¹ Mudiambu di bina,mi Polu,mweni bologu wu Kidishidu mudiambu ye binu ba paganu... ² Yi ba yaba mbi bu luyugi mbi Nzambi mudiambu ye gu zola gwandi ga nzolaga wu pegi gisalu gi mu guhanga mudiambu ye binu. ³ Pandi yina yi Nzambi ga swega wu ndeshi maa yi sonigi tegu ndambu mudiambu ye mapandi maa. ⁴ Bwoona mbi bu lu midangi,lu fani yaba mabanza mami mudiambu ye mapandi ma Kidishidu,mapandi mana ma swega Nzambi. ⁵ Mu dangu di tegu Nzambi loo ga lela baadu ma pandi mana,haa dangu di wu maledi gwedi ba tumwa bandi ye gwedi ba mbingudi bandi,mu lusadisu lupeve lwandi. ⁶ Mapandi meeni maa ma:mudiambu ye Yesu Kidishidu,baadu bana ba gondi bayuda basendaga mapimbu ma Nzambi gihani gi moshi ye bayuda,bedi dangu di luudu lu moshi ye bayuda,bwoona bu yagudi Nzambi mbi bu gahega baadu bandi ba misendaga kega gihani gi moshi ye bayuda, ⁷ yi hangaga gisalu gi gulonga tsangui dji pimbu mudiambu ye magabu mana ma Nzambi ma gapegi gumbundu yandi yi pimbu,mu lusadisu lungolu djiandi. ⁸ Ba kidishidu bootsu ba ndudi mu fwunu,haa Nzambi wu pegi magabu maa ma guyabisa dji pimbu gwedi baadu bana ba gondi bayuda,mudiambu di gimvama di gonda tsuga gwedi Kidishidu, ⁹ Nzambi wuna wu hangi bima biootsu wu pegi magabu maa kega mudiambu mu gu lela baadu bootsu pila yi guhanga mapandi mana ma gadi ma gu swama,yandiga luyandigu, ¹⁰ Bwoona,mudiambu ye bidimbu bawandjio bana bedi ye giyega di guyala gu yilu dangu di,beedi ye pila di gu yaba mayela mapila ye pila ma Nzambi, ¹¹ ga hangi bwoona mu pila yi ga gadi ye mabanza mandi mvula ye mvula ma ga lungishi gwedi Fwumu wu pidu Yesu Kidishidu, ¹² mudiambu ye gimvuga gi twedi ye Kidishidu,bu du musagaga mbundu,dwedi ye tswaa di guniamuga gu misu ma Nzambi ye gigesa giootsu. ¹³ Bwoona yi ba luwondila mbi lu gonda lembwa mudiambu ye mapashi:maa yi badala mudiambu ye binu. ¹⁴ Bwoona,yi ba fugamana gu misu ma dada, ¹⁵ mudiambu mu gu lendiga djina diandi mu biganda biootsu gu yilu ye yaa yelondi di manu, ¹⁶ yi mudingaga mbi mulugumu lwandi lu neni,ga pega muhunga wandi mudiambu ye binu lu gala gigesa,gu mbundu dji binu, ¹⁷ Yi mudingaga mbi Kidishidu ga gala mu mambundu dji binu mudiambu ye lugwigilu lu binu;kega mbi guzola gu binu gu lugama gu mbundu,nga kanga dji gamaga mudi mbi loo nga luyandigu lu gu dunga nzu, ¹⁸ yi dingaga kega mbi,binu ye baadu ba Nzambi bootsu,lu dala pila yi guyaba mbi guzola gu Kidishidu gwedi guneeni ye gu gugonda tsuga, ¹⁹ baadu loo ba fani yaba gu zola gwandi shela,haa yi mu dingaga mbi luyaba,bwoona,lu gala ye gi Nzambi shela. ²⁰ Lugumu lu gala gwedi Nzambi,wuna wedi ye giyega giguhanga mandi mavula mana ma luda mapandi,mana ma du dingaga ye ma du yabaga,Nzambi wuna wu hangaga mu lusadisu lu ngolu luna lu hangaga gwedi pidu, ²¹ lugumu lwandi lu moni gudibundu ye gwedi Yesu Kidishidu mvula ye mvula!Bwoobuna.