¹ Lulu ngagi ngu mu mi bambugisa aphangi'a mala nu a akhetu gu ndaga ya sango ya bonga inyi mwa tshiginile tangwa nga mi jiyishile, ha gu jinga mu katshi diayo. ² Mwa gulugile mu njila ya sango yene, gula mudi hata mu phila nga mi longele nayo, gula mwa i hatele go zwelenu egi mwa i tshiginile mu phamba. ³ Nga mi jiyishile sango yene ya gu balega funu mu phila eme ha khami nga i zudile egi; Kilistu wa file mukunda nu masumu etu akima mu phila ya sonegeye gu mukanda wa Nzambi egi: ⁴ Kilistu wa fundiye mu mavu gu nyima nzambi wa mu zugishile gu lufwa mu gilumbu gia gi tatu mu phila ya sonegeye gu mukanda wa Nzambi. ⁵ Gu nyima wa monegele thomo gwa Phetelo gu nyima w monegele gwa athumwa akima kumi nu muyadi. ⁶ Mu mbala imoshi, wa monegele gwa a kilistu khama nu mu tano khutu gu balega thalo yene. A kilistu a vula ti nu magino adi kaka nu monyo, uvi ako a file gale gawo. ⁷ Gu nyima wa monegele gwa jake nu gwa alongogi akima. ⁸ Gu nyima wa ngu zogele, ata nga butugile matshombe, ⁹ mukunda ngu shi mu monana gami nu funu go mu katshi dia a thumwa, nu sonyi ha gu tamegeya egi thumwa, mukunda nga monesele dingumba dia Nzambi phashi. ¹⁰ Uvi mu khenda jia Nzambi, ngu di gami phila ngu di mu khenda jia Nzambi, khenda jinyi Mwene a ngu monesele jishi jidi jia phamba. Nga kitile gisalo gia ngolo gia gu balega a thumwa akima. Ishi eme go, uvi mu khenda jia Nzambi udi mu katshi diami. ¹¹ Hene, nga eme, nga ene, sango tu di mu longa idi inyi ta kwikile. ¹² Lulu ngagi tu di mu longa Kilistu yonu wa futumugile, phila khi athu ako mu katshi dienu adi mu zwela egi gu futumuga gwa athu a fwa mba gu khala go? ¹³ Uvi gula lufutumugu mba lu khala go, idi mu monega egi Kilistu gwa futumugile go. Gula gwa futumugile go, ¹⁴ malongi etu adi a phamba, lukwikilu lwenu nji ludi lwa phamba. ¹⁵ Gula idi nganyi etwe tu di ta ba themwe a luvunu gu ndaga ya Nzambi, mukunda gi themwe gietu gidi gia luvunu mukunda ta zwelele egi, Nzambi wa zugishile Kilistu gu lufwa, uvi gwa mu zugishile go. ¹⁶ Mukunda gula lufutumugu lwa athu gu thugu, Kilistu nji gwa futumugile go. ¹⁷ Gula Kilistu gwa futumugile go lukwikilu lwenu ludi lwa phamba, nganyi mudi mu jinga mu katshi dia masumu. ¹⁸ Nganyi athu wanyi a file mu Kilistu a file gawo sha. ¹⁹ Gula tu di mu haga mutshima gwa Kilistu mu lujingu lwa phamba, mba tu khala athu a phamba mu katshi dia athu akima. ²⁰ Uvi idi ya kielega egi Kilistu wa futumugile gu lufwa, Mwene udi muthu. wa thomo mu katshi dia athu wanyi a file, ²¹ mu phila lufwa lwa ngidile mu njila ya muthu mu moshi, kaka yene inyi lufutumugu lwe jile mu njila ya muthu mu moshi. ²² Kaka mu njila ya Adam, athu akima a file, mu njila ya Kilistu athu akima adi nu monyo. ²³ Muthu nu muthu mu phila yenji; Kilistu muthu wa thomo; wanyi adi mu kwikila gwa mwene mba adi mu khala nu monyo tangwa mba eza mu vutuga. ²⁴ Gu nyima suga ya ndaga jikima mba jidi muza tangwa Kilistu mba a sugisa ba wanjo akima wanyi adi nu giyega gia phila nu phila, nu tangwa mwene mba a hana Gifumu gwa Tata Nzambi. ²⁵ Mukunda Kilistu mba u yala ti nu gunu Nzambi mba a haga mbeni jenji gosha malu a Kilistu mukunda a a diate. ²⁶ Lufwa ludi mbeni wa suga wa Kilistu mba a shiya. ²⁷ Mukanda wa Nzambi udi mu zwela egi : Nzambi wa hagele mbeni jenji jikima gosha malu a Kilistu." Uvi gisono jiji "jikima ji shi mu leza go egi nu Nzambi mba udi mu haga mbeni jenji gosha giyega gia Kilistu. ²⁸ Uvi gula Nzambi wa haga mbeni jenji gosha giyega gia Kilistu, gwa suga mukunda mwene ha khenji mona mba udi mu lemvuga gwa Nzambi yonu wa hagele ima ikima gosha giyega gia Mona; nganyi Nzambi mba u yala ima ikima. ²⁹ Gula ishi nganyi go, ikhi idi funu ya athu wanyi a nu zula mbotiga mukunda nu athu wanyi a file ? Gula ndaga a nu zwela jidi ja kielega egi athu wanyi a file a nu futumuga