¹ Nɔviye ŋusunglo nyɔnusi, ɛwɛnnywɛ ke ko do na mi, ke mi yi-i, ke mi lido le'mɛ, ko flin na mi nɔ. ² Do gbɔn ɛwɛnnywɛ xin mɛ wɛ mi kpɔn hwlɛngan, na mi hɛn Mawuxo ke ko jra na mi lɔ sinsyɔn, exin tɔn din le'mɛ, bɛ xɔse miatɔn bo tɍɔ zun onu vɔvɔ. ³ Onu kena le vivɛɖe na ye kplan-a, bo can mɔ kplan mi jɛŋukɔn wɛ nyi byo: onunyi nyla miatɔnye wu wɛ Klisi ku do ɖi kena Mawuxo lɔ ɖo ha. ⁴ Ye ɖi-i onyihinhɔn atɔngɔ gbe e fɔn le ɛmɛ kukuye mɛ ɖi kena Mawuxo lɔ ɖo ha. ⁵ Exin godo e ze do ŋumɛ na Sefasi, mɔ ze do ŋumɛ na ye'mɛ weve lɛye. ⁶ Exin godo e va ze do ŋumɛ na nɔvi xɔsetɔ sandi atun (500) onu le'ji do'kpɔ, ɛmɛ xin lɛyɛ susu gbɛ le ɛgbɛ, su bo mɔ do ku. ⁷ Exin godo e mɔ va ze do ŋumɛ na Jaki, mɔ ze do ŋumɛ na ɛmɛdindɔn lɛye bi sese. ⁸ Le vivɔnu, e va ze do ŋumɛ na bo can, bo kena le ɖi ovi ke osun hɔn kpe na ha. ⁹ Ɖo, bo wɛ nyi ɛmɛ kpotwi le ɛmɛdindɔn lɛye mɛ, ko ko jɛ na ye na yɔ byo Mawu we ɛmɛdindɔn, ɖo ko ɖe ofun na Mawu agun lɔ. ¹⁰ Vɔ ɛfɛnu Mawu tɔn mɛ wɛ ko nyi ɛmɛ ke ko nyi egbe, ɛfɛnu Mawutɔn xin lɔ ko dokpo odan etɔn ma wa. Bo wɛ nyi ɛmɛ ke mɔ trɛ wa odan hugan ɛmɛ dindɔn lɛye bi sese, e ko mɔ nyi bo hwɛn wa odan lɔ can, ɛfɛnu Mawu tɔn kena le'kpɔ kpo wɛ. ¹¹ I wɛ dɔn bo wɛ o, ye wɛ o, Ɛwɛnnywɛ kean mi jra nɔ lɔ xɛn nyi xin, i wɛ miye can bo yi se. ¹² Syɛ, mí jra nɔ byo Klisi mɔ fɔn sɔn oku le ɛmɛkukuye mɛ zɔn ɖokpo. Onu nɛ dɔn na ɛmɛɖeye do le mia mɛ bo mɔ lɔ nɔ byo finfɔn sɔn oku mɔ hɔn le? ¹³ Na enyi byo fifɔn sɔn oku hɔn le, Klisi can hɔn fɔn sɔn oku bɛ enyi xin. ¹⁴ Na Klisi hɔn fɔn sɔn oku, bɛ oxo ke mí jra nɔ lɔ nyi onu vɔvɔ, mia wɛ xɔse can bo nyi onu vɔvɔ. ¹⁵ Ke mɔ bo do e wu wɛ nyi byo na ɛmɛ kukuye hɔn nɔ fɔn oxojɔxo, mi nyi kunnuɖetɔ Mawu tɔn ojokantɔye bɛ enyi xin, ɖo mí nɔ lɔ tun e mɔ fɔn Klisi lɔ, vɔ, e ko fɔn-ɛn. ¹⁶ Ɖo na ɛmɛkukuye hɔn nɔ fɔn, Klisi can hɔn fɔn hwɛn