¹ Aphangi a mala nu a akhetu, nga jiyile go gu mi leza ndaga mu phila nga khalele mu leza athu wanyi adi nu pheve ya Nzambi, uvi ngu mu tangiza egi nga feto gu mi leza mu phila nga nu zwela ndaga gwa athu wanyi a shi go nu pheve ya Nzambi, mu phila nga nu leza alenge mu gi pheve. ² Nga mi hwa mele mayele a ngombe ha gu nwa, uvi madia a musunyi ndo. Ti nu lulu ngagi mu shi genu mwa yilama go. ³ Ti nu lulu ngagi mudi genu mu jinga mu gi muthu. Hene gingonzo nu thembe gudi mu katshi dienu, hene mu khala mu jinga nu gu wenda mu gi muthu go. ⁴ Gula muthu mu moshi mu katshi dienu wa zwela egi; "Eme pholo", muko egi, "eme Apolosi, " mu shi mu jinga go mu gi muthu? ⁵ Apolosi nanyi? Pholo nanyi? Adi athu a gisalo mu katshi dienu wanyi adi mu mi longa ha gu kwikila, wanyi a hwiye gisalo gia Nzambi. ⁶ Eme nga kuna, Apolosi wa tshila meya, uvi Nzambi u mu kudisa gimenina. ⁷ Hene yonu udi mu kuna, nu yonu udi mu tshila meya adi phamba. Uvi Nzambi kaka udi nu funu. Mukunda mwene udi mu kudisa ima. ⁸ Henyaha muthu yonu udi mu kuna, nu yonu udi mu tshila meya adi giteso gi moshi, konso muthu mba udi mu futiya mu giteso gia gisalo gienji. ⁹ Mukunda tu di ta athu a gisalo gia Nzambi, tu di twa ilanga ya Nzambi, athu a saleye gwa Nzambi. ¹⁰ Ha gutala mabula wanyi nga zudile gwa Nzambi nga tungile makunji mu phila muthu wa tema wa jiya gu tunga a nu tunga makunji, muthu muko wa nu tunga holu dia makunji enji. Uvi konso muthu gu keba mu phila adi mu tunga. ¹¹ Mukunda gu shi nu muthu muko wa jiya gu tunga kunji diko go, kaka kunji dinyi dia tungiye. Kunji diene didi Yesu Kilistu. ¹² Lulu ngagi ha gu tunga holu dia kunji diene, muthu muko udi mu tunga nu wolo, muko nu maseso a thalo, muko nu mitshi, muko nu mwangu. ¹³ Gisalo gia muthu mukima mba gidi mu monega mu katshi dia mwanya, mukunda mba gidi mu phageya nu tshiya ha gu jiya nu gu phaga gisalo gia muthu mukima mu phila a kitile gisalo gienji. ¹⁴ Gula kunji dia tungiye dia hile go tshiya, muthu wa di tungile mba udi mu zula lufutu lwa bonga. ¹⁵ Uvi gula kunji diene dia shidila gu tshiya muthu yonu mba gwa zudi go ata gima, uvi mba udi mu guluga mu phila muthu wa lenga tshiya a nu guluga. ¹⁶ Keti mwa nu jiya egi mwila wenu udi inzo ya Nzambi, gunu pheve ya Nzambi ya ni jinga mu katshi dienu? ¹⁷ Gula muthu wa phanza inzo ya Nzambi, Nzambi mba udi mu mu shiya, mukunda inzo ya Nzambi idi ya santu, n'enwe nji mudi mwa inzo ya Nzambi. ¹⁸ Ata muthu mu moshi gwa jiyile go gu di dimba. Gula muthu mu moshi mu katshi dienu udi mu yindula egi udi muthu wa tema mu ilumbu yiyi, wa feto kituga mwenya malwi gu twama a kituge muthu ya tema. ¹⁹ Mukunda ndaga jinyi athu a nu mona egi jidi jia mayele, jia nu monega ndaga jia uzoba gu twama dia Nzambi. Mukunda gwa sonegeye egi: " Nzambi wa nu kwata athu a mayele gu mayele awo." ²⁰ A sonegele nji egi Nzambi udi mu jiya egi mabanza a athu a mayele a shi go nu funu." ²¹ Ebuna, athu a jiyile go gu di zalula! mukunda ima ikima idi yenu, ²² gula Pholo nu Apolosi, nga ndo Phiele, nga athu a ha mavu, nga lujingu, nga monyo, nga ima ya tangwa didi, nga ya tangwa didi muza, ikima idi yenu, ²³ enwe mudi mwa athu a Kilistu, Kilistu udi Muthu wa Nzambi.