¹ Mi nɔ wa onu ɖi bo ha ɖi kena bo can ko wa onu ɖi kena Klisi nɔ wa onu ɖo ha. ² Syɛ ko kanfu mi, ɖo mi nɔ ɖoŋu do wu ye, bo nɔ flun le onu bi sese mɛ. Ko kan fu mi taŋu ɖo mi tɛ miaɖe do onu ke ko kplan mi ye wu, mi bo nɔ hɛn onukplanmɛ xinye wu ɖi kena ko kplan mi ɖo ha. ³ Syɛ ko jro mia nywɛ byo, Klisi wɛ mɔ nyi oga na ŋusugloye bin sese, ŋusuglo bo nyi oga na osyɔ, Mawu bo va nyi oga na Klisu. ⁴ Ŋusunglo ɖekpokpwe kena cɔn onu ota gan ke mɛ e xo ɛɖɛ nɔ alo e yi ɛwɛn sɔn Mawu ko nɔ, e hɔn ɖo bubu na oga etɔn. ⁵ Vɔ, nyɔn usi ɖekpokpwe kena xo ɛɖɛ nɔ alɔ e yi ɛwɛ sɔ Mawu kɔ nɔ, e ko bla'ta, e hɔn do bubu na oga etɔn. Ɖo e ci ɖi ɛmɛ ke ye xwlɛ dede na ha. ⁶ Ɖo na nyɔnusi ɖe hɔn kpewu na bla ota, e ɖo na kpa oɖa etɔn. Na enyi byo dede xwiwlɛ alo oɖa kpikpa nyi ŋunya na nyɔnusi bɛ ni bo bla ota etɔn ⁷ Ɖo ŋusunglo hɔn do na cɔn onu ota, ɖo e nyi Mawu ɖiɖe kpo gigo etɔn kpo. ⁸ Ɖo ŋusuglo hwɛn ye ɖe tɔn le nyɔnusi mɛ, vɔ, nyɔnusi wɛ ye ɖe tɔn le ŋusunglo mɛ ⁹ Emɔke, e hɔn nyɔnusi wutu hwɛn Mawu do wasi ŋusunglo, vɔ, ŋusunglo wɛ dɔn na Mawu do wasi nyɔnusi. ¹⁰ Exin wɛ dɔn na nyɔnusi ɖo na ɖo ɛcɛkpikpa we josi le iwe ota do ɛwɛndotɔ Mawu tɔnye wu. ¹¹ E le emɔ co ganke, le Xwetɔ lɔ mɛ, nyɔnusi ŋusunglo mɛvo, ŋusunglo ko le nyɔnusi mevo. ¹² Ɖo ke ye ɖe nyɔnusi tɔn le ŋusunglo mɛ ɖo, emɔhake, nyɔnusi wɛ nɔ ji ŋusunglo. onu bi bo sɔn Mawu kɔn. ¹³ Miye teteye mi gbeje kpɔn, bɛ enyɔn tun nyɔnusi na nɔ onu ɖe ma cɔn ota a do xɔ ɛɖɛ na Mawu nɔ? ¹⁴ Ɛgbɛ lɔ tete hɔ̀n ɖe xlɛ mi tun na oɖa gaga le ota na ŋunsunglo, nyɔ hwɛn e nɔ nyi ni-i wɛ? ¹⁵ Vɔ, na oɖa gaga le ota na nyɔnusi, yɛyi wɛ e nɔ nyi, ɖo ye ni-i oɖa, emɔ do cɔn ota ni-i. ¹⁶ Vɔ na ɛmɛɖe na dɔn onu do oxo ke lɔ wu, míye hɔn ɖo walɔ xin ha, agun Mawu tɔn can ko ɖo. ¹⁷ Oxo ke wu na ko na kɛ'nu do syɛ, ko hɔn kpewu na kanfun mi le emɛ, ɖo kple miatɔnye onunywɛ wɛ e ɖo na wa na mi, vɔ nyinla wɛ e nɔ va nyi na mi. ¹⁸ Tantyɛntɔn, ko se tun, na mi, va yi okple mima nɔ ɖyɛ mia mɛ, ko bo kan do oxo xin lɔ ji viɖe. ¹⁹ Enyɔ tun mima can a nɔ ɖyɛ mia mɛ, ye mɔ do ɛmɛ ke ogbe le oxojɔxo mɛ ye. ²⁰ Vɔ , na mi va yi okpli do kpɔkpɔ, exin lɔ hɔn mɔ nyi Xwetɔ lɔ we onuɖuɖu mi o ɖu nɔ. ²¹ Ɖo, gbɔɔn na mi na yi tɛnxo a do nu onu, ɛmɛ ɖokpo-ɖokpo nɔ hwlɛndo a do ɖu i tete ŋutɔ we onuɖuɖu, e bo nɔ na na hwekenu na xovɛ oci ɛmɛ ɖe nɔ, ɛmɛɖe o nɔ nu ahan a bo mu. ²² Bɛ mi hɔn ɖo oxwe ke gbe na mi na ɖu a bo nu le wɛ? Alo Mawu we agun lɔ hɔn ɖi onu ti na mi wɛ? Mi jro na do ŋunya ɛmɛ ke hɔn ɖo onuti ye wɛ? Oxo enɛ lɛ ko na lɔ na mi syɛ? Ma kanfun mi wɛ? Ko hɔn kanfun mi nɔ do exin lɔ wu nɔ kpɔn gbɛɖe. ²³ Le oxojɔxo mɛ, onu ke Xwetɔ lɔ kplan-a, bo can bo kplan mi, wɛ nyi tun: ozan ke mɛ na ye sɔ Xwetɔ Yesu sɔ jo le, e sɔ kpɔnɔ, ²⁴ i wɛ ke e do ɛkpɛ na Mawu vɔ e ma-a, bo lɔ tun byo: « e ke lɔ wɛ nyi agbaza teye ke nyi miatɔn, mi nɔ wasi ɖo eleha a nɔ flin-u. » ²⁵ Emɔhake, ke ye ɖu onu vɔ, e mɔ sɔ kɔfo ke mɛ na vɛn le lɔ, bo lɔ tun:«Vɛn ke lɔ wɛ nyi ocancica yoyo gbɔn ɛhun teye mɛ, ogan ɖekpokpwe ke mɛ na mi na nu-i nɔ, mi nɔ wasi ɖo eleha bo nɔ do ɖo'ŋu do wuye.» ²⁶ Ogan ɖe ɖekpokpwe ke mi ɖu kpɔnɔ lɔ nɔ, bo nu vɛn lɔ nɔ, mi o jra Xwetɔ lɔ we oku nɔ gbɔɔn do yi hwekenu na e na va vá. ²⁷ Iwɛ dɔn na ɛmɛɖe o ɖu Xwetɔ, lɔ we kpɔnnɔ lɔ nɔ, bo nu vɛn etɔn nɔ, vɔ e ko nyi ɛmɛ ke jɛ na ɖu alo na nu, e hu ɛhwɛ do agbaza kpo ɛhun Xwetɔ lɔ tɔn. ²⁸ Ɛmɛ ɖokpo-ɖokpo ni gbeje eɖe mɛ kpɔn nywɛɖe gbɔxwe a ɖu kpɔnnɔ lɔ a bo nu vɛn lɔ. ²⁹ Na ɛmɛɖe ɖu kpɔnnɔ lɔ nɔ bo nu vɛn lɔ nɔ, e ko nyɔ okancica ke le i kpɔ Xwetɔ lɔ we agbaza mɛ, e dɔn ɛhwɛ do okɔ na eɖe. ³⁰ Onu ke dɔn na hɔnhlɔn do dɛn ɛmɛ ɖeye, ɛmɛ ɖeye bo bɛ adɔn, ɛmɛ ɖeye bo ku le mia me xɛnxin. ³¹ Na mí gbeje miaɖe kpɔn, ye hɔn ɖɔ ɛhwɛ na mí nɔ. ³² Vɔ, na Xwetɔ lɔ nɔ ɖɔ na mí a bo kjɔ okɔ na mí, exin Mawu ko mɔ do do ɛhwɛ na míye kpo ɛgbɛ lɔ do kpɔkpɔ nɔ. ³³ Iwɛ dɔn nɔviyee mì, na mi kpli na do ɖu onu, mi nɔ trekpɔn mianɔnyɔye. ³⁴ Na xovɛ o ci ɛmɛɖe nɔ, ni ɖu'nu le oxwe etɔn gbe, exin mí ko mɔ do kple a bo do dɔn ɛhwɛ do okɔ na miaɖe nɔ. Ko na jra onu gbokpweye ɖo, le hwekenu na ko na va mia kɔn.