¹ Bwoona,yambulani gu difanigisa mu mandaga ma Kidishidu,haa hangani biana bifanagani.Mu gu gonda guyindudila kega mu gu hanga bipaa bi hanga mafwii mu gugwigila gwedi Nzambi, ² mu mbundu ye mu mambodiga mu gusaa baadu mioogu,mu gushamugisa ba mvumbi,ye mu gu ginga gu sambisama gu tsuga. ³ Bu du hanga kega mapandi mbi Nzambi ba ghani ndjila. ⁴ Mudiambu gwedi pashi mbi bana ba gadi mu mbala yi moshi mutsemu,ba lodi mabu ma mpeve yi yilu,bana ba gadi tegu ba luzolu muhungu wu gedila, ⁵ ye lodi mandaga ma pimbu ma Nzambi ye mu ngolu dji mamvula ma gwitsa, ⁶ haa bana ba bwii;gwedi pashi mu gu bavudula mu gu humuna.Buna mudiambu baa ba vududi kega mwaana Nzambi ye kulundji,gwedi ndi mapandi masooni mu misu ma baadu. ⁷ Bwoona manu ma sendaga mvula yi bwaga gosu dangu mweedi maa ye mabundaga kuna,bi fwunu gwedi bana ba balumunaga,ba sendaga masagumunu magadugaga gwedi Nzambi. ⁸ Haa mbi ma ba buda ngangu ye kugu loo medi fwunu,ye ba gwenda mu gusenda mashinzamu.Matsuga mu gu ma saa mbaa. ⁹ Shi du yagulaga bwoobu mbi:bapangi ,dwedi baana ba shi swidila mupandi mapimbu ma Nzambi. ¹⁰ Mudiambu Nzambi loo gedi gindungi mu bila mahanga ma binu ye luzolu lu luleshi mu giguma gi djina diandi,mbi lwedi ba ngungudi ye gu lenda ye gu mu hangila. ¹¹ Ye gu zola gu pidu gu neeni mbi mu kadi ga binu wu moshi wu moshi ga gala ye gidimbu gi gu ganga mbundu tii gu tsuga,mudiambu ye lugwigilu lu hwaa yula ye gudi hana. ¹² Pidu loo du zodi mbi luguma ba moolu,haa bwoona,mbi lu galaga balongi ba bana ba fani gusenda latshi mu giguma gi gugwigila ye gu ganga mbundu. ¹³ Bwoona dangu Nzambi ga hani latshi gwedi Abalayamu,ga shidi gwedi ndi,mudiambu loo gwedi shi muudu wu moshi wu fani shila wu mu ludi ndi mu bu neeni. ¹⁴ Ndi ga yagudi mbi:bu yi gusagumuna gu gigidi,yi budisa gu luda giganda giaagu gineena. ¹⁵ Bwoona,Abalayamu ga sendi mana ma ba mulagi gungoyu guyuga ye kangidi yi mbundu. ¹⁶ Mudiambu muudu ga fani shila gwedi wu moshi wuna wedi muneeni gu luda ndi,gu tsuga gu gunwanagana wu moshi wu moshi,lushilu lwedi gidimbu gi gumonisama. ¹⁷ Dangu di saa Nzambi lushilu lu gu lesa gibeni gwedi bana ba fani bana ba swegami,bana fani gonda soba nga bwedi lushilu lwandi,ga ba shi gidimbu. ¹⁸ Bu ga bihangi gu tsuga,mu bima bioodi bi fagani(mu giguma giana gwedi pashi mbi Nzambi ga guhuna)pidu bana dwedi mu gu hululuga,du galani gigesa gingi,mu gu gala ye gu gala guganga mbundu guna gu pashi gu misu ma pidu. ¹⁹ Dwedi ye swidila nga tinda gibeni dji ngolu mu mooni wu pidu,nga gu gwigila gu gondaga mu bihani biega nga gu ngoyi muledi wu mbelu. ²⁰ Yesu ga godi ye gihani gina nga gibaga gwedi pidu,bwoona ga gumi Fwumu wu matshigu wu dangu diootsu nga bu gadi tshigu di di Meshisedegi.