¹ Noviye mì, bo tete can ke ko va mia kɔn bo na do va lɔ Mawu we onumakpɔndonaye na mi, ko hɔn zan oxogbe ke hugan wu mi, alo onunyinyɔ we oxogbe alɔkpa bu ɖe, bo do va lɔ oxo lɔ na mi. ² Ɖo, hwekenu ko le mia kɔn, ko sɔ ogbeta tun ko mɔ hɔn ba onu bu ti na nyɔ zɛ Yesu Klisi ke ye kan do otinsokpoli ji wu. ³ Iwɛ dɔn ko va mia kɔn hɔnhlɔn ti ma ɖo, kpodo vivɔ, bo titɔ nɔ. ⁴ E hɔn nyi onunyinyɔ ɛgbɛtɔ tɔn we oxo vivi lilɔ ye hwɛn ko do kplan onu wu mi, e ko nyi i ko do to Mawu we oxo na mi, vɔ Mawu we gbigbɔ wɛ ɖe onu sɔ xlɛ do gbɔn hɔnhlɔn etɔn mɛ. ⁵ Exin, xɔse miatɔn ko mɔ xlɔn onyi do ɛgbɛtɔ we onunyinyɔ ji nɔ, vɔ e mɔ xinnɔ onyi do Mawu we hɔnhlɔn ji. ⁶ E emɔ co ganke, onunyinyɔ ɖe wɛ mi kplan xɔsetɔ ke o hwɛn le xɔse mɛ ye nɔ. onunyinyɔ xin lɔ ko nyi ɛgbɛ mɛ bwɛ tɔn gbɔɔn do nyi ɛcɛkpatɔ ɖaxo ɛgbɛ mɛ bwɛ tɔnye ke Mawu na crɔn ye tɔn. ⁷ Vɔ Mawu we onunynyɔ wɛ mí jla nɔ, onumakpɔndona wɛ e nyi bo le hwihwla do ɛgbɛtɔye. Mawu sɔ-ɛ sɔ ɖo onyi xoxoxo gbɔxwe ɛgbɛ lɔ va jɔ, e mo do na mí gigo. ⁸ Ɛcɛkpatɔ ɖaxo ɛgbɛ mɛ bwɛ tɔn ye ti, hɔn nywɛ, ɖo na ye o do nywɛ wɛ, ye hɔn kan Xwetɔ gigo nɔ lɔ do otinsokpoli ji nɔ. ⁹ Vɔ e le winwlan le Mawuxo lɔ mɛ tun: « onu ke ŋukunsin hɔn kpɔn kpɔ́n gbeɖe, onu ke otó hɔn se kpɔn, onu ke ayixa ɛgbɛtɔ tɔn hɔn susu kpɔn, Mawu jra onu xin ɖo onyi na ɛmɛ ke yi owan ni-i ye.» ¹⁰ Míye wɛ Mawu ɖe onuhwihwla taŋu xin lɛye sɔ xlɛ, do gbɔn gbigbɔ lɔ ji. Ɖo gbigbɔ lɔ nɔ gbeje onu bi kpɔn, gbɔɔn do jɛ Mawu we onu hwihwlaye ji. ¹¹ Ɛmɛ nɛ lɛ nyɔ onu ke le ayixa mɛ na ɛgbɛtɔ na e hɔn nyi gbigbɔ etɔn ke i tete ŋutɔ mɛ? Emɔ ha ke, ɛmɛti hɔn nyɔ onu ke le Mawu ayixa mɛ, zɛgbɔn Mawu we gbigbɔ wu. ¹² Vɔ míye, mi hɔn yi ɛgbɛ mɛ bwɛ we gbigbɔ, gbigbɔ ke sɔn Mawu kɔn wɛ mi yi; exin, mi mɔ do nyɔ onu ke na Mawu na mí, do gbɔn ɛfɛnu etɔnye mɛ. ¹³ Na mi lɔ onu nina xinlɛye we oxo nɔ, mi hɔn nɔ zan oxogbe kena ɛgbɛye we onunyinyɔ nɔ kplan ɛmɛ, vɔ oxogbe kena Mawu we gbigbɔ lɔ nɔ kplan ɛmɛ, wɛ mi nɔ zan. E le emɔ, mí mɔ do sɔ gbigbɔ mɛ we oxogbeye a do ɖe gbigbɔ mɛ we onuye gɔnmɛ. ¹⁴ Vɔ ɛmɛ ke mɛ na gbigbɔ lɔ hɔn le, hɔn kpewu na yi onu ke sɔn Mawu we gbigbɔ kɔn, ɖo e le ɖi klenɔ we onuɖe ha le ŋumɛ ni-i, e ko kpewu na kpɔn oun jɛ e wu can, ɖo gbigbɔ lɔ wɛ nɔ na na ye nɔ do gbe-e kpɔn. ¹⁵ Ɛmɛ ke mɛ na gbigbɔ lɔ le, nɔ gbe onu ɖekpokpwe, vɔ ɛmɛti ko nɔ kpɔn onu jɛ e lɔ lɔ wu. ¹⁶ Ɖo winwlan lɔ tun: « ɛmɛ nɛ nyɔ Xwetɔ Mawu lɔ we susu? Ɛmɛ nɛ lɛ na kplan onu wu-i?» Vɔ míye susu klisi tɔn wɛ le mía nsi.