¹ Nɔviyee mì, ko hɔn tun mia nɔn manywɛ mɛ tun byo : Mía dagbwɔ ye bi wɛ zɔn zɔnlin le sunwɔ gɔ ye mɛ bi bo gbɔn ɛxu ve me vayi. ² E le ɖi Mawu we ɛsin wɛ ye lɛ na ye le sunwɔ kpo ɛxu kpo mɛ ha, na ye a do wasi ɖokpo kpodo Mɔyizi. ³ Gbigbɔ mɛ we onuɖuɖu ɖokpo ŋumyɔye wɛ ye'mɛ bi ɖu, ⁴ bo nu gbigbɔ mɛ we ɛsin ɖokpo ŋumyɔ, ɖo gbigbɔ we ɛkpɛn ɖaxo ke le ŋukɔn na ye lɔ we ɛsin we ye nu, ɛkpɛn ɖaxo lɔ bo bo nyi Klisi. ⁵ Ganke, ɛmɛ susu le ye'mɛ, ɛgbɛ yetɔnye ko jɛŋu na Mawu, iwɛ dɔn na ye do ku kplɛlɛlɛ le ɛgbɛfaa ji. ⁶ Onu xin lɛye jɔ, a do nyi kpɔndewu na míye, exin mí ko mɔ do ɖo ojro nyinyla nɔ ɖi kena ye lɛye ɖo ɖo ha. ⁷ Mi ka trɔzun yɛhwesɛntɔye ɖi kena ɛmɛɖeye wasi ɖo nɔ ha le yemɛ . Ɖi kena ye wlan ɖo le Mawu we oxo lɔ mɛ tun byo; « otogun lɔ xinnɔ-onyi, bo ɖu, bo nu, e xin godo ye site bo va yi da ɛgbɛ.» ⁸ Mi ká mɔ jo miaɖe do na ɛgbɛ ɖuɖyu zinzan ɖi kena ɛmɛ ɖeye wasi ɖo le yemɛ nɔ ha, e mɔ na na ɛgbɛtɔ akpo oko ŋukun atɔn (23000) ku le gbeɖokpo. ⁹ Mí ni ká tɛn Xwetɔ lɔ kpɔn di ke ɛmɛ ɖeye wasi ɖo le ye mɛ ha, odanye bo ɖu ye, ye bo ku. ¹⁰ Mí ni ka hlun le onu mɛ ɖi ke ɛmɛ ɖeye wasi le ye mɛ ɖo ha, ɛwɛndotɔ Mawu tɔn ke nɔ crɔn ɛmɛ bo crɔn ye . ¹¹ Onu xin lɛye jɔ do ye ji, a bo nyi kpɔndewu, ye bo wlan ye ɖo onyi na mí a do yi okplan, ɖo mí le ganxixo vivɔnu tɔnye mɛ. ¹² iwɛ dɔn ɛmɛ ke bu-i nɔ tun he mɔ le ote, ni cɔ eɖe, e ko mɔ jɛ onyi nɔ. ¹³ Tintɛnkpɔ ke mɛ na mi gbɔn ye, ɛgbɛtɔ we onuye jan e na nyi, ogbejinɔtɔ wɛ nyi Mawu. E hɔn omɔ na tintɛnkpɔn ke hugan hɔnhlɔn miatɔn o va mia ji nɔ. Le tintɛnkpɔ mɛ, e na na ayixxa ke mi na do tɔn le mɛ wu mi, kpo hɔnhlɔn ke mi na do do oji le e nu. ¹⁴ Iwɛ dɔn, ɛmɛ vivɛ tɛye, mi si na yɛhwe sinsɛn. ¹⁵ Ko lɔ oxo na mi ɖi ke ye nɔ lɔ oxo na onunywɛtɔ ye ɖo ha, miye teteye, mi gbeje oxo ke ko lɔ na mi nɔ kpɔn. ¹⁶ Dona we kɔfo ke ji na mí nɔ do ɛkpɛ do, okancica mɛ hwɛn mí nɔ do dyɛ kpo Klisi we ɛhun kpo wɛ? Kpɔnnɔ ke mí nɔ ma, ocancica mɛ hwɛn mi nɔ bo ɖyɛ kpo Klisi we agbaza lɔ wɛ? ¹⁷ Kena e nyi tun kpɔnnɔ ɖokpo gee wɛ le mí'mɛ bi mí su co bo trɔ zun agbaza ɖokpo gee, ɖo mí'mɛ bi nɔ ma kpɔnnɔ ɖokpo xin lɔ ɖu. ¹⁸ Mi