enyi xin. ¹⁷ Na Klisi hɔn fɔn mia we xɔse nyi onu vɔvɔ ɛhwɛ miatɔn bo gbɛ le okɔ na mi. ¹⁸ E le emɔ ɛmɛ ke xɔse bo ku le klisi me i can dɔn agba. ¹⁹ Na enyi lɔ byo ɛgbɛ ke mɛ kɛɖɛ wu jan wɛ omɔnukpinkpɔn míatɔn do le Klisi ji, ɛgbɛ míatɔn na ɖu adɔnu hugan ɛmɛ bi seseye tɔn. ²⁰ Vɔ, le oxojɔxo mɛ, Klisi fɔn sɔn oku, e fɔn do ŋukɔn na ɛmɛ kuku ke na va fɔnye. ²¹ Ɖi ke oku gbɔn ɛmɛ ɖokpo ji do va ɖo ha emɔ ke wɛ fɔnsɔnku can mɔ gbɔn ɛmɛ ɖokpo ji do va ɖo. ²² Ɖi kena ɛmɛ bi sese gbɔn Adamu ji do ku ɖo, emɔ ke wɛ ɛmɛ bi sese ke xɔseye kpɔn ɛgbɛ gbɔn Klisi ji ɖo, ²³ vɔ, ɛmɛ ɖokpo-ɖokpo kpo iwe tɛnmɛ. Jɛŋukɔn, Klisi ke nyi ɛmɛ tantyɛn tɔn ke fɔn sɔn oku lɔ, bo do e wu ɛmɛ ke nyi e tɔnye mɔ na mɔ fɔn va ɛgbɛ le ganke mɛ na i tete Klisi na lɛkɔ va. ²⁴ Exin godo, na Klisi lɔ vɔ okun na oga ɖuɖu ɖekpokpwe, ɛcɛkpikpa ɖekpokpwe, kpo gbigbɔ mɛ we hɔnhlɔn nyinnla ɖekpokpwe, bo sɔ xɔluɖuto lɔ sɔ do asi na Mawu otɔ lɔ vɔ, vivɔnu mɔ va. ²⁵ Ɖo Klisi ɖo na ɖu xɔlu nɔ kaka gbɔɔn Mawu mɔ Klisi lɔ we kɛntɔye do i we afɔ gɔ. ²⁶ Kɛntɔ kpɔtwi kena e na vɔ okun na wɛ nyi oku. ²⁷ Ɖo le oxojɔxo mɛ « Mawu sɔ onu bi sese ɖo Klisi we afɔ gɔ.» Na ye byo « onu bi sese» e hɔn nyi byo Mawu ke sɔ onu bi sese do Klisi we ɛcɛ, Mawu lɔ tete mɔ le Klisi we ɛcɛ gɔ hwɛn. ²⁸ Ganke mɛ na Klisi lɔ na sɔ onu bi sese sɔ do otɔ Mawu we ɛcɛ gɔ, gan xin mɛ wɛ ovi lɔ tete na hwe eɖe na Mawu ke sɔ onu bi sese sɔ ɖo asi ni lɔ, Mawu mɔ do onu bi sese na ɛmɛ bi sese. ²⁹ Mí na kpɔn onu do ɛmɛ ke nɔ le Mawu we ́ɛsin do ɛmɛ kukuye we domeye wu; na ɛmɛ kukuye hɔn nɔ va fɔn xonugbo, onu nɛ wu ɛmɛ ke nɔ wa ɛmɔ o ɖoŋu do nɔ? Onu nɛ dɔn ye nɔ lɛ Mawu we ɛsin do ɛmɛ ke ku xin lɛye we do mɛ? ³⁰ Míye can ɖe onu nɛ dɔn mí nɔ kpe afɔku nɔ hweɖekpokpwe nu? ³¹ Ŋukɔn ɖiɖe ɖokpo tɛgbe oku nɔ le a xa na, le oxojoxo me, nɔvi ŋusunglo nyɔnusi, miye wɛ nyi jijwɛ tɛye le mía xwetɔ yesu Klisi mɛ. ³² Na enyi byo ɛmɛ kukuye hɔn nɔ fɔn, mía gbɔjwɛ wa'nu le ɖi kena oxo ke lɔ ɖo ha: « mía ɖu, a bo nu, ɖo swɛ mí ba ku nɔ.» Na e do nyi byo ɛgbɛtɔ we onu kpikpɔn mɛ wɛ ɛvu kean ko xɔ kpaŋukɔn ogbe me we olanye le efɛzu, ale nɛ lɛ e na tɔn na? ³³ Mi ko ble mi koo blɛ miaɖe ɖu: «ohadido kpo hagbɛ nyinyla ye, walɔ nywɛ wɛ e nɔ hɛn gu.» ³⁴ Mi trɔ ɖyɛ miaɖe mɛ nywɛɖe! a bo zan ɛgbɛ jijwɛ! Mi ko ɖo ŋukɔn yiyi le onunyinyla wiwa mɛ ó. Ɖo ɛmɛɖe le mia mɛ ye hɔn fiti tete na Mawu. Ko lɔ oxo xinye nɔ ŋunya a do wa mi. ³⁵ Vɔ ɛmɛɖe hɛn e na kanse tun lɔ byo naɖe lɛ ɛmɛ kuku lɛye na fɔn do jaa? Agbaza nɛ mɛ lɛ ye na trɔ va le ja? ³⁶ Mi dan nu-i ! onu ke oxwa ku hwɛn e nɔ ku gbɔxwe nɔ va wu? ³⁷ Ejinukun kena o sɔ do ogun mɛ lɔ, e hɔn nyi nukun lɔ hwɛn nɔ ɖe otin lɔ we ninɔmɛ ke na va ɖo lɔ sɔ xlɛ wɛ, yɛvo a lɔ onukun ɖekpokpwe. ³⁸ Exin godo Mawu nɔ na ninɔmɛ ke jlwe wu ɛjinukun ɖokpo-ɖokpo kpo ninɔmɛ ke e na va ɖo lɔ kpo. ³⁹ Agbazaye bi hɔn nyi onu ɖokpo ŋumyɔye, ɛgbɛtɔ we agbaza gbɔn ovo, kanlinye tɔn bo gbɔn ovo, oxɛyetɔn bo gbɔn ovo, ohweyetɔn can bo gbɔn ovo. ⁴⁰ Jiŋukunsi we gbaza ye le, nyidan ji tɔnye can bo le. Ke Jiŋukunsi we onuye we gbaza nɔ klɛn ɖo, e gbɔn ovo na nyidan ji tɔnye. ⁴¹ Hwe we kinklɛn gbɔn ovo, osun tɔn can gbɔn ovo, sunhweviye tɔn can bo gbɔn ovo. le sunhweviye lɛye mɛ can ɖokpo-ɖokpo yetɔn we kinklɛn mɔ gbɔn ovo. ⁴² Emɔhake wɛ e le na ɛmɛ kukuye we fɔnsɔnku. onu nyinyɔ̀ we agbaza lɔ nyi, ganke mɛ ye do-e ogun mɛ, vɔ, onu manyɔ̀-manyɔ̀ we e na yi ganke me e na fɔn sɔn oku. ⁴³ Onu manyɔkpɔn wɛ agbaza lɔ nyi ganke mɛ ye do-e ogun mɛ, vɔ, e bo na va nyɔ kpinkpɔn le ganke mɛ na e na fɔn sɔn oku. Hɔnhlɔn din-ɛ le ganke ye do-e ogun mɛ, vɔ, hɔnhlɔn bo na va nɔ ewu taŋu le ganke mɛ'na fɔn. ⁴⁴ Ɛgbɛ ke we agbaza we enyi do yi ogun mɛ, vɔ, gbigbɔ mɛ we