¹ Khalenu mu katshi dia gu di tshigina, nu gu di zalula mukunda nu makapho a gi pheve, mukunda nu gu jiyisa sango ya bonga. ² Mukunda muthu yonu udi mu zwela mu ndinga inyi athu a shi mu jiya go gwa nu zwela go mukunda nu athu, uvi wa nu zwela gwa Nzambi, mukunda gu shi go ata muthu wa nu bagisa ndaga jene mukunda udi mu zwela ndaga jia kielega jia gi pheve jia gu swega. ³ Uvi muthu yonu udi mu jiyisa sango ya Nzambi udi mu leza gwa athu ha gu a salesa, ha gu a hwa gikhesa nu ha gu a katula khenda. ⁴ Yonu udi mu zwela mu ndinga udi mu di salesa ha khenji; yonu udi mu jiyisa sango ya Nzambi udi mu salesa inzo ya Nzambi ikima. ⁵ Ngu mu tshigina mu zwele mu ndinga inyi athu a shi mu bagisa go, uvi ngu mu tshigina egi mu khale nu mayele ha gu jiyisa sango yene. Muthu yonu udi mu jiyisa sango ya Nzambi wa balega muthu yonu udi mu zwela mu ndinga inyi athu a shi mu jiya go. Mwa bonga muthu muko a khale hene mukunda nu gu tendula ndaga yene ha gu salesa dibundu dikima. ⁶ Aphangi a mala nu a akhetu, tangwa ngu mu mi jila, ikhi idi funu yami gula ngu mu mi leza ndaga jinyi mu shi mu jiya tendula go. Ata funu ya jiyile gu khala ndo, gula ngu shi mu mi jiyisa go ndaga Nzambi a mu ngu leza, ndaga ya mayele, sango ya Nzambi to malongi. ⁷ Ata ima yiyi ya gu budila mijigi, mihembo, to gikwaga-kwaga ishi mu zola makelele a luswaswanu go, phila khi ta feto jiya egi gidi gima gigi gidi mu budiya? ⁸ Hene gula gilolo gi mu zola ndinga ishi ya bonga go, phila khi ta jiya gu yilama ha guya gu ita? ⁹ Phila imoshi gwa enwe; phila khi muthu wa lenda gu mi bagisa gula mudi mu zwela ndaga jia gula gu bagishiya go? Mba mu zwela uvi ata muthu mba gwa mi bagisa go. ¹⁰ Thotho yiyi idi nu ndinga jia vula. Uvi ndinga jene jidi nu disongidila. ¹¹ Uvi gula ngu shi mu bagisa go ndinga, ngu mu kituga nga nzenza gwa muthu yonu udi mu zwela, yonu udi mu zwela udi mu kituga nu mwene nzenza gwa eme. ¹² Phila imoshi gwa enwe, di hanenu ha gu kamba makapho wanyi adi mu katuga gu pheve ya Nzambi, khalenu mu di zalula ha gu kamba sha mambote a gu salesa dibundu. ¹³ Yonu udi mu samba mu ndinga inyi athu a shi mu bagisa go a sambe Nzambi mukunda Nzambi a mu hwe mayele a gu tendula ndaga jene jikima. ¹⁴ Mukunda gula udi mu samba mu ndinga inyi athu a shi mu bagisa go mutshima wami udi mu katshi dia isambu, uvi mabanza ami ndo. ¹⁵ Ikhi nga feto kita? Ngu feto samba nu pheve yami nu mabanza ami, nu gu yimba khunga nu pheve yami nu mabanza ami. ¹⁶ Gula udi mu samba kaka nu pheve, phila khi athu a jiya gu zwela egi: Amen konda ene gu bagisa ikhi udi mu katshi dia gu zwela? ¹⁷ Udi gaye mu kita gima gia bonga ha gu hana lukumu, uvi muthu yonu udi mu hata isambu yiyi u shi gaye mu mu salesa go ha gu jiya ndaga jinyi udi mu zwela. ¹⁸ Ngu mu vutula matondo gwa Nzambi mukunda ngu mu zwela mu ndinga inyi athu ako a shi mu bagisa go ya gu ngu balega, ¹⁹ uvi mu katshi dia inzo Nzambi nga nu tshigina gu zwela ngogo ji tano jia bonga, ke ngu zwele ngogo mafunda khama kumi jia ndinga inyi athu a shi mu bagisa go. ²⁰ Aphangi a mala nu a akhetu mu di kitula go ole mwa ana a mitumba a jiya go ata gima gia bola; khalenu ole mwa ana a mitumba, uvi mu mabanza enu mwa