¹ Nɔviyee mì onu ke ka onunina gbigbɔ mɛ tɔnye we akpa xwe, ko hɔn na mia gɔn ye ma nyɔ. ² Mi nywɛ lɔ byo ganke mɛ mi maxɔsetɔye, dandan mɛ yɛhwe ke hɔn nɔ kɛ onu kɔn wɛ ye hwɛn ye nɔ kplɔ mi do yi le alɔkpa lɛye bi sese mɛ. ³ I wɛ dɔn ko do lɔ na mi nɔ na mia nywɛ byo ɛmɛ ɖekpokpwe ke mɛ gbigbɔ mimɛ Mawu tɔn o lɔ oxo gbɔn e mɛ nɔ hɔn kpewu na lɔ byo:«Yesu ahelu na we.» Ɛmɛti ko kpewu na lɔ byo: « Jesu mɔ nyi Xwetɔ» na gbigbɔ kinkwɛn hɔn lɔ gbɔn e mɛ. ⁴ Onunina vovweye wɛ le, vɔ gbigbɔ lɔ nyi ɖokpoŋumyɔ. ⁵ Odandɔnɛmɛ lɛye le vwevwe vɔ Xwetɔ ɖokpo ge wɛ le. ⁶ Odan wiwa le hamɛ-hamɛ vɔ, Mawu ɖokpo wɛ nɔ dɔn na odan xin lɛye nɔ wiwa. ⁷ Gbigbɔ lɔ nɔ ɖe hɔnhlɔn etɔn sɔ xlɛ le ɛmɛ ɖokpo-ɖokpo we gbɛzan mɛ, e mɔ do nyi ale na ɛmɛ bi sese. ⁸ Gbigbɔ lɔ nɔ na ɛmɛɖe nɔ lɔ oxo kpo onunyinywɛ, i ɖokpo lɔ mɔ nɔ ɛmɛɖe mɔ nɔ do onugɔnmɛ sise. ⁹ Gbigbɔ xin lɔ ɖokpo ke wɛ mɔ na xɔse titeŋugbe wu ɛmɛɖe, i ɖokpo mɔ nɔ na adɔn gigɔ we onunina wu ɛmɛɖe. ¹⁰ Gbigbɔ ɖokpo xin lɔ, nɔ na hɔnhlɔn wu ɛmɛɖe na ni a do wa ŋudandonu, a mɔ na wu'mɛɖe wɛ e nɔ nyi ɛwɛn yi le Mawu si tɔ. Gbigbɔ lɔ nɔ na onunyinyɔ ke nɔ nyɔ gbigbɔ ɖe do ovo na ɖe wu ɛmɛɖe, i ɖokpo lɔ mɔ nɔ na wɛ ɛmɛɖe nɔ do ogbe vovweye, e mɔ nɔ na wɛ ɛmɛɖeye nɔ tin ogbe lɛye mɛ. ¹¹ Vɔ gbigbɔ ɖokpo ge xin lɔ jan wɛ nɔ wa onu xin lɛye bi sese nɔ. Ke e jrwe ɖo we e nɔ na onunina vovwe xin lɛye ɛmɛ ɖokpo-ɖokpo. ¹² Ɖi kena ɛgbɛtɔ we agbaza nyi ɖokpo vɔ bo ɖo alɔklan susuye, ye le vovwe ganke bo nyi agbaza ɖokpo. Ke Klisi can le xɛn nyi xin. ¹³ Jwifu alo ɛmɛ ke hɔn jwifu, kannumyɔ o, ɛmɛ ke le eɖe si o, gbigbɔ ɖo xin lɔ wɛ ye do lɛ Mawu we ɛsin na mí 'mɛ bi sese, mí mɔ do nyi agbaza ɖokpo. Ɖo mí mɛ bi wɛ nu gbigbɔ ɖokpo lɔ. ¹⁴ Ɖo, alɔklan ɖokpo gee hwɛn wasi agbaza lɔ, vɔ, alɔklan susu wɛ. ¹⁵ Na afɔ gba byo: «ke he mɔ nyi alɔ», wɛ kɛ byo e mɔ nyi alɔklan agbaza tɔn we akpaxwe ɖe? ¹⁶ Na oto lɔ tun:« ke he mɔ nyi ŋukunsin, he mɔ hɔn nyi agbaza tɔn exin wɛ na ke byo e mɔ nyi agbaza lɔ we akpaxwe