¹ Gula mu kilistu mu moshi mu katshi dienu udi nu ndaga nu mu kilistu muko, phila khi a feto bata ndaga yene gwa ma nzuji a shi go a kilistu, mukunda nu gu sambesa ndaga yene? Keti gwa fetele go gu bata ndaga yene gwa a kilistu mukunda a sambese ndaga yene? ² Keti mu shi mu jiya go egi a kilistu mba adi mu sambesa athu a haha ha mavu? Gula mba mudi mu sambesa athu a ha mavu, gula mba mu sambesa athu akima, mwa jiyile go gu sambesa tu ndaga twa phamba-phamba. ³ Keti mu shi mu jiya go egi mba mudi mu sambesa ma wanjio? Gula idi nganyi, keti mwa jiyile go gu sambesa ndaga jia lujingu lwa ha mavu? ⁴ Gula mudi nu giyega gia gu sambesa ndaga jia lujingu lwa konso gilumbu, phila khi mwa jiyile go gu bata ndaga mu inzo Nzambi ha gu i sambesa? ⁵ Ngu mu mi leza egi idi sonyi jenu. Gu shi go nu muthu mu moshi mu katshi dienu wa tema wa jiya gu sambesa ndaga mu katshi dia aphangi a mala nu a akhetu? ⁶ Gula mu kilistu mu moshi udi nu ndaga nu phangi'enji mu kilistu, keti idi ya bonga gula wa bata ndaga adi nayo gwa nzuji gwa shi go mu kilistu ha gu sambesa ndaga yene! ⁷ Gula mudi mu bata ndaga jenu gwa ma nzuji, idi mu leza egi mudi mwa bela! mukunda nu ikhi muthu yonu udi nu gifu gwa jiyile go gu hwiya ndola? Mukunda nu ikhi mu di mu kuya? ⁸ Uvi idi enwe mwa nu di kita ndaga jia bola mu katshi dienu! ⁹ Keti mudi mu jiya egi athu a nu kita ndaga jia bola mba a shi mu zula go Gifumu gia Nzambi? Keti mu shi mu jiya go egi enya uthambi, enya itege, enya ndaga jia bola, a mala wanyi a nu vugisa mwila nu a mala ako, ¹⁰ nzangi, enya gu lauga matombe, enya mambo, athu wanyi a nu tshigina gu khala nu ima ya vula, athu wanyi a nu shingana athu ako, gu shi ata muthu mu moshi go mu katshi diawo mba u zula Gifumu gia Nzambi. ¹¹ Ako mu katshi dienu adi nganyi. Uvi enwe mwa di wovele mitshima, mudi mwa athu a Nzambi, mwa di vishile nu Nzambi mu jina dia Fumu Yesu Kilistu nu mu jina dia pheve ya Nzambi. ¹² "Ngu di nu nswa ya ndaga jikima nga tshigina gu kita", uvi ndaga jikima ji shi go jia ngu bongela." Ngu di nu nswa ya gu kita konso gima nga tshigina; uvi nga jiyile go gu hana njila gu ndaga ikima ha gu ngu yala ole ngu di nga muhiga." ¹³ Madia adi mukunda nu vumo, vumo didi mukunda nu madia", uvi Nzambi mba udi mu katula ndaga jiji jiyadi. Uvi mwila u shi go mukunda nu uthambi, uvi udi mukunda nu Fumu, Fumu mukunda nu mwila. ¹⁴ Nzambi wa zugishile Fumu Yesu gu lufwa, mba udi mu tu zugisa mu ngolo jenji. ¹⁵ Keti mwa nu jiya go egi mwila wenu udi gitshidi gia mwila wa kilistu? Keti nga lenda gu bungisa mwila wami udi gitshidi gia mwila wa Kilistu nu mwila wa mukhetu wa ndumbu? Ata fioti ndo! ¹⁶ Mu shi mu jiya go egi yonu udi mu vugisa mwila wenji nu mukhetu wa ndumbu udi mu kituga muthu mu moshi nu mukhetu mwene? A sonegele gu mukanda egi; " khungi'awo akima muyadi a kituga mwila umoshi." ¹⁷ Yonu mukima wa vugana nu Fumu, udi mu kituga muthu mu moshi nu Fumu mu gi pheve. ¹⁸ Bembenu uthambi! Masumu ako muthu adi mu kita a nu bolesa mwila go, uvi mwenya uthambi udi mu kita masumu a nu bolesa mwila wenji. ¹⁹ Keti mwa nu jiya go egi mwila yenu udi inzo Nzambi ya pheve Santu, yonu wa nu jinga mu katshi dienu, pheve mwa zudile gwa Nzambi, ebuna mwila wenu u shi wenu nji go? ²⁰ Mukunda mwa sumbiye mu thalo imoshi ya vula.