¹ Lulu ngagi mukunda nu ndaga inyi idi mu talela mukanda mwa ngu sonegele: " idi ya bonga yala ha gu kwela mukhetu mu moshi. ² Uvi mukunda nu uthambi, konso yala gu kwela mukhetu mu moshi, mukhetu mukima gu kwela yala mu moshi. ³ Idi ya bonga gwa yala ha gu salela mukajenji gima gia bonga, nu mukhetu ha gu salela mulumi'enji ndaga jia bonga mu katshi dia makwela awo. ⁴ MUkhetu gwa shi nu funu ya mwila wenji go, uvi yala muthu udi nu funu ya mwila wa mukhetu, phila imoshi gwa yala gwa shi nu funu ya mwila wenji go, idi mukhetu udi nu funu wa mwila wa yala. ⁵ Eye mukhetu nga ndo eye yala mu di tunyisa go ha gu vugisa mwila yenu mu njila ya giyala nu ya gikhetu, Kaka gula mwa di visa ha gu konda gu vugisa mwila yenu mukunda nu ga tangwa ga moshi, mukunda nu isambu. Gu nyima mwa jiya gu vugisa mwila gula ndo, mwa jiyile go gu di yala, nganyi satana gwa jiyile go gu mi phaga. ⁶ Ndaga jiji ngu mu mi leza, idi longi ngu mu mi hwa, ishi go shigo mwa feto hata, nga ndo nswa. Nga tshigina egi ⁷ muthu mukima a hate phila yami. Uvi muthu mukima udi nu makapho a zudile gwa Nzambi, konso muthu udi nu kapho dienji ha khenji. ⁸ Athu wanyi khanji a kwela go, nu enwe akhetu a mi mifidi, ngu mu zwela egi idi ya bonga ha gu jinga nganyi mu phila ngu mu jinga. ⁹ Uvi gula mu shi mu kuwa ha gu jinga nganyi go, mwa bonga mu kwele mukunda idi ya bonga ha gu kwela, ke gu khala nu ngindu jia gisaga-saga. ¹⁰ Gwa enwe mu di mwa kwela, ngu mu mi hwa shigo yiyi ishi yami go uvi idi ya Fumu: " Mukhetu wa makwela gwa jiyile gu shiya dibala nu mulumienji go." ¹¹ Uvi gula wa kita nganyi, gwa jiyile nji gu kwela yala muko go, uvi gula wa tshigina wa jiya gu vutula dibala nu mulumienji: " Nu yala gwa jiyile go gu shiya dibala nu mukajenji." ¹² Mukunda nu athu ako ngu mu zwela egi, yala wa mu kilistu gula udi nu mukhetu gwa shi go mu kilistu, ebuna mukhetu mwene wa tshigina gu jinga nu yala mwene, yala yogu gwa jiyile go gu shiya dibala nu mukhetu mwene. ¹³ Phila imoshi gula mukhetu wa mu kilistu udi mu jinga nu yala gwa shi go mu kilistu, gula yala mwene wa tshigina gu jinga nu mukhetu mwene, mukhetu yogu gwa jiyile go gu shiya dibala nu yala mwene. ¹⁴ Mukunda Nzambi wa nu tshigina yala wa muphanyi, tangwa yala yogu a vugana mu dibala nu mukajenji. Phila imoshi wa nu tshigina mukhetu wa muphanyi, tangwa a vugana mu dibala nu yala wa mu kilistu. Gula ishi go nganyi, anawo a feto khala aphanyi, gula idi nganyi, Nzambi wa nu tshigina anawo ¹⁵ Uvi gula muphanyi wa tshigina gu shiya dibala nu mu kilistu a shiye dibala. Mu ndaga ya phila yiyi mu kilistu yonu wa kwelele, ata udi yala nga ndo mukhetu, udi nu nswa ya gu kita phila a tshigina, uvi Nzambi wa tu tamegele ha gu jinga mu ngemba. ¹⁶ Keti udi mu jiya eye mukhetu wa mu kilistu egi wa jiya gu gulusa mulumiaye? Ata eye yala wa mu kilistu keti udi mu jiya egi wa jiya gu gulusa mukajiaye? ¹⁷ Muthu mukima a kambe ha gu jinga phila Nzambi adi mu tshigina, mu phila Nzambi a tu tamegele ha gu jinga. Yiyi idi shigo ngu mu hana gu mangumba akima. ¹⁸ Athu wanyi akima a batudiya luyotisi gula a phoneya, idi mwa bonga a jinge nganyi ni gidimbu gia luyotisi a batudiye. Keti gula muphanyi mu moshi wa phoneya mu lukwikilu, keti wa feto batudiya mu luyotisi? A jinge genji nganyi. ¹⁹ Gu batudiya luyotisi nu gu konda gu batudiya luyotisi ishi go yene ndaga idi nu funu, uvi gima gia balega funu gidi gu lemvuga gu shigo jia Nzambi ²⁰ Muthu mukima wa feto khala nu gisalo ginyi a khalele tangwa a phoneye gwa