mambuta. ²¹ A sonegele gu mukanda wa Nzambi egi: "mba ngu mu zula nzenza ha gu zwela mu ndinga jia gi nzenza. Ata idi nganyi, athu ene mba a ngu vila go," phila Fumu adi mu zwela. ²² Hene gu zwela mu ndinga inyi athu a shi mu bagisa go idi gidimbu gia aphanyi, uvi gishi gidimbu gia a Kilistu go. Uvi gu jiyisa sango ya bonga gishi go gidimbu gia aphanyi, uvi gidi gidimbu gia a Kilistu. ²³ Hene, gula athu akima a dibundu a mu zwela mu ndinga inyi athu a shi mu bagisa go, gula athu wanyi a honze nu aphanyi eza mu ngila, mba ashi mu zwela go egi wawa enya malwi? ²⁴ Uvi, gula mudi mu jiyisa sango ya bonga, gwe za mu ngila muthu mu moshi wa honze nga ndo muphanyi mu moshi wa jiya gu tshigina ndaga jinyi adi mu vwa, mba udi mu sambeseya gu ndaga inyi mwene a vile, ²⁵ ndaga jenji jia giswegi mba jidi mu monega gu meso a athu akima, mba udi mu di tshiga gu meso ha gu samba Nzambi enji mba udi mu zwela egi ya kielega Nzambi udi mu katshi dietu. ²⁶ Aphangi a mala nu a akhetu, ikhi nga tshigina gu mi leza? Tangwa mwa nu di bungisa mu gimvuga, muthu mukima wa jiya gu khala nu khunga ya gu yimba, muko nu malongi a gu longa, muko nu ndaga Nzambi a mu leza ha gu leza athu. Muthu muko nu ndinga ya gu zwela nga ndo ndaga ya gu tendula. Kitenu ndaga jene mukunda nu gu salesa dingumba dikima. ²⁷ Uvi gula muthu mu moshi udi mu zwela ndinga inyi athu ako a shi mu bagisa go, enji gudi nu athu ako muyadi ta mu tatu adi mu zwela mumoshi mu moshi mu tangwa dienji idi mwa bonga muthu muko a khale hene mukunda nu gu tendula ndaga jinyi adi mu zwela. ²⁸ Uvi gula gushi go nu muthu wa gu tendula, mwa bonga gu hena tedie gu isambu yene, nganyi muthu mwene a zwele mwene ha khenji to nu Nzambi. ²⁹ Athu muyadi to mu tatu phamba a feto zwela mu phila egi athu ako a vwe mukunda a bagise ndaga muthu yonu adi mu zwela. ³⁰ Gula muthu mu moshi mu katshi diawo wa jiya gu tendula ndaga , mwa bonga a bembe gu zwela yonu udi mu zwela ³¹ Muthu mukima wa jiya gu jiyisa sango ya Nzambi mu phila egi athu akima a longuge, nu gu khala nu gikhesa. ³² Muthu yonu udi mu jiyisa sango ya Nzambi wa feto gu di yala mu ndaga adi mu zwela. ³³ Mukunda Nzambi wa tu phonele a gu jinga mu ngemba uvi gisaga-saga ndo, gu jinga mu phila a kilistu a nu jinga mu mangumba akima. ³⁴ Mu mangumba akima a ba kilistu, mukhetu wa feto hena tedie, gwa jiyile go gu zwela, uvi idi ya bonga mwene ha gu lemvuga mu phila ya sonegeye gu mukanda wa shigo. ³⁵ Gula akhetu a mu tshigina gu hula ndaga a hule gwa alumwiawo gu inzo. Mukunda idi sonyi gwa mukhetu ha gu zwela ndaga mu inzo Nzambi. ³⁶ Keti ndinga ya Nzambi ya nu katuga gwa enwe? Keti ndinga yene ye jile mukunda nu enwe ha khenu? ³⁷ Gula gudi nu muthu wa nu yindula egi udi muthu wa Nzambi to udi nu makapho wanyi a katugile gwa pheve ya nzambi, a jiye egi ndaga ngu mu sonega jidi shigo ya Fumu Yesu Kilistu. ³⁸ Gula gwa shi mu tshigina go ya mu talela mwene ha khenji, Nzambi mba gwa mu tshigina go. ³⁹ Enwe aphangi'ami, hagenu ngolo ha gu jiyisa sango ya Nzambi, uvi mwa jiyile go gu tuna gula athu a mu tshigina gu zwela ndaga jinyi athu ako a jiyile go gu bemba. ⁴⁰ Uvi bemba ndaga jikima ji salame mu njila ya bonga nu ya lujitu.