¹ Yesu Klisto bandaka diaka kulonga penepene ya yimbu. Na nkangu ya nene ya bantu kutakanaka kisika yandi vuandaka, yandi kotaka mpe Yandi vuandaka na kati ya nlungu na zulu ya yimbu, nkangu nionso vuandaka na disimu. ² Yandi longaka bau mambu mingi na bingana, mpe Yandi tubaka na malongi na yandi. ³ Beno kuwa. Nkuni mosi bimaka samu na kukuna. ⁴ Ntangu yandi vuandaka kukuna , ndambu ya mbuma sotukaka na nzila ; bandeke kuizaka , mpe ba kudiaka yau. ⁵ Ndambu yankaka sotukaka na kisika ya mabanga, vana kele ntoto mingi ve ya menaka na mbala mosi, samu ntoto vuandaka ya mpinda ve. ⁶ Kansi ntangu muini bimaka, ya yokanaka mpe ya yumaka samu na kukondua mianzi. ⁷ Ndambu yankaka kubuaka na kati ya bansende ; bansende kulaka mpe fietikisaka yau mpe ya butaka diaka mbutu ve. ⁸ Ndambu ya nkaka kubuaka na ntoto ya mbote ; ya butaka mbuma yina vuandaka kukula mpe kuyunduka mpe ya butaka makumi tatu , makumi sambanu, mpe nkama mosi na yinti mosi. ⁹ Yesu tubaka diaka: Muntu yina ke na makutu ya kuwila, yandi kuwa. ¹⁰ Ntangu yandi vuandaka yandi mosi, bayina zungidila yandi na minlonguki kumi na zole, ba yuvusaka yandi na yina metala bingana. ¹¹ Yandi tubilaka bau : Na ben onde me pesama disuekamu ya kimfumu ya Nzambi, kansi na bayina ke na nganda, nionso ke tubama na bingana. ¹² Samu ti na kutala bau ke na kumona, kansi bak e na kuvisa ve, mpe na kuwa ba k e na kuwa kansi ba ke na kubakusa ve, samu ba vitula mayele ve mpe masumu na bau ya lemvukulua ve. ¹³ Yandi zabisaka bau diaka : Beno ke na kubakusa bingana yayi ve ? Yinki mutindu benoke bakusila bingana nionso? ¹⁴ Nkuni ke kunaka mambu ya Nzambi. ¹⁵ Bantu yankaka kele penepene ya nzila sika mambu ya Nzambi kunuakana; ntangu ba kuwaka yau, na mbala mosi satana me kuiza mpe me katula yina kunuaka na kati na bau. ¹⁶ Ba yankaka, mutindu mosi, ba yambulaka mbuma na bisika ya mabanga, na ntangu ba ke na kuwa mambu ya Nzambi, ba yambaka yau ntete na kiese. ¹⁷ Kansi bakele na mianzi ve na kati na bau mosi, ba ke ya kusiama ve, mpe ntangu nkuamusu to nzomono me kuiza samu na mambu ya Nzambi, ba me baka nzila ya kuta sakuba. ¹⁸ Ba yankaka ke na kuyuma mbuma na kati ya bansende ; bau yina ke na kuwa mambu ya Nzambi, ¹⁹ Kansi na bau, mayindu na mambu ya ntangu yayi, mpukumunu ya bimvuama mpe ba nsatu ya ngolo ya mambu ya nkaka ya yimbi kena ku fietikisa mambu ya Nzambi mpe kuzangisaka yau mbuma. ²⁰ Ba yankaka ke na kuyamba mbuma na ntoto ya mbote ; bau yina ke na kuwa mambu ya Nzambi, kuyamba yau mpe kubuta mbuma makumi tatu, makumi sambanu, mpe nkama mosi na yinti mosi. ²¹ Yandi tubilaka bau diaka : Ba ke nataka muinda smu na kutula yau na yinsi ya meza to na yinsi ya mfulue? Ya kele samu na kutula yau na zulu ya mez ve? ²² Samu, kima mosi ve ke ya kusuama yina lenda monukusua ve, disuekamu mosi ve lenda kondua kuzabakana. ²³ Muntu yina ke na makutu ya kuwila yandi kuwa. ²⁴ Yandi zabisaka bau diaka : Beno keba na yina beno ke kuwa, bake tezila beno na kitezo yina beno ke tezilaka, mpe bake buedila beno. ²⁵ Samu ti, bake pesa na muntu yina kena yau, kansi, na muntu yina ke na yau ve bake katusa ata yina ke na yandi. ²⁶ Yandi tubaka diaka: Kimfumu ya Nzambi me fuanana lokola muntu me kuna mbuma na ntoto; ²⁷ Yandi vuanda ya ku leka to ya ku lamuka, mpipa to muini, mbuma ke bima na ntoto mpe yake kula yandi ke zaba ve wapi mutindu yake salamana. ²⁸ Ntoto ke butaka na yandi mosi ntete matiti bosi yinti, bosi mbuma nionso ke bimaka na yinti. ²⁹ Mpe na ntangu mbuma me tela, yandi me tinda bisadi, samu ntangu ya kubuka mbuma mekoka. ³⁰ Yandi tubaka diaka: Na yinki kima beto lenda kokinisa kimfumu ya Nzambi? T na yinki bingana beto lenda monikisa yau?

³¹ Ya me kokana na mua mbum aya mutade (yau mbuma me luta fioti na ba mbuma nionso). ³² Kansi ntangu ba me kuna yau na ntoto ya me kula, ya me kuma yinti ya nene kuluta ba ndunda, mpe yak e bimisaka bitavi ya nene yina bandeke ba lenda kuiza vuanda na yinsi ya mpozi na yau. ³³ Na bingana mingi ya mutindu yina, yandi vuandaka longila bau mambu ya Nzambi, mutindu kitezo ya mpisulu ya ba yina vuandaka kuwa yandi. ³⁴ Yandi vuandaka tubila bau ve kuzanga bingana; kansi, na kisika ya bau mosi yandi vuandaka visikisa nionso na minlonguki na yandi. ³⁵ Kaka na kilumbu yina, na nkokila, Yesu me zabisa bau : Beto kuenda na disimu ya nkaka ya yimbu. ³⁶ Na manima ya kuvutula nkangu ba me nata yandi na nlungu yina yandi vuandaka ; ba nlungu yankaka mpe vaundaka na yandi. ³⁷ Mupepe ya ngolo fulaka mpe mayo vuandaka bula na nlungu mpe zonaka fuluka na maza. ³⁸ Kansi Yesu vuandaka ya ku leka na manima ya nlungu na zulu ya mfika. Bau lamusaka yandi mpe batubilaka yandi : Nlongi, ya kena kusala nge mpasi ve samu beto zona dinda ?

³⁹ Ntangu yandi me lamuka, yandi me semba mupepe mpe yandi tubaka na yimbu : Vuanda sui ! Bika makelele ! Mpe mupepe kitaka, mpe luvuvamu ya nene vuandaka. ⁴⁰ Bosi yandi tubilaka bau : Samu na yinki beno ke wonga mutindu yayi ? Wapi kiminu na beno ? ⁴¹ Wongaya nene bakaka bau, mpe ba tubanaka bau na bau : Nani muntu yayi, mupepe mpe yimbu ke na ku tumamana ?