Nzambi. ²¹ Keti wa khalele wa muhiga tangwa Nzambi a gu phonele? Gu vwa ndo khenda mukunda nu ndaga yene. Uvi gula wa tshigina gu jinga mu ngemba, jinga gaye. ²² Mukunda nu muthu yonu mukima wa phoneye gwa Fumu ole muhiga, udi muthu wa ngemba, mukunda nu Fumu. Phila imoshi yonu udi mu ngemba, tangwa a phoneye mu lukwikilu udi muhiga wa kilistu. ²³ Mwa sumbiye mu thalo ya vula, mu khala go mwa ahiga a muthu. ²⁴ Aphangi a mala nu a akhetu, mu gimvuga tudi nagio, muthu mukima a jinge kaka mu phila inyi ta phoneye gwa Nzambi. ²⁵ Lulu ngagi, mukunda nu enwe wanyi khanji mu kwela go ngu shi go nu shigo ya katuga gwa Fumu, uvi ngu mu mi longishila egi eme muthu yonu mwa jiya gu hagela mutshima mukunda Fumu wa ngu vila khenda. ²⁶ Mukunda nu phashi jia tangwa didi, ngu mu yindula egi idi ya bonga yala ha gu jinga nganyi phila adi. ²⁷ Keti udi wa vugana nu mukhetu mu njila ya makwela? Gula idi nganyi gu phaga ndo ha gu shiya dibala nu mukhetu mwene. Keti ushi nu mukhetu go? Gu kamba ndo ha gu kwela mukhetu. ²⁸ Uvi gula wa kwela mukhetu wa kitile masumu go, mukunda ngu shi mu tshigina go mu mone phashi jia gi muthu tangwa mudi mu jinga. ²⁹ Aphangi ngu mu zwela egi: tangwa dia bega gabiyo. Katuga ilumbu yiyi, a mala akima wanyi a kwela akhetu a jinge mu phila muthu yonu khanji a kwela go a nu jinga. ³⁰ Athu wanyi a nu dila a jingi go nu khenda, wanyi adi nu kiese a jinge mu phila athu a konda kiese a nu jinga, wanyi a nu sumba ima ya phila nu phila, a jinge mu phila athu a konda gima a nu jinga. ³¹ Wanyi a nu kita ndaga jia phila nu phila jia koma haha ha mavu a jinge ha gu mona egi a shi nu ndaga jia koma jia gu kita go haha ha mavu. Mukunda thotho ya mvimba idi ha suga. ³² Nga tshigina egi mu khale mu ngemba mu ndaga jikima. Muthu yonu wa konda mukhetu a sale gisalo gia Fumu, mukunda wa nu kamba phila ya gu mu hwa kiese. ³³ Uvi muthu yonu udi nu mukhetu wa nu tala kaka ndaga jia haha ha mavu, mukunda wa nu tshigina gu hwa mukajenji kiese. ³⁴ Udi muthu wa mitshima iyadi. Hene muthu yonu udi khanji a kwela mukhetu go, to mukhetu yonu udi khanji a vugisa mwila wenji nu yala go wa nu sala gisalo gia Fumu, wa nu kamba ha gudi haga muthu wa funu mu gi musunyi nu mu gi pheve. Mukhetu yonu wa kwela yala wa nu tala ndaga jia haha ha mavu nu gu hwa mulumienji kiese. ³⁵ Ngu mu zwela nganyi mukunda nu mambote enu, mukunda nu gu mi salesa, ngu mu tshigina egi mu kite ndaga jidi jia bonga, nu gudi hana gu gisalo gia Fumu konda gu khala ugalala. ³⁶ Uvi gula muthu mu moshi udi mu yindula egi mu gifuta gienji nu mona mukhetu adi visa egi a shi mu kwela go, uvi mona yala gwa shi go mu mona phila ya gu yala mwila wenji, enji udi kaka mu haga mutshima gwa mona mukhetu yonu, gima ndo, a jiya gu kwela gula mona yala wa tshigina. ³⁷ Ishi gayo masumu go? Uvi gula mona yala wa tuna ha gu gu kwela, gula gu shi go nu gima gia phushi- phushi, enji wa tshigina gu keba mwila wenji wa kita gima gia bonga ha gu konda gu kwela mona mukhetu mwene. ³⁸ Nganyi muthu yonu wa kwela mona mukhetu, wa kita gima gia bonga, uvi yonu wa tuna genji ha gu kwela wa kita gima gia gu balega gu bonga. ³⁹ Mukhetu wa feto kangama nu mulumienji ha gu jinga nenji mu dibala. Uvi gula mulumienji wa fwa, mukhetu udi nu tangwa dia gu zudiya gwa konso yala yonu adi mu tshigina, uvi makwela ene a mu gi Nzambi. ⁴⁰ Mu gu yindula gwami, mukhetu mwene mba u khala nu kiese gia vula gula gwa kweleye go. Wanyi adi mabanza ami, ebuna ngu mu yindula egi n'eme ngu di nu pheve ya Nzambi.