kpɔn otogun Izrayɛli: ɛmɛ kena nɔ ɖu kanlin ke ye do san avɔye can hɔn ɖo mima le avɔsisan lɔ mɛ wɛ? ¹⁹ Oxo ɛnɛ lɛ ko lɔ? otinbocwɛ mɔ nyi onu ɖe wɛ? Alo onuɖuɖu ke ye do san nyi onu ɖe? ²⁰ Vɔ ko lɔ oxo do onu ke maxɔsetɔ ke hɔn nyi jwifuye, we avɔ ke ye nɔ san ye we oxo wɛ ko lɔ nɔ, gbigbo nyinylaye wɛ ye nɔ san yetɔn xinye na, e hɔn nyi Mawu hwɛn. Ko hɔn ba na mia ɖo okancica kpo gbigbɔ nyinyla ye tɔn! ²¹ Mi hɔn ɖo na nu le Xwetɔ lɔ we kɔfo mɛ a mɔ nu le a mɔ nu le gbigbɔ nyinyla we kɔfo mɛ; mi ko kpewu na ɖu Xwetɔ lɔ we onuɖuɖu nɔ a mɔ ɖu gbigbɔ nyinylaye tɔn nɔ. ²² Alo mi kan na Xwetɔ lɔ a mɔ jɛ ɛwu hwinhwan ji wɛ? Hɔnhlɔn le mia wu huga wu-i wɛ? ²³ « Nu bi we ogbe wɛ ye na-a,» vɔ onu bi sese hɔn wa onywɛ na ɛmɛ. «Ye ɖe ogbe na byo bo mɔ wa onu bi sese» vɔ onu bi hwɛn nɔ na ŋukɔn yiyi wu ɛmɛ. ²⁴ Ɛmɛɖe hɔn ɖo na nɔ ba i tete we ale. Vɔ ɛmɛ ɖokpo-ɖokpo ɖo na nɔ ba ɛmɛ ke axa ni-i we onywɛ. ²⁵ Onu ke ye sa nɔ le oxi mɛ ye bi, mi hɛn mi na ɖu, ke oji miatɔn hɔn ɖo na lɔ oxo ɖe d'ewu. ²⁶ Ɖo «nyidan kpo onu ke le e ji ye bi sese, mia we Xwetɔ tɔn wɛ ye nyi.» ²⁷ Na Maxɔsetɔ ɖe yɔ mi lɔ byo, miye mɔ va ɖu onu, mi bo jro na yi, onu ke e na na mi le blɛ ye bi mi ɖu. Oji miatɔn ni ká xo do onuɖuɖu ke ye xwle mi ye wu, na mi a kan oxo ɖe se d'ewu. ²⁸ Vɔ na ɛmɛ ɖe lɔ na mi byo: « Onuɖuɖu ke yɛhweye mwɛ ye mɔ do san avɔ na, mi ká ɖu, do ɛmɛ ke xo okpa na mi lɔ wu, exin oji mɛ mɔ vo. ²⁹ E hɔn nyi miye tete we oji mɛ we oxo hwɛn ko lɔ nɔ, ɛmɛ de ke xo okpa na mi lɔ we oxo wɛ ko lɔ nɔ. Ɛmɛ ɖe si jijɛ ke ko ɖo, onu nɛ na dɔn ɛmɛ butɔ na do va ɖo kojɔ ni-i nɔ le oji etɔn mɛ? ³⁰ Onu ke ko xo ɛɖɛ do eji bo ɖu nɔ, onu nɛ dɔn na ye na do lɔ oxo nyinyla alo a bo zun do onuɖuɖu xin ke we ota ko do ɛkpɛ do na Mawu lɔ wu? ³¹ Onu mi ɖu nɔ onu mi nu nɔ, onu ɖekpokpwe ke mi gbɛ wa bɔ, mi wasi bi a do na bubu wu Mawu. ³² Mi ko nyi afɔklɛnnu na jwifuye, ɛmɛ ke hɔn nyi jwifuye can, gbɔn a do nyi afɔklɛnnu na Mawu we agun lɔ. ³³ Ko sa'vɛ a do jɛŋu na ɛmɛ bi sese le onu bi sese mɛ. Ko hɔn nɔ ba bo ɖoɖyo we ale vɔ ko nɔ na na ɛmɛ susu a ɖu ale lɔ. Ko wasi emɔ nɔ na ɛmɛ a do kpɔn hlɛngan.