¹ Yesu wa tetukidi ku Betelehemi mu thothu dya Ayuda, mu tangwa dyakhedi kuyala fumu Elodi, athu akhedi ni mayela akatikididi kwenda kuwudikila tangwa ejidi kutula ku Yeluselemi, ² ewididi: Mwehi Fumu wa Ayuda wa kutetuka? Kikuma etu twamweni katumbwa kenji kwenda kuhudikila tangwa, tweza ku muhwa Lukumu. ³ Tangwa dyedidi fumu Elodi wevwa kyenekina, wekhina mutshima mu hulu ni athu oshu ku Yeluselemi. ⁴ Mweni wawongikidi Anganga Nzambi ni Tulaki mu kuwehula eni amuleji, kwehi Khidishitu afeti kutetukila. ⁵ Eni etshi: Ku Betelemi mu thothu dya Ayuda; kikuma tala kimedi makusonika kudi mbikudi: ⁶ "Ayi, Betelemi, thothu ya Ayuda, wushiku dimbu dibibi mu katshi ka membu ma fhunu ma Zude. kikuma ayi wa kawudisa Fumu mumoshi wa katwadisa kikanda kyemi kya Yiseledi." ⁷ He Eloti wa tambikidi mu kitsweki Athu edi mayela makwijiya mambu, mu kwijika matangwa mangahi mahitidi yanjika koku kwamweni tutumbwa? ⁸ Wa watumini ku Betelemi, wa waleza " Ndangenu, nujikisi musamu wa mwana kalengi, yivwa nwa mumona nwiji nunguleji, ami ephi nyendi ku musambila. ⁹ Kyela evwa ndaka ya Fumu, akatukidi aya; Amweni katumbwa akana kamweni kwenda kuwudikila tangwa kumesu mowu kendidi kumakana akhedi mwana. ¹⁰ Kyamweni katumbwa, azadidi ni kyeshi kingi. ¹¹ Engididi munzu, amweni mwana ni mama enji Madiya. Afukimini, amu sambila. Akasuludidi mawaba mowu, amuhwa milambu, wola, palata ni mile. ¹² Nzambi wa walejidi ku ndoji aleki kuvutukila mu njila ya Eloti, kyenikyoki avutukidi kwimbu diowu mu njila yekha. ¹³ Kyedidi eni aya, Wanjo wa fumu wejidi kumwekana kudi Yosefi ku ndoji wa muleza: Zanguluka, nona mwana wa kalengi ni mama enji, tshina ku Ngipiti. kikuma Eloti wenda wahenga mwana mu kumujiya. Wukhadi koku tii hohu nyaka kuleza etsi vutuka. ¹⁴ Pipa yeneyina Yosefi wa tokamini, wa nona mwana ni mama enji wendidi nawu ku Ngipiti. ¹⁵ Wakhedi koku tii lutsuku lwa fidi Eloti. Mambu menamana mahangimini mu kulungisa ndaka yakudidi fumu mu kanu dya mbikudi wenji:" Nya tambika mwanemi awudiki ku Ngipiti." ¹⁶ Tangwa dyamweni Eloti etsi Andwenga amuhuna, wevidi kamu khabu. Watumini Asuta ku Betelehemi ni mu membu makhedi mu belabela endi kujiya ana amala oshu akhedi ni mvula jadi ni awana alekidi kadi kulungisa mvula jadi. Wahangidi kyenekina kikuma watangidi matshiku mahitidi katuka tangwa dyamweni Andwenga tutumbwa. ¹⁷ Moshu menamana mahangimini phila yakudidi mbikudi Yelemiya: ¹⁸ " Yivwenu ndaka ku Lama, yidilu ni mabokuta ma Lashela wenda wadidila ana jenji. Waleka muthu kamubondila oku kikuma ana jenji afwa." ¹⁹ Kyela Eloti wafwa, tala wanjo wa Fumu wejidi kumwekana ku ndoji kudi Yosefi ku Ngipiti wa muleza: ²⁰ Zanguluka, nona mwana ni mamendji vutuka ku Yisaledi, kikuma awa edidi kumujiya afwa. " ²¹ Yosefi watokimini wa nona mwana ni mamenji wa vutuka ku Yisaledi. ²² Kashi kevidi etshi Alakalawusi wekhina fumu ku Zude, wayinga tatendji, wevidi woma mu kwenda He Nzambi wa muleza ku ndoji mu kwenda ku thothu ya Ngadidi. ²³ Wendidi kujinga ku vidi dya Nazaleti. Mambu menama ma lungishidi ndaka jakudidi a mbikudi: "eni edi akwa Nazaleti."