ɖe?» ¹⁷ Na e do nyi lɔ byo, agbaza lɔ bi sese mɔ nyi ŋukunsin naɖe ye na wa o do se onu? Na agbaza lo bi sese mɔ nyi, naɖe ye na wa ado sɔ'wan na onu? ¹⁸ Vɔ, Mawu ɖo alɔklan ɖokpo-ɖokpo do agbaza lɔ wu ɖi kena ejro ɖo ha. ¹⁹ Na alɔklan agbaza tɔn xin lɛye bi do nyi onu ɖokpo gee wɛ, fye ɛgbɛtɔ lɔ le? ²⁰ I wɛ dɔn, alɔklan susu wɛ vɔ, agbaza bo nyi onu ɖokpo gee. ²¹ Ŋukunsin hɔn kpewu na lɔ na alɔ byo he mɔ ɖo i we ohyan, ota ko kpewu na lɔ na afɔye byo, he mɔ do ohyan yetɔn. ²² Ke mɔ hugan exin agbaza we olɔklan ke ye nɔ kpɔn byo ye mɔ hɔn ɖo hɔnhlɔn ɖeye, exinye, mɔ nɔ le viɛɖe. ²³ Alɔklan keye na mí nɔ kpɔn byo ye mɔhɔn jɛ na ye na bubu susu wu ye, mí mɔ nɔ wle obyo na exin lɛye taŋu, e k'ye we nyikɔ ɛmɛɖe hɔn nɔ yawu yɔ vaŋu ye, ji wɛ mía we susuye nɔ nɔ taŋu. ²⁴ Iwɛ dɔn mí nɔ jo kena nyɔ kpinkpɔn ye do wenu. Vɔ Mawu kpli alɔklan agbaza tɔn lɛye do'kpɔ do na bubu susu wu kena bubu hwe do ye. ²⁵ E wasi emɔ exin kinklan ko mɔ do nɔ agbaza lɔ wu nɔ, vɔ, na alɔklan agbaza lɔ tɔn ye a do wlebyo na yeɖe ye. ²⁶ Exin, na olɔklan ɖe o se vivɛ nɔ, alɔklan gbokpweye bi sese mɔ do se vivɛ kpwe, kpɔkpɔ, alo na ye do bubu alɔklan ɖe wu alɔklan gbokpwe mɔ do kpɔn kpwe. ²⁷ Syɛ, agbaza Klisi tɔn wɛ mi nyi, ɖokpo-ɖokpo mia tɔn ye mɔ nyi i we alɔklan voɖe-voɖe. ²⁸ Mawu sɔ ɛmɛɖeye le agun etɔn mɛ, tantyɛntɔn wɛ nyi ɛmɛdindɔnye, owegɔ, oxolɔɖonyitɔye, atɔngɔ onukplanɛmɛtɔye, exin godo, ye na kpɔn ŋudandonuwatɔye, adɔngɔtɔye, alɔgɔ na ɛmɛ tɔ ye, ɛmɛkplɔtɔye, ogbe voɖe-voɖe do tɔ ye. ²⁹ Ɛmɛ bi sese wɛ nyi ɛmɛdindɔ́nye? Ɛmɛ bi wɛ nyi oxolɔɖonyitɔye? Yemɛ bi sese wɛ nyi onukplan ɛmɛ tɔye? Yemɛ bi sese wɛ nɔ wasi ŋudandonu? Yemɛ bi sese wɛ ɖo onunina ke nɔ gɔ adɔn? Yemɛ bi sese wɛ nɔ lɔ oxo alo wɛ nɔ do ogbe vovwe? Yemɛ bi sese wɛ nɔ tin ogbeye mɛ? ³⁰ Ye'mɛ bi sese wɛ ɖo onunina ke nɔ gɔ adɔn? Ye'mɛ bi sese wɛ nɔ lɔ oxo alɔ wɛ nɔ do ogbe voɖe-voɖe? Ye'mɛ bi sese wɛ nɔ tin ogbeye mɛ? ³¹ Mi ɖo akpakpa a bo ba onunina ɖaxo. Ko na xlɛ mi ninɔmɛ ke sɔgbe.