¹ Keti ngu di mu diphanda? Ngu shi nga thumwa go? Nga monele go Fumu wetu Yesu? ² Gula ngu shi nga thumwa go mukunda nu athu ako, mukunda nu enwe ngu di nga thumwa. Mukunda enwe mudi mwa idimbu inyi idi mu leza egi ngu di nga thumwa wa Fumu. ³ Yiyi idi phila yami nga nu zwela ndaga tangwa mwa nu ngu tonga. ⁴ Keti tu shi go nu nswa ya gu zula ima ya gudia to ya gunwa mukunda nu gisalo gietu? ⁵ Tu shi nu nswa go ya gu zula mukhetu yonu udi muphanyi, mu phila athumwa ako nu aphangi a mu gi kilistu, nu phiele adi mu kita? ⁶ Nga ndo Barnabasi nu eme ta feto kita gisalo? ⁷ Nanyi udi mu kita phila suta a nu kita mu ima yenji? To nanyi wa nu kuna vinu mu gilanga, wa nu la gudia mambuma a mutshi wene? ⁸ To muthu wa nu tala mameme gwa nu nwa go mele a mameme ene? Keti nga nu zwela ndaga jene ji shi go giteso gi moshi nu shigo jia Moyize? ⁹ A sonegele gu mukanda wa Moyize egi: " Gu jitshiga ndo ngombe gu kano tangwa ngombe idi mu bundula gilanga" keti Nzambi wa zwelele nganyi mukunda nu ngombe phamba? ¹⁰ Keti gwa shi mu tu zwelela go? Ndaga jiji jia sonegeye gu mukunda egi: yonu udi mu bundula mavu wa feto bundula mu mutshima wa bonga, yonu udi mu hela khenyi wa feto gu ji hela mu mutshima wa bonga egi mba tu zule ga ndambu ga khenyi. ¹¹ Etwe tu di ta khenyi jia gi pheve mu katshi dienu. Hene keti idi ndaga ya phashi gula ta mi lomba lusadisu lwa gi muthu mu katshi dienu? ¹² Gula athu ako adi nu nswa ya gu mi lomba lusadisu, keti tu shi go nu nswa ya gu a balega? Etwe ta nu kanga mutshima ha gu mona egi phashi jile gu khala ndo tangwa tu di gu mi jiyisa sango ya Kilistu. ¹³ Keti mwa nu jiya go egi wanyi a nu kita gisalo mu inzo Nzambi a feto zula madia kaka mu inzo yene, wanyi a nu kita gisalo gia gu tambiga ima, a nu zula madia a nu tambigiya? ¹⁴ Ata Nzambi wa hanele nswa nganyi, mukunda nu wanyi adi mu longa sango ya bonga. ¹⁵ Uvi eme khanji ngu mi lomba go ata gima. Nga nu mi sonegela go ha gu mi lomba lusadisu. Idi ya bonga ngu fe mukunda muthu muko a konde gu di niema mukunda nu ndaga yene. ¹⁶ Gula ngu di mu longa sango ya bonga, ngu shi mu mona go mukunda nu ikhi nga jiya gu di zalula, mukunda ngu mu longa sango yene. Nga nu mona phashi nu khenda gula ngu shi go mu longa sango ya bonga! ¹⁷ Gula nga nu kita gisalo gigi mu luzolo lwami, nga nga nu lomba lufutu, uvi nga nu gi kita go mu luzolo lwami mukunda Nzambi wa ngu hwile nagio, hene ngu feto gu gi kita kaka. ¹⁸ Lufutu lwami ludi ikhi? Tangwa ngu mu longa sango yene, nga feto longa sango yene ya ofele konda gu lomba gima, lufutu lwami ludi kiese ginyi nga nu zula tangwa nga nu longa sango ya bonga. ¹⁹ Ngu di nu gipwanza mukunda nga kituga muthu wa gisalo gia athu akima, mukunda nu gu nana athu a vula. ²⁰ Mu katshi dia ba yuda ngu di nga muyuda ha gu nana ba yuda. Gwa wanyi adi goshia shigo, nga nu jinga n'eme goshia shigo kaka mukunda nu gu a benda. ²¹ Gwa wanyi a shi go goshia shigo, nga nu jinga nawo phila imoshi ( ishi go mu leza egi nga nu hata go shigo mukunda ngu di goshia shigo jia kilistu). Nganyi nga nu nana wanyi a shi go goshia shigo. ²² Gwa wanyi a konda gikhesa nga nu jinga nawo nganyi mukunda nu gu a nana. Nga khalele mu jinga nu athu akima kaka mu phila yawo ya lujingu ha gu a gulusa mu njila jia phila nu phila. ²³ Nga nu kita ndaga jiji jikima mu phila egi n'eme ngu zule ga ndambu ga lusagumunu lwa sango yene. ²⁴ Keti mwa nu jiya egi tangwa athu a nu kita saga jia gu zula phushi, kaka muthu mu moshi phamba wa nu nunga? Zulenu phushi ha gu nunga. ²⁵ Muthu mukima wa nu tshigina gu nunga gu saga, wa nu diangela gu di phaga gu saga yene. Wa nu di phaga ha gu nunga a zule lukumu, uvi etwe tu zulenu phushi ha gu nunga mba tu zule lukumu lwa mvula nu mvula. ²⁶ Hene tangwa ngu mu zula phushi, ngu shi mu ji zula go jia phamba. ole ngu mu beta muphephe. ²⁷ Mwila wami nga nu u monesa phashi, phila muhiga a nu mona phashi, nga nu kita nganyi ha gu leza athu ako egi, eme mba ngu shi mu katudiya go tangwa dia gu zula phushi.