¹ Le onunina do gɔ alɔ xɔsetɔ gbokpweye we akpa xwe, miye can mi wasi ɖi oxo ke ko lɔ na agun kena le Galati ye ha. ² Azan tantyɛn ke le kwɛsiɖa ɖokpo mɛ tɛgbɛ, onu kena ɛmɛ ɖokpo-ɖokpo kpɔn ni sɔ ɖo ovo le oxwe etɔn gbe, exin, ye ko do nɔ'te kpɔn viva tɛte nɔ gbɔxwe a gbo jɔ onu nina lɛye nɔ. ³ Hwekenuna ko na va mia kɔn, ɛmɛ ke mi na can ye, ko na wlan xemaye do asi na ye, ye mɔ do sɔ mia we onuninaye ve na le Jeruzalɛmu. ⁴ Na e va hyan byo bo tete can a yi, bo kpo ye kpo mɔ yi. ⁵ Ko na va mia kɔn, a bo gbɔn Masedwanu do va, ɖo, blɛ lɔ wɛ ko ba gbɔn nɔ a do va. ⁶ Tanyɔ ko mɔ nɔ miakɔn viɖe, ko mɔ tɛnwu mɔ nɔ mia kɔn le vivɔ we osun lɔ bi sese mɛ, exin mi mɔ gɔ alɔ na-a na, ma do yi ofi kena ko ba yi nɔ. ⁷ Ɖo ko hɔn ba tun ma va kpɔn mi ceŋu a bo sɔn; vɔ Xwetɔ lɔ yi ogbe ko mɔ nɔ miakɔn viɖe. ⁸ Vɔ, ko na nɔ Ɛfɛzu gbɔɔn na pɛntekotu hwenu; ⁹ ɖo omɔ ɖaxo ɖe hun na vɔ kɛntɔye bo su do-o. ¹⁰ Na timɔte va, jɛ gbagba na ayixa me a vo ni-i le mia mɛ, ɖo, e wa Xwetɔ lɔ we odan nɔ ɖi kena bo can ko wasi-i nɔ ɖo ha. ¹¹ Ɛmɛti ni bo ká do ovwɛ wu-i. Mi gɔ alɔ ni-i, e mɔ do gbɔn va kɔn ye le fifa mɛ, ɖo ko lo trekpɔn i kpo nɔvi xɔsetɔ lɛye nɔ. ¹² Vɔ mia nɔvyɔ Apolosu we akpaxwe, ko jɛ gbagba bo do akpakpa lanmɛ ni-i na yi kpo nɔvi xɔsetɔ leye a mɔ va mia kɔn, vɔ, e hɔn ba na yi syɛ kwinɖokpo. Vɔ e na va le hwekenu na nyɔ. ¹³ Mi nɔ ŋuzɔn, a bo nɔ ote le xɔse me a bo nyi ŋusunglo glegbenu a bo syɛnxu. ¹⁴ Mi wasi onu bi sese le owanyiyi mɛ. ¹⁵ Nɔnviyee mi onu ɖokpo le, na ko mɔ byɔ mi nɔ: mi nywɛ byo Sitefanasi kpo hwɛndo e tɔn kpo wɛ nyi ɛmɛ tantyɛn tɔn ke trɔ ji me le Akayi ye. Ye bo sɔ yeɖe sɔ na do nɔvi xɔsetɔye we ota mɛ, bo nɔ sɔ odan na ye. Mi sɔ miaɖe hwe na ɛmɛ xin ha ye, ¹⁶ kpo ɛmɛ ɖekpokpwe ke na jɛ gbagba bo wa odan kpo mí nɔ ye. ¹⁷ Ko kpɔn jijwɛ do viva Sitefanasi tɔn wu, fɔtunatusi kpo Acayikusi. Ye tu odo miatɔn jijɛ we ogun na mí. ¹⁸ Ɖo ye hen ayixa teye kpo miatɔn kpo jɛ ɛmɛ. Exinwutu, mi ɖo na kanfun ɛmɛ xinha ye na odan ke ye wa nɔ. ¹⁹ Agun Azi tɔnye do ogbe na mi. Akilasi, plisili kpo agunvi ke na nɔ kple le oxwe yetɔn gbeye do ogbe ɖodan mi vivɛ ɖe le Xwetɔ lɔ mɛ. ²⁰ Nɔvi xɔsetɔye bi sese do ogbe ɖodan mi. Mi do ogbe na miaɖeye a bo kisi na miaɖeye ɖi nɔvi le xɔse mɛ ha. ²¹ Bo tete Pɔlu wɛ wlan onu k'ye kpo alɔ tɛye kpo. ²² Na ɛmɛɖe hɔn yi owan na Xwetɔ míatɔn, onudonɔ wɛ enyi! Mía Xwetɔ va! ²³ Xwetɔ Yesu we ɛfɛnu ni nɔ kpo mi! ²⁴ Owanyiyi tɛye ni nɔ kpo mi'mɛ bi sese.