¹ Mi ɖo ŋukɔn yiyi le wanyiyi mɛ a mɔ ɖo bibi do gbigbɔ mɛ we onunina ye wu, mi mɔ do ɖo oxolɔɖonyi we onunina ye le taji. ² Ɖo ɛmɛ ke o do ogbe nɔ hɔn lɔ xo na ɛgbɛtɔye nɔ, vɔ Mawu wɛ e lɔ oxo na nɔ. ɛmɛti hɔn nɔ kpɔn onu jɛ e wu, onuhwihwla ke ɛyɛ mɛ le gbigbɔ mɛ ye xo wɛ ye lɔ nɔ. ³ Vɔ ɛmɛ ke na lɔ oxo do mí ɛmɛ ɛgbɛtɔye wɛ e lɔ na nɔ ye mɔ do hwɛn a mɔ ɖo oji dido kpo okɔn fifa. ⁴ Ɛmɛ ke na do ogbe voɖe-voɖe nɔ i tete wɛ e do do hɔnhlɔn le xɔse mɛ nɔ, vɔ ɛmɛ kena lɔ oxoɖonyi nɔ, agun Mawu tɔn lɔ bi sese wɛ e do do hɔnhlɔn le xɔse mɛ nɔ. ⁵ Syɛ ko jlo byo mi a do ogbe voɖe-voɖe. Ke mɔ hugan exin wɛ nyi byo: mi ɖo na nɔ lɔ oxoɖonyi. Ɛmɛ ke nɔ yi oxo le Mawu kɔn nɔn lɔ ɖo'nyi ye, mɔ le ŋukɔn taŋu na ɛmɛ ke nɔ do ogbe voɖe-voɖe, ( na ɛmɛɖe ve le agun lɔ mɛ; bo na kpewu tin ogbe lɔ mɛ, na agun lɔ a do hwɛn le xɔse mɛ jan wɛ e na nyi). ⁶ Nɔvye xɔse tɔn ŋusunglo nyɔnusi, na enyi byo ko va mia kɔn, i wɛ ko do ogbe voɖe-voɖe nɔ onu nɛ exin lɔ na wa na mi? Ko hɔn kpewu, vɔ na ma mɔ ɖe onuhwihwla ke Mawu sɔ xlɔ-ɔ ye mɛ na mi wɛ, ma onunyinyɔye we oxo na mi wɛ, na ma yi ɛwɛn le Mawu kɔn a bo do na mi wɛ a lo ma mɔ kplan onu wu mi. ⁷ Ɖi kena e le na kpete kpo onuxonu okannɔ ɖo ha. Na ogbe yetɔnye we ɖiɖi hɔn gbɔn'vo, naɖe ye na wa a do nyɔ onu kena kpete a lɔ onuxonu lɔ tun nɔ? ⁸ Na ye hɔn se onu kena ahwankpɛn lɔ o tun nɔ ceɖe-ceɖe, ɛmɛ enɛ lɛ na sɔ ahwanfunnu? ⁹ Ke e le na miye teteye can xɛnxin, na ɛmɛye hɔn se ogbe kena mi do nɔ lɔ, naɖe ye na wa a do nyɔ oxo kena mi lɔ nɔ? Mi na lɔ oxo nɔ vɔ ɛmɛti ko kpewu ba se onujɛ oxo ke mi lɔ nɔ lɔ mɛ nɔ. ¹⁰ Ogbe susu gbagbagba wɛ le ɛgbɛ ke lɔ blebu mɛ vɔ, ti ko dokpo gɔnmɛ sise ma ɖo. ¹¹ Vɔ na ɛmɛɖe sɔ ogbe xin lɛye we ɖokpo do lɔ oxo na nɔ, ko se ogbe xin lɔ, ko na le ɖi jonɔ ha na ɛmɛ kena lɔ oxo na nɔ lɔ. I can mɔ le ɖi jonɔ ha na bo can. ¹² K'e le na miye can xɛnxin. Ɖo, ke enyi byo, mi ba gbigbɔ mimɛ we onu wiwa kpo gbigbɔ mɛ we onuninaye nɔ do yiya mɛ, mi ba ni a su le mia si na agun lɔ we hwinhwɛn le xɔse mɛ. ¹³ I wɛ dɔn ɛmɛ ke nɔ xo ɛɖɛ do ogbe voɖe-voɖe mɛ, e xo, e mɔ tin e mɛ. ¹⁴ Ɖo na ko xo ɛɖɛ do'gbe voɖe-voɖeye mɛ nɔ bo we gbigbɔ can nɔ xo ɛɖɛ nɔ, vɔ bo we onunyinyɔ hɔn nɔ kpewu onuti wu le ogan xin mɛ. ¹⁵ Naɖe ko na hɛn ɖo? E le emɔ ko nɔ xo ɛɖɛ kpo bowe gbigbɔ a bo ji ohan kpo bowe onunyinywɛ. ¹⁶ Ɖo na enyi byo o xo ɛɖɛ nɔ alo o kanfu Mawu nɔ do'han mɛ, le gbigbɔ mɛ ɖoɖyo nɔ, naɖe ɛmɛ ke le blɛ ye ko se onu kena o tunnɔye, naɖe e na wa a bo do tun ami; alo a bo yi ohan na we, ke ye hɔn kpɔn onu jɛ onuke mi tun nɔ ye wu. ¹⁷ Ɛkpɛ ke o do na Mawu nɔ nyɔ taŋu vɔ, e hɔn kpedo ɛmɛ ɖyɔ wu ni a do hwɛn le xɔse. ¹⁸ Ko d'ɛkpɛ na Mawu lɔ byo ko mɔ nɔ do'gbe voɖe-voɖe hu mimɛ bi sese, ¹⁹ vɔ le agun mɛ e hɔn nyɔ byo na-a ma mɔ zan oxogbeye atun a mɔ do kplan onu ɛmɛye ke we gɔnmɛ ɛmɛye na se a do kplan onu wu ye, hugan ma do ogbe voɖe-voɖe owo ( 10.000) ²⁰ Nɔvi xɔsetɔ ŋusunglo nyɔnusi ká nyi vikpɛvyu le onusise mɛ. Vɔ, le ɛhwɛ huhu we akpaxwe, mi ci ɖi vife ha. Vɔ le mia we susuye mɛ, mi mɔ nyi ɛmɛhyɔn. ²¹ E le winwlan le osɛn lɔ mɛ byo: «Xwetɔ Mawu m'ɛ mɔ lɔ oxo ke, byo: gbɔn ɛmɛ ke nɔ do ogbe bubuye ji wɛ ko na gbɔn a do lɔ'xo na otogun ke ogbe jonɔye ji wɛ ko na gbɔn a do lɔ oxo. Ganke, ye ko ba xu'to wu nɔ.» ²² Exinwutu, ogbe voɖe-voɖe dido hɔn nyi josido ɖe na xɔsetɔye, vɔ maxɔsetɔye wɛ e nyi josido na. Ɛwɛ yi le Mawu nu a bo do alo oxolɔɖonyi ko nyi josido ɖe na maxɔsetɔ, vɔ xɔsetɔye wɛ e nyi na. ²³ Na agun lɔ bi sese kpli, bo xo ɛɖɛ nɔ, ɛmɛ bi sese bo mɔ do ogbe voɖe-voɖeye nɔ, naɖe ɛmɛ kpaaye alo maxɔsetɔye va ɖyɛ mia mɛ ɖe, ye hɔn na lɔ byo mi mɔ bɛ oha wɛ? ²⁴ Vɔ na mi'mɛ bi sese yi oxo le Mawu si bo lɔ ɖo onyi nɔ, na ɛmɛ kpaaye alo maxɔsetɔye va ɖyɛ mia mɛ, oxo kena mi lɔ nɔ na ɖe i we onunyinywɛ ke me e le ye sɔxlɛ-ɛ byo e mɔ le onunyinyla mɛ, mi'mɛ bi sese we oxo mɔ do ɛhwɛ wi-i. ²⁵ Exin, onu