¹ Hene, mwa bonga tu zulenu mu phila athu wanyi a nu salela Kilistu, athu wanyi a hwiye giyega gia gu jiyisa ndaga jenji jia kielega jinyi jia giswegi gia Nzambi. ² Hene gima gia thomo gidi mu lombeya gwa muthu yonu wa zudile giyega gidi egi a khale wa hageya mutshima gwa Fumu wenji. ³ Ata mwa ngu sambesa, ata athu ako a ngu sambesa, nga jiyile gu mona phashi go. Nga jiyile gudi sambesa go. ⁴ Nga nu yindula mu mabanza ami egi, nga kitile go gima gia bola. I shi mu leza go egi nga kitile gima gia bola. Mukunda Fumu Yesu kaka udi nu nswa ya gu ngu sambesa. ⁵ Hene, mwa jiyile gu sambesa muthu go, gula tangwa khanji di lunga go. Gusambesa gwa suga gu mu nenga ti nu guza gwa Fumu; mba udi mu tshigina gu zola mu mwanya ndaga jia mu phipha. Ngindu jinyi jidi jia gu swega mu mutshima wa athu, mba udi mu ji leza. Nganyi Nzambi mba u hana gwa muthu mukima lukumu lunu a feto zula. ⁶ A phangi'ami a mala nu a akhetu, nga zula mbandu yami nu ya Apolosi gu ndaga inyi ikima mukunda nu gu mi longa. Nganyi mwa jiya gu zula mayele gu ndaga a nu zwela egi: " tu kite kaka ndaga inyi ya sonegeye gu mikanda" mukunda gu shi nu muthu go wa jiya gu sala lulendo gu twama dia muthu muko. ⁷ Keti udi nu luswaswanu nu athu ako? Keti mudi mu jiya egi mwa zudile go ima ithugu? Gula mwa zudile ima ithugu, phila khi udi mudi zalula ha gumona egi ima inyi mwa zudile keti idi mabula? ⁸ Mwa zudile gale ima ikima mudi nayo funu! Mudi gale mwa mvwama! Mwa yindudile gale gu yala katuga mwa leha i shi mu luzolo lwetu go. Mu masonga, ngu mu tshigina egi mu yale, nganyi ta jiya gu yala khungi. ⁹ Nzambi wa tu hagele a thumwa a gu kita gisalo gi moshi nu gisalo gia suga, nganyi tu di ta fwanana nu athu wanyi a kwateye ha gu shiyiya. Ta kitugile athu wanyi a khalele mu taleya gwa athu nu gwa ma wanjio. ¹⁰ Tu di ta enya malwi mukunda nu Kilistu. Uvi enwe mudi mwa tema mukunda, nu Kilistu tudi ta konda ngolo, uvi enwe mu di nu ngolo. Mudi mu katshi dia lukumu, uvi etwe tu di ta konda lukumu. ¹¹ Ti nu tangwa didi, tu di nu nzala ya gudia nu luhungu lwa gu nwa, tu di mu sudiga milele ya banga, athu adi mu tu beta, tu shi getu nu jinzo go. ¹² Tu mu sala gisalo gia ngolo nu mago etu. Tangwa ta nu shinganeya, etwe ta nu sagumuna athu wanyi adi mu tu shingana. Tangwa tu mu moneseya phashi, ta nu kanga mutshima. ¹³ Tangwa athu adi mu tu mbila mambo, ta nu hana mvutu jia kiese. Tu di mu moneya ima ya mvindu ya nu bishidiya, athu a ha mavu a nu tu mona egi tu di ta konda funu. ¹⁴ Ngu shi mu mi sonegela go ha gu mi monesa sonyi, uvi mukunda nu gu mi longa ole mwa anami nga tshigina. ¹⁵ Ata mudi nu mafunda a athu a gu mi longa lujingu lwa Kilistu, mu shi nu a tata a vula go, mukunda eme nga kitugile Shenu mu Kilistu Yesu mu njila ya sango ya bonga nga mi longele. ¹⁶ Hene, ngu mu mi bondila ha gu hata gikalulu giami. ¹⁷ Hene, nga mi tumila Timoteyo munami nga tshigina mu lukwikilu lwa Kilistu Yesu. Mba udi gu mi yibugisa malongi a Yesu nga mi longele mu phila ngu mu a longa muma mukima nu mu jinzo Nzambi jikima. ¹⁸ Lulu ngagi, a vula mu katshi dienu a nu kituga athu adi nu lulendo lwa gu zwela mwa vula, mukunda adi mu yindula egi mba ngu shi mu za mu mi tala go. ¹⁹ Uvi mba ngu mu za ha gu mi tala kaka lulu ngagi, mu luzolo lwa Nzambi. Mba ngu shi mu hata go ndaga jia lulendo jia nu zwela athu mwa vula, nu gu jiya ndaga jinyi athu a lenda gu kita. ²⁰ Mukunda Gifumu gia Nzambi gia nu katuga go gu ndaga athu a nu zwela, uvi gia nu katuga mu ngolo jia pheve. ²¹ Ikhi mudi mu tshigina? Keti mwa tshigina egi ngu mi jile nu fimbu to nu mutshima wa luzolo nu wa hima ?