ji, e na yi axɔtu. ¹⁵ Na ɛmɛ ɖe we odan fyɔ, e hɔn yi axɔtu nɔ, e lɔ tete na kpɔn hwlɛngan vɔ e na le ɖi ɛmɛ ke zɛ tɔn le ozo mɛ ha. ¹⁶ Mi hɔn nywɛ tun Mawu we oxɔ wɛ mi nyi, Mawu we gbigbɔ bo le mia mɛ wɛɛ? ¹⁷ Na ɛmɛ ɖe gba Mawu we oxwe, Mawu na gba-ɛ. Ɖo Mawu we oxwe lɔ onu kinkɔn wɛ e nyi, mi wɛ bo nyi oxwe lɔ. ¹⁸ Ɛmɛ ɖe ni bo ka blɛ mi ɖu. Na ɛmɛ ɖe le mia mɛ bo kpɔn tun he mɔ ɖo onunyinyɔ ɛgbɛ ke mɛ tɔn, bɛ ni bo trɔ zun oklenɔ, a do kpewu do onunyinyɔ adodwe lɔ. ¹⁹ Ɖo ononyinyɔ ɛgbɛ mɛ bwɛ tɔn, okle wɛ e nyi le ŋumɛ na Mawu. Le oxojɔxo mɛ, e le winwlan le Mawuxo lɔ mɛ tun:« E nɔ wle onunywɛtɔye le ye tete we omɔ ɖiɖo mɛ.» ²⁰ Ye mɔ wlan ke tun :« Xwetɔ Mawu nyɔ tun onunywɛtɔye we susu mɔ hɔn nyi ounti.» ²¹ Iwɛ dɔn, ɛmɛti ni ka ɖe oji do ɛgbɛtɔ wu a do nyigo; ɖo onu bi wɛ nyi míatɔn. ²² Pɔlu o, Apolosu o, Sefasi o, nyixɔ lɔ ji o, ɛgbɛ o, oku o, egbe alɔ swe ke gbɔn nɔ o, bi seŋu wɛ nyi miatɔn. ²³ Vɔ miye mi nyi klisu tɔn; Klisu lɔ bo nyi Mawu tɔn;