go gu lufwa, mukunda nu ikhi athu a nu zula mbotiga mukunda nu athu a file ? ³⁰ Funu wetu idi ikhi tangwa tudi mu kamba gigonza tangwa dikima? ³¹ Aphangi a mala nu a akhetu enwe mudi lukumu lwami mu katshi dia Yesu Fumu wetu, ngu mu zwela ngagi: nga nu kala ha gigonza ilumbu ikima. ³² Ikhi idi nuta yami, mu phila ya gi muthu, gula ngu mu lwa ita nu mbiji gu dimbo dia Efezo, gula athu a fwa mba ashi mu futumuga go? Tu die tu nwe mukunda hamene mba tu mu fwa." ³³ Athu a mi dimbi go, mukunda: " mafuta a bola adi mu bemba ikalulu ya bonga." ³⁴ Kalenu nu ngindu ja bonga ! Tu jingenu mu njila ya magana! Bembenu masumu. Mukunda athu ako mu katshi dienu a jiya Nzambi go, ngu mu zwela nganyi mukunda nu gu mi monesa sonyi. ³⁵ Athu ako adi mu hula egi: " phila khi athu wanyi a file mba a futumuga ? Phila khi mwila wawo mba u kala? ³⁶ Muthu udi mu hula nganyi udi wa unga! Gula wa kuna khenyi mu mavu, ya jiyile go gu zoga gula ya file go. ³⁷ Khenyi inyi wa kuna idi khenyi phamba, tangwa diko khenyi ya ble, nga ndo khenyi ya phila iko Uvi ishi gibeni gimenina ginyi mba gi mena go. ³⁸ Nzambi wa nu hana khenyi inyi mwene a tshigina gu hana, konso khenyi wa nu gu i hwa mwila wayo. ³⁹ Ima ya monyo ishi nu mwila umoshi go. Uvi diswaswanu didi gwene athu adi mu mwila wawo wa phila iko, mbiji jidi nu mwila wajo wa phila iko, tunjila tudi nu mwila yato wa phila iko ⁴⁰ Mwila iko idi gosa , mwila iko idi haha ha mavu. Uvi lukumu lwa mwila ya gosa ludi lwa luswaswanu nu lukumu lwa mwila idi haha ha mavu. ⁴¹ Tangwa didi nu lukumu lwadio lwa phila yadio. Ngonda idi nu lukumu lwa phila iko, themwa nji jidi nu lukumu lwa phila iko: mu katshi dia themwa lukumu ludi lwa phila nu phila. ⁴² Lufutumugu gwa athu gu lufwa mba ludi mu kala kaka mu phila yene. ⁴³ Gula a funda muthu wa fwa, mwila wenji u feto fukha, uvi gula muthu wa futumuga gu lufwa, mwila unu mba a kala nawo mba ushi mu fukha go. Muthu yonu wa fwa, mwila wenji u shi nu lukumu go. ⁴⁴ Muthu yonu wa fwa gu nyima wa fundiya, mwila wenji udi wa gi muthu, uvi muthu yonu wa futumuga, mwila wenyi udi wa gi pheve. ⁴⁵ Mukunda nu nganyi idi ya gu sonega egi: Muthu wa thomo, Adam, wa kitugile monyo wa lujingu. Adam wa suga wa kitugile pheve ya gu hana lujingu. ⁴⁶ Uvi gima ginyi gia gi pheve ishi go muthu wa thomo, udi mbiji, ginyi gidi gia gi pheve gi muza gu nyima. ⁴⁷ Muthu wa thomo wa katugile mu mavu, muthu wa gibagi wa katugile gosa. ⁴⁸ Phila idi mavu, phila idi athu a ha mavu. Phila idi gosa, phila idi wanyi a nu jinga gosa. ⁴⁹ Hene phila imoshi ta zudile gifwanisu gia mavu, mba tu zula gifwanisu gia gosa. ⁵⁰ Ndaga ngu mu zwela, aphangi, egi gi muthu nu menga mba a zudi go gifumu gia Nzambi, enji mwila wuwu wa gi muthu wa jiyile go gu kala nu monyo mvula nu mvula. ⁵¹ Tala, ngu mu mi leza gima gi moshi gia giswegi: athu ako mu katshi dienu mba a mu fwa , uvi athu ako mba a shi mu fwa go. ⁵² Mu tangwa dimoshi, mu gu kamuna diso, nu ha suga ya ngunga. Ngunga mba i mu bula, athu a fwa mba a futumuga go nu mwila wa gi muthu, enji etwe mba tu kala nu monyo mvula nu mvula. ⁵³ Mukunda mwila wuwu wa lufwa mba u sudiga mwila wa konda gufwa, enji mwila wuwu wa lufwa mba u shi mu zula mwila wa fwa go. ⁵⁴ Uvi tangwa didi mwila wuwu wa fukha, mba ushi mu fukha go, enji mwila wuwu wa nu fwa mba u shi mu fwa go,hene mba gu lungisama ndaga ja sonegeye gu mukanda egi : " Gu nunga mba gu mu minya lufwa. ⁵⁵ "Eye lufwa " keti wa nunga ? Ngolo jaye ja gu shiya athu jidigi?" ⁵⁶ Ngolo ja lufwa ja nu katuga gu masumu, enji ngolo ja masumu jidi gu hata shigo. ⁵⁷ Uvi Nzambi a mi vile khenda, mwene a tu nungise mu njila ya Fumu wetu Yesu Kilistu. ⁵⁸ Hene, aphangi nga tshigina, kangenu mutshima, kalenu nu ngolo, nu gu kita mwa bonga gisalo gia Fumu, nu gu jiya egi gisalo gietu mba gi kala gia phamba go.