¹ Bampangi, nsila ya ntima na munu mpe lusambulu na Nzambi samuna beno, beno fuanda yak u vulusua.

² Mu kena tela bau kimbangi , ba kena vema na Nzambi, kansi bak ena mayele ve: ³ Na ku zaba lunungu ve ya Nzambi mpe ku sosa na ku tula kituadi na lunungu, ba me kondua ku mi kitisa na tuala ya lungu ya Nzambi; ⁴ Samuti Klisto kele na fin ya nsiku, samuna ndungusulu ya bayina ndimaka. ⁵ Na yau, Mose kena tadila lunungu mutindu ya mekatuka na nsiku, Muntu ke tula mambu yayi na mavanga yandi ke zinga na yau. ⁶ Kansi tala wapi mutindu kena kutubila lunungu me katuka na kiminu : Kutuba ve na ntima yange : Nani ke kota na dizulu ? Na ku kitisa Klisto ; ⁷ Nani ke kita na dibulu ya mpinda ? Na ku kuenda tombula Klisto na kati ya bantu ya kufua. ⁸ Yinki beto lenda tuba ? Mambu kele pene pene yange, na yinua ya nge mpe na ntima yange. Kana mambu ya kiminu beto ke longisaka. ⁹ Kana nge me ndima masumu ya nge na yinua Mfumu Yesu, mpe kana nge me ndima na ntima na nge ke Nzambi vulukisaka yandi na bayi kufuaka, nge ke vulusua.

¹⁰ Samuti na kundima na ntima ke kumisaka na lunungu, mpe na kundima masumu na yinua ke nataka na mpulusu, mutindu me tuba masonukua, ¹¹ Konso muntu me ndimina yandi ke fuisua nsoni ve. ¹² Disuasanu yi kele ve, na kati ya Nyudayo mpe ba Elene, samuti bau nionso kena Mfumu mosi, kele kimvuama samuna bantu nionso ke bombidilaka yandi. ¹³ Konso muntu ke bombidila nkumbu ya Mfumu ke vulusua. ¹⁴ Wapi mutindu beto lenda bombidila muntu yina beto ndimina ve? Mpe wapi mutindu beto lenda ndimina yina ba kuwaka ba tubila bau ve? Wapi mutindi ba lenda tubila bau ve kana muntu longisa bau ve? ¹⁵ Mpe wapi mutindu beto lenda baka minlongi kana ba fidisa bau ve? Mutindu ya sonamaka: Ya kele mbote na makulu ya bayina kena nata nsangu ya yenge, ya bayina kena ku nata nsangu ya mbote! ¹⁶ Kansi bantu nionso ndimaka ve na Nsangu ya Mbote. Bosi Yesaya tubaka : Mfumu, nani ndiminaka Nsangu ya Mbote beto longisaka ? ¹⁷ Na yau kiminu ke kuizaka na yina betoke kuwaka, mpe yina beto ke kuwaka ke katukaka na mamabu ya Klisto. ¹⁸ Kansi me tuba : Ba ku waka ve ? Na mutindu ya nkaka ! Ba ndinga ya bau wakanaka na yinza nionso, mpe malongi ya bau kuendaka ti na nsuka ya ntoto. ¹⁹ Kansi me tuba : Isaeli zabaka yau ve ? Mose, ya ntete, tubaka : Muke lamusa kimpala ya beno na yina kele makanda, mu ke sokusa nganzi ya beno na dikanda mosi ke na mayele ve. ²⁰ Mpe Yesaya na ku kumisa luzayu yaku tuba : Mu monanaka na bau vuandaka sosa munu ve. Mu kukimonikisa na bayina vuandaka lomba munu ve. ²¹ Kansi na mambu ya Isaeli yandi me tuba : Mu zibulaka maboko bilumbu nionso na dikanda ya yintu ya ngolo, mpe ku manga mambu.