¹ Mu tangwa mwenedina, Yoani Mbotika wendidi mu tseki mwakhedi mwa wuma, ku thothu ya Yudeya, wayanjikidi kulonga : ² " Balulenu mitshima myenu, kifumu ka ku hulu kyeza penapena." ³ Kikuma mweni wudi oyu wakudidi mbikudi Yasaya, etsi," Ndaka ya ngolu yidi kwakulanga mu tseki: "Hangikenu njila ya fumu, yisungikenu yikhadi yonunuka." ⁴ Yowani wakhedi kuvwata kazaku ka mavuji ma Shamo ni mukaba wa kiketa kya mbiji mu luketu. Wakhedi kudya apashu ni wikhi wa muthemu. ⁵ Akwa Yeluselemi, ni akwa Yudeya, ni akwa kizunga mwenekina kyoshu kya meya ma Yolodani ezanga kudi mweni. ⁶ Akhedi kufunguna kubola kwowu, mweni ni kunona mbotika kudi mweni mu meya ma Yolodani. ⁷ Kashi tangwa dyamweni afadishi nya Saduse eza kudi mweni mu kubotama, mweni wa walezidi: "Talenu kikanda kya nyokha, nani wanuleza nutshini khabu jidi kwizanga? ⁸ Nufeti kuhanga mambu medi kulombululanga etsi nudi nwa balula mitshima myenu. ⁹ Nu dinungisoku enumweni mukwakula etsi tudi ana ja Abalahami. Kikuma nyenda nya nuleza etsi, Nzambi walunga kwalumuna mayala ama mekhina athu a kikanda kya Abalahami. ¹⁰ Kasawu kedi kadi kakusekisa kikuma kya kuvuka misodi ya mitondu. Koshu mutondu waleka kubuta mbuma ya mboti aka wuvuka, a wumba ajiku dia thuya. ¹¹ Ami nyenda nyanu botika mu meya, mu kulombulula etsi nwa balula mitshima. Kashi oyu wu kwizanga kumanima mamemi, wapita mu ngolu, ami nia lungidiku kukatula misinga ya yidyatudi yenji, waka nu botika mu Phevi ya longu ni mu thuya. ¹² Mweni wudi muyungulu ku mokhu mendji, mu kuyungula kimakulu yiswaswa yidi ya dibunda ni kheni ja bule mu ngunzu. Kashi yiswaswa yoshu waka yosha thuya twenda kuleka kujima. ¹³ He Yesu wa katuka ku Ngadidi, waya ku meya ma Yolodani mu kunona mbotika kudi Yowani. ¹⁴ Kashi Yowani wakhedi kuleka, mweni wamuleza : "Ami nidi ni fhunu ya kunona mbotika kudi ayi, kyehi ayi weza kudi ami? ¹⁵ Yesu wa muvutudidi: "Leka mahangami kyenekina kikimweni, kikuma tulungishi luzolu lwa nzambi." Tangwedi he Yowani wa kumbula. ¹⁶ Tangwa dya mu botikidi yimeni, Yesu wa wudikidi mbala yimoshi mu meya. Kaka mu tangwa mwenedina wulu dyanzulukidi kikuma kya mweni. Wamweni Phevi ya Nzambi ya kulumuka mudi bembi ha wulu dya mutwa wenji. ¹⁷ Ndaka yimoshi ya katuka ku wulu ni kwakula: "Oyu wudi mwana wamemi wu nyenda kuzola hengi. Ami nidi ni kyeshi kingi kikuma kya mweni.