hwihwla ke le oji mɛ ni-i ye mɔ jɛ agbaŋugba e mɔ cɔn ŋumɛ onyi a bo sɛn Mawu, a bo lɔ byo Mawu mɔ le mia mɛ oxojɔxo. ²⁶ Syɛ, nɔviyee mi onu nɛ mi nan wa hin? Na enyi byo, mi kpli, ohan wɛ ɛmɛɖe ɖo na ji, onupklan-ɛmɛ ɖe wɛ, onuɖexlɛ-ɛmɛ Mawutɔn ɖe wɛ ɛmɛɖe kpɔɔn, ogbe voɖe-voɖeye wɛ'mɛɖe ba do nɔ, alo atin ogbe xin lɛye mɛ, mi wasi onu xin lɛye bi sese na agun lɔ do hwɛn le xɔse mɛ. ²⁷ Na ye do'gbe voɖe-voɖeye wɛ, ɛmɛ owe alo na ye su din, ye mɔ nyi ɛmɛ atɔn, ye mɔ nyi ɛmɛ mɔ do nyi ɛmɛɖe wu ɛmɛɖe mɔ tin ɛmɛ. ²⁸ Na ɛmɛ ke na tin ɛmɛ hɔn le, ni bo nɔ nubɔnyi le agun mɛ. Ɛmɛ kena nyi ogbe voɖe-voɖe do tɔ xin lɔ ni do na i tete, amɔ do na Mawu. ²⁹ Ɛmɛ ke nyi oxolɔɖonyitɔye, na ye ɛmɛ owe alo atɔn o lɔ oxo nɔ, ye'mɛ gbokpweye mɔ kije oxo lɛye mɛ. ³⁰ Na ɛmɛ ke le onyixinxlɔn le blɛ ye ɖe yi oxo le Mawu kɔn na lɔ ɖo'nyi, na ogbe voɖe-voɖe do tɔ kena lɔ'xo nɔ sa ni bɔ onu a bo ɖo oxo kena e lɔ nɔ te. ³¹ Le oxonugbo mɛ, mi'mɛ bi sese hɛn mi na lɔ oxoɖonyi fɛɛ, mɛjijɛ-mɛjijɛ, exin ɛmɛ bi sese mɔ do yi okplan sɔn ɛmɛ a bo do ɖo akɔnkpinkpan. ³² Ɖo oxolɔɖonyitɔye gbigbɔ kena nɔ zan ye, gbigbɔ xin lɛye le ɛcɛ yetɔn gɔ. ³³ Ɖo Mawu hɔn nyi onu hannya-hannya wiwa we Mawu, vɔ, Mawu fifa nɔ wɛ enyi. ³⁴ Nyɔnusiye ɖo na nɔ bɔ onu le agun mɛ. Doo ye hɔn na ɛcɛ wu ye byo ye mɔɔ nɔ lɔ oxo le agun mɛ, vɔ, ye ni nɔ sɔ yeɖeye sɔ hwe ɖi kena osɛn lɔ lɔ ɖo ha. ³⁵ Na ye ba na se onuɖe we tinmɛ ye ni kanse, ye swɔye le hwegbe. Ɖo e hɔn nyɔ na nyɔnusi a lɔ oxo nɔ le agun mɛ. ³⁶ Miye kɔn wɛ Mawu lɔ jɔ sɔn? Alo miye ɖoɖyo wɛ e va na? ³⁷ Na ɛmɛɖe ɖo kandeji byo he mɔ nyi oxolɔɖonyitɔ, alo he mɔ le gbigbɔ Mawu tɔn mɛ le okancica mɛ kpo Mawu, ni nywɛ byo onu kena ko wlan ye, Xwetɔ Mawu we osɛn mɔ-ɛ. ³⁸ Ɛmɛ kena do'vwɛ ni-i,ye mɔ do ovwɛ i can. ³⁹ E le'mɔ nɔnviyee mi, mi ba oxolɔɖonyi lɔ titeŋugbe, mi ko na tu omɔ na ɛmɛ ke ba na lɔ oxo do ogbe voɖe-voɖe mɛ ye. ⁴⁰ Vɔ mi wasi onu bi sese nywɛɖe kpo tito kpo.