agbaza wɛ e na ɖo a do fɔn ⁴⁵ I wɛ dɔn, e le winwlan le Mawuxo mɛ byo: «Adamu gbɛtɔ tantyen tɔn lɔ nyi ɛmɛ ke le ɛgbɛ.» Vɔ Adamu kpotwi lɔ nyi gbigbɔ ke nɔ na ɛgbɛ. ⁴⁶ Vɔ, e hɔn gbigbɔ mɛ tɔn lɔ, hwɛn va jɛŋukɔn, vɔ ɛgbɛ mɛ bwɛ tɔn lɔ wɛ jɛŋukɔn gbɔxwe gbigbɔ mɛ tɔn lɔ va do e wu. ⁴⁷ Ɛgbetɔ tantyɛn tɔn ke ye wasi lɔ nyidan ji tɔn we enyi, ɛgbɛtɔ owegɔ lɔ, sɛxwe wɛ e lɔ sɔn. ⁴⁸ Kena ɛmɛ ke ye sɔ okɔ do wasi lɔ le, ke wɛ ɛmɛ kena le nyidan ji lɔ le. Ɛmɛ kena le sɛxweye bo le ɖi ɛmɛ ke sɔn sɛxwe lɔ ha. ⁴⁹ Ɖi kena mí ɖo ɛmɛ ke ye sɔ okɔ do wasi lɔ we ninɔmɛ ɖo ha ke wɛ mí na va ɖo ɛmɛ ke sɔn sɛxwe we ninɔmɛ ɖo. ⁵⁰ Nɔviyee mi, oxo ke ko lɔ nɔ lɔ, wɛ nyi byo, agbaza kpo ɛhun kpo hɔn kpewu na ɖo mima le Mawu we xɔluɖuɖu mɛ, onu ke nɔ nyɔ hɔn kpewu na nyi onu ke hɔn nɔ nyɔ. ⁵¹ Ma lɔ onu budo ɖe na mi, mi'mɛ bi sese hɔn ku nɔ, vɔ, ye bo na ɖoli mi'mɛ bi sese we ninɔmɛ. ⁵² Le ŋuɖagba xixò ɖokpo mɛ, ganke mɛ na okpɛn kpotwi lɔ na ɖi. Ɖo okpɛn lɔ na ɖi, ɛmɛkukuye mɔ fɔn, a bo nyi onu manyɔ̀-manyɔ̀, exin ye mɔ ɖoli míye can we ninɔmɛ. ⁵³ E le dandan mɛ byo gbaza kena nɔ nyɔ̀ ke lɔ a sɔ agbaza ke hɔn nɔ nyɔ sɔ do, agbaza ke nɔ ku lɔ mɔ sɔ agbza ke hɔn nɔ ku sɔ do. ⁵⁴ Hwekenuna gbaza ke nɔ nyɔ̀ lɔ na sɔ agbza ke hɔn nɔ nyɔ̀ lɔ sɔ do, gbaza ke nɔ ku na sɔ agbaza ke hɔn nɔ ku sɔ do, hwexinnu we oxo kena ye wlan lɔ na cɛ. Ye wlan byo: «Ye vɔ'kun na oku gbidi-gbidi ojiɖuɖu lɔ bo le blebu.» ⁵⁵ «Oku fye lɛ ojiɖuɖu tɔwe lɔ le? oku fye le ogan onu tintrɔn kena o nɔ do hu ɛmɛ lɔ le?» ⁵⁶ Oku we ogan onutintrɔn xin lɔ wɛ nyi onunyinyla wiwa, onunyinyla we hɔnhlɔn bo tɔn sɔn osɛn lɔ mɛ. ⁵⁷ Vɔ ɛkpɛ na Mawu ke na mí ojiɖuɖu do gbɔn mía we xwetɔ Yesu Klisi ji. ⁵⁸ I wɛ dɔn nɔvi vivɛ́ teye, mi nɔ ote gliŋu, a bo lido, a bo bi'zo do xwetɔ lɔ we odan d'eji, mi mɔ nywɛ byo odan ke mi wa na Xwetɔ lɔ nɔ, mɔ hɔn vɔvɔ nɔ gbeɖe.