¹ Lulu ngagi tu zwele mukunda nu mbiji jinyi jia katuga gu makapho wanyi a nu tambigiya gu itege. Tu di mu jiya egi; " khungietu akima tu di nu mayele." Mayele a lulendo, uvi luzolo lwa nu bongesa muthu. ² Gula muthu udi mu yindula egi wa jiya gima, gwa jiya go mwa bonga mu phila mwene a feto gu gi jiyila. ³ Uvi gula muthu wa tshigina Nzambi, Nzambi wa nu mu jiya. ⁴ Hene, gu ndaga idi mu talela ima ya gudia inyi ya haneya makapho gu itege, tu di mu jiya egi thotho yiyi idi gima gia phamba, enji Nzambi udi kaka mu moshi. ⁵ Lulu ngagi gudi nu athu a vula a nu tamegeya egi adi tu nzambi twa haha hoshia mavu, ata tu nzambi nu mafumu adi a vula", ⁶ mukunda nu etwe tu di nu Nzambi mu moshi udi Shetu, yonu wa salele ima ikima, ta nu jinga mukunda nu mwene, tu di nu Fumu mu moshi Yesu Kilistu yonu ima ikima idi mu jinga mukunda nu mwene, etwe tu di mu jinga mu lusadisu lwenji. ⁷ Lulu ngagi, mayele ene a shi go nu muthu mukima. Athu ako a khalele mu salela itege, nu gudia mbiji jia katuga gu itege yene. Gu yindula gwawo gudi gwa bola mukunda a shi nu ngolo go. ⁸ Madia mba a shi mu bata go ha gudi visa nu Nzambi. Gula tu di mudia madia ene to ta konda gudia madia ene mba tu totesa go ata gima. ⁹ Mu keba, mu salela go diphanda dienu mu phila egi di bwise muthu yonu wa konda ngolo mu lukwikilu. ¹⁰ Gula muthu mu moshi wa konda mayele wa mi hwa mbiji inyi ya haneya makapho gu itege, mba udi mu zula gikhesa ha gudia nu mwene mbiji inyi ya haneya makapho gu itege. ¹¹ Nganyi mukunda nu gu jiya gwenu gwa bonga mu ndaga idi mu talela itege, phangi wa yala to wa mukhetu udi nu lukwikilu lwa leba mukunda nu mwene Kilistu a file, udi wa tota. ¹² Hene tangwa udi mu kita masumu gwa aphangi'aye nu mu namenesa ngindu jiawo jidi jia leba, udi mu kita masumu gwa Kilistu. ¹³ lulu ngagi, gula madia adi mu bwisa phangi'aye wa yala nga ndo wa mukhetu, mba ngu shi nji go mu a dia ata fioti, mukunda phangi yonu wa yala to wa mukhetu gu bwa ndo mukunda nu eme.