¹ Tangwa nga kumile mu dimbo dienu, nga kumile go ha gu mi jiyisa ndaga jia ngolo nga ndo gu mi jiyisa gu jiya gwami, tangwa nga khalele gu mi longa ndaga jia kielega jia giswegi gia Nzambi. ² Mukunda nga zula desijio ha gu leza egi ngu jiya ata gima go tangwa nga khalele mu katshi dienu, uvi nga yindudile kaka ndaga jia Yesu Kilistu yonu wa file holu dia khulunji. ³ Tangwa nga khalele mu katshi dienu, nga khalele nu gikhesa, nga khalele nu woma, nu gudigima gwa vula. ⁴ Gu ndaga jinyi jikima, nga khalele gu mi leza, nu mu malongi ami nga khalele go mu zwela ndaga jene mu mayele a athu, mayele wanyi a jiya gu balula ngindu jia athu, uvi nga khalele mu leza ngolo ya pheve ya Nzambi. ⁵ Mukunda lukwikilu lwenu lwa nu katuga go gu mayele a athu uvi gu ngolo jia Nzambi. ⁶ Lulu ngagi tu di mu zwelela ndaga jia mayele a athu, uvi ishi go mayele a ha mavu wawa, mukunda nu mvula jiji jidi mu balega. ⁷ Mayele nga tshigina gu zwelela adi mayele a giswegi gia Nzambi, mayele wanyi a giswegi Nzambi a yidigile katuga mwa leha mukunda nu lukumu lwetu. ⁸ Gu shi ata shigo imoshi go ya mvula yiyi idi mu jiya mayele ene, mukunda gula nga a jiyile, nga a shiyile go Fumu Yesu wa lukumu holu dia khulunji. ⁹ Uvi idi kaka mu phila ya sonegeye egi, " Ndaga jia nula gu monega ndo, gu viya ndo, ndaga jinyi ata muthu gwa jiyile go gu yindula egi jia jiya gu khala nganyi jene jidi ndaga Nzambi a londele mukunda nu athu a nu mu tshigina." ¹⁰ Jiji jidi ndaga Nzambi a yidigile ha gu tu jiyisa mu njila ya pheve yenji. Pheve inyi ya nu jiya ndaga jikima jia giswegi jinyi jidi mutshima wa Nzambi. ¹¹ Nanyi wa nu jiya mabanza a muthu muko, gula ishi go kaka pheve yenji? Hene gu shi go ata muthu wa nu jiya mabanza a Nzambi, kaka pheve yenji. ¹² Ta zudile go pheve ya tangwa didi, uvi pheve ya Nzambi ta zangula, mukunda tu jiye mwa bonga ndaga jidi mu tu hwa Nzambi. ¹³ Tu shi mu zwelela go ndaga jia nu konda gu katuga gu mayele, uvi tu di mu zwelela ndaga jia nu katuga gu pheve ya Nzambi, pheve ya nu tendula ndaga jia kielega mu mayele a gi pheve. ¹⁴ Muthu wa gi pheve gia musunyi, gwa nu zula go ndaga jia nu katuga gu pheve ya Nzambi, mukunda wa nu yindula egi jidi ndaga jia uzoba. Gwa lendele go gu jiya ndaga jene mukunda udi nu funu ya ndaga yene kaka mu gi pheve. ¹⁵ Muthu yonu udi nu pheve ya Nzambi, mwene wa jiya gu swasugisa ndaga jikima, uvi gu shi go ata muthu wa jiya gu swasugisa ndaga jidi nu muthu muko. ¹⁶ Nanyi wa lendo jiya pheve ya Nzambi mukunda a longuge? Uvi etwe tu di nu mabanza a Kilistu.