¹ Aphangi a mala nu a akhetu, nga tshigina mu jiye egi, tuta di moshi dia khalele mu tshiga a shetu tangwa a khalele mu zauga muta wa koma. ² Khungi'awo akima a zudile mbotiga mu katshi dia tuta diene nu mu muta ha gu khala athu a Moyize, ³ khungi'awo akima a dile madia a moshi a gi pheve, ⁴ nu gunwa meya a gi pheve. Mukunda a nwile meya a gi pheve wanyi a katugile gu seso dia gi pheve, seso diene dia wendele nawo njila imoshi, seso diene dia khalele Kilistu mwene ha khenji. ⁵ Nzambi gwa khalele go nu kiese mu katshi dia athu a vula mu katshi diawo, hene a khalele mu fwa mu katshi dia temu. ⁶ Lulu ngagi ndaga jiji jikima jidi mbandu mukunda nu etwe, mukunda nu gu konda gu khala nu nzala ya gu kita ndaga jia bola ,u phila a kitile. ⁷ Mu khala mu sambela itege go mu phila athu ako a khalele mu kita. Mu phila ya sonegeye egi; " Athu adi tumbigile ha gudia nu gunwa, gu nyima a zugile ha gu kina nu nzala ya gu kita uthambi." ⁸ Tu kiti go uthambi mu phila athu ako adi mu kita, mukunda athu mafunda makumi muyadi adi mu fwa gu uthambi. ⁹ Ta jiyile go gu phaga Kilistu, mukunda athu a vula a kitile nganyi a file tangwa nioga jia a sumanele. ¹⁰ Mwa jiyile gu boguta go mu phila athu a vula a bogutile, hene a shiyiye gwa wanjio wa lufwa. ¹¹ Ndaga jiji jia a bwile mukunda nu gu khala mbandu yetu, mukunda nu gu tu longa gu ndaga idi mu talela yonu mba uza ha suga ya thotho. ¹² Hene muthu yonu wa nu yindula egi udi wa magana a kebe ha gu konda gu bwa. ¹³ Gushi gi ata phugumuna ya gi muthu ya jiya gu mi jila, mukunda Nzambi gwa jiyile go gu mi bemba satana a mi phugumune gu phugumuna ya bala ngolo, uvi Nzambi mba udi mu mi hwa ngolo ha gu magana nu ngolo. ¹⁴ Hene enwe aphangi'ami nga tshigina, bembenu gu sambela itege. ¹⁵ Nga nu mi leza mu phila nga nu leza athu a mayele nganyi mwa jiya gu tala mwa bonga bonga ndaga jinyi nga nu zwela. ¹⁶ Yindulenu fioti dikopha dia lusagumunu dinyi ta nu sagumuna tangwa ta nu di nwa, keti ta nu di bungisa go nu menga a Kilistu? Mapha wanyi ta nu khesa tangwa ta nu dia, keti ishi go ta nu di bungisa nu mwila wa Kilistu? ¹⁷ Mukunda dipha didi di moshi, ata tu di ta vula, tu di mwila umoshi, mukunda khungi'etu akima ta nu dia dipha di moshi. ¹⁸ Talenu athu a gu Izalayele, keti adi wanyi a dile mapha wanyi a haneye makapho gwa Nzambi ha jigo dia tshiya? ¹⁹ Ikhi nga tshigina gu zwela? Keti idi mu leza egi gitege ta madia a haneye makapho gwa itege adi a konda funu? ²⁰ Ngu mu zwela egi,madia wanyi a nu tambigiya gwa aphanyi, a nu a tambiga go gwa Nzambi, uvi gwa pheve jia diabulu. Nga tshiginile go mudi bungise nu pheve jene jia ma diabulu! ²¹ Mwa jiyile go gu nwa mu kopho dia Fumu nu mu kopho dia Diabulu. Mwa jiyile go gu sala ha mesa a Fumu nu ha mesa a diabulu. ²² Gula idi nganyi, tu mu tshigina egi Nzambi a tu vile gingonzo? Keti ta mu balega gu ngolo? ²³ Tu di nu nswa ya gu kita ndaga jikima" uvi ndaga jikima ji shi jia bonga go ha gu kita." Ndaga jikima jidi jia bonga", uvi ndaga jikima jia nu tu salesa go. ²⁴ Muthu gwa jiyile go gu kamba kaka mambote enji. Uvi konso muthu a kambe mambote a athu ako. ²⁵ Mwa jiya genu gudia ima ikima ya nu digiya ha zando konda gu hula. ²⁶ Mukunda thotho nu ima ikima idi ya Fumu Nzambi. ²⁷ Gula muphanyi wa gu tamega ha gudia mu inzo yenji ebuna wa tshigina ha guya, dia ima ikima a gu hwa, konda gudi hula mihu. ²⁸ Uvi gula muthu mu moshi wa gu leza egi: " musunyi wa mbiji yiyi wa katuga gu mbiji inyi ya haneya gu makapho gu itege," gudia ndo mbiji yene mukunda nu muthu yonu wa gu leza nganyi, enji mukunda muthu mwene udi wa konda mabanza. ²⁹ Ngu shi mu zwela go mukunda nu ngindu jiaye, uvi mukunda nu muthu muko. Hene mukunda nu ikhi gipwanza giami gia feto sambeseya gwa muthu muko? ³⁰ Gula mwa dia madia ene nu khenda, mukunda nu ikhi mudi mu ngu mbila mambo mukunda nu madia wanyi ngu mu vutudila Nzambi matondo? ³¹ Hene gula mwa dia nga ndo mwa nwa, ata mwa kita konso ndaga, kitenu ndaga yene ha gu kumisa Nzambi. ³² Mu monesa ba yuda, nga ndo ba greki nga ndo dibundu dia Nzambi sonyi go, ³³ salenu mu phila nga nu sala, nga nu kamba kaka mambote ami go, uvi nga nu kamba mambote a athu a vula mukunda a guluge.