¹ Ta vile egi gudi nu ndaga ya uthambi mu katshi dienu, uthambi wa phila inyi mu katshi dienu idi ndaga ya sonyi ata aphanyi a jiyile go gu kita nganyi. Ta vile nji egi muthu mu moshi mu katshi dienu udi mu kita uthambi nu mukajia shenji. ² Enwe mudi nu lulendo lwa gu zwela mwa vula! Keti mwa tshigina gu di niema? Yonu udi mu kita nganyi wa feto katudiya mu gimvuga. ³ Ata mu gi musunyi ngu di nenu gwa leha, mu gi pheve tu di hama ha moshi, ata gwa leha ngu nga nu sambesa muthu udi mu kita nganyi, ole tu di hama ha moshi. ⁴ Tangwa mudi mwa di bungisa mu jina dia Fumu wetu Yesu, idi mu monega egi ngu di nenu hama ha moshi mu ngolo jia Fumu wetu Yesu. ⁵ Muthu udi mu kita nganyi, ndaga jenji nga ji sambesa, ha gu mu hana gu mago a diabulu mukunda nu gu shiya mwila wenji mukunda monyo wenji mba u guluge mu gilumbu gia Fumu. ⁶ Gu di monesa gwaye gu shi gima gia bonga go. Keti mudi mu jiya egi ga ndambu ga khishi dia mapha ga nu jimbisa phupha ya mapha? ⁷ Enwe khalenu khishi dia mapha dia mwa leha dia masumu, mukunda mu khale mwa fwanana nu mapha a pha ha gu mona egi mudi mwa mapha a konda khishi. Mukunda Kilistu udi kunji dietu wa shiyiye holu dia khulunji. ⁸ Tangwa mudi mudia madia a khinji wa phage, gudia ndo khinji yene nu mapha a londeya nu khishi di kulu, khishi dia masumu nu dia ndaga jia bola, uvi gu dia khinji yene nu mapha a konda khishi, mapha wanyi a bonga a kielega. ⁹ Gu mukanda nga mi sonegela, nga zwelele egi mwa jiyile go gudi bungisa nu enya uthambi. ¹⁰ Nga mi lezele go mukunda nu athu adi enya uthambi, to wanyi adi nu nzala ya gu khala nu konso gima, to nu nzangi, nga ndo nu wanyi a nu salela itege, idi ya bonga enwe mu katuge mu katshi diawo. ¹¹ Gu ndaga inyi nga mi sonegela, nga mi leza ha gu katuga mu katshi dia athu wanyi a mu tamegeya egi a kilistu uvi adi mu jinga mu katshi dia ndaga jia bola, jia uthambi, gu sambela itege, gu lauga matombe, gu kuya. Muthu wa phila inyi gu dia nenji ndo. ¹² Nganyi phila khi nga jiya gu di ngidisa ha gu sambesa athu a phila inyi a shi go mu katshi dia inzo Nzambi? Gula idi nganyi, enwe mwa jiyile go gu sambesa a kilistu? ¹³ Nzambi udi mu sambesa wanyi a shi go a kilistu; nu gu a kaya mu katshi dienu."