¹ Nani manima ya mua bilumbu, Yesu vutukaka na mbanza ya Kapenaumi mpe bantu kuwaka ti yandi vuandaka na kati ya yinzo.

² Nkangu ya nene kutakanaka na ntuala ya yinzo mpe bisiska vuandaka diaka ve na ntuala ya muelo samu na bau nionso. Yesu vuandaka longisa bau mambu ya Nzambi. ³ Bantu yiya kuizaka na Yesu, mpe banatinaka yandi dikoka.

⁴ Lokola bau vuandaka lenda ve kukutana Yesu samu bantu lutilaka mingi, batobulako muanzu ya yinzo yina yandi vuandaka. Mpe ba kitisaka kipoyi yina ba natinaka yandi. ⁵ Ntangu Yesu monaka kiminu ya bantu yina, yandi tubaka na dikoka: Muana na munu, masumu y ange me yambudulua. ⁶ Ndambu ya minsoniki vuandaka na kisika yina kanisaka na kati ya bantima na bau: ⁷ Yinki mutindu muntu yayi ke na kutuba mutindu yayi? Yandi ke na kubundula nsiku ya Nzambi, samu ti nani lenda yambudila masumu, kana yandi mosi Nzambi ve? ⁸ Lokola Yesu bakulaka mbalamosi mabanza na bau, yandi me tuba : Samu na yinki beno ke na mabanza ya mutindu yayi na bantima na beno? ⁹ Yinki diambu ke petepete na kutubanadikoka: Masumu na nge me yambudulua, to na kutuba na yandi : Baka mfulu na nge mpe tambula? ¹⁰ Kansi, samu beno zaba ti Muana ya Muntu ke na lulendo ya kulemvukila masumu awa na ntoto: ¹¹ Mu me tubila nge dikoka yayi telema, baka mfulu na nge, mpe kuenda na yinzo na nge.

¹² Kaka na ntangu yina yandi telemaka, yandi bakaka mfulu na yandi, mpe yandi bimaka nameso ya bantu nionso. Na yina, bau nionso yitukaka mpe kembisaka Nzambi na kutuba : Beto me mona ntete ve mambu ya mutindu yayi. ¹³ Yesu bimaka diaka na nkangu na yimbu. Kangu nioso kuizakan na yandi, mpe yandi vuandaka longisa bau. ¹⁴ Ntangu yandi vuandaka luta, yandi monaka Levi muana ya Alefe, yakuvuanda na kisika yina bake futaka mpaku. Yesu zabisaka yandi : Landa munu ! Levi telemaka mpe landaka yandi. ¹⁵ Na ntangu Yesu vuandaka kudia na meza na yinzo ya Levi, bantu yina ke futisaka mpaku mpe bantu mingi ya nkadulu ya yimbi vuandaka kudia kintuadi na yandi mpe minlongoki na yandi ; samu ti bantu mingi vuandaka landa yandi. ¹⁶ Ntangu minsoniki na ba falisi monaka Yesu vuandaka kudia kintuadi na bantu yina, bau zabisaka minlongoki na yandi : Samu na yinki yandi ke na kudia mpe kunua kintuadi na bantu ke futisaka mpaku mpe bantu ya nkadulu ya yinki ? ¹⁷ Yesu kuwaka kuandi bau mpe tubaka : bantu ya mavimpi kele na nsatu ya munganga ve, kansi bambevo. Mu kuizaka ve samu na kubokila bantu ya kudedama, kansi bantu ya masumu. ¹⁸ Minlongoki ya Yoani mbotiki mpe bafalisi vuandaka mina nsoki. Ba kuizaka zabisa Yesu : Samu nani minlonguki ya Yoani mpe bafalisi ke minaka nsoki, kansi, minlonguki na nge ke minaka nsoki ve ? ¹⁹ Yesu vutulaka bau : Bakundi ya ditoko yina ke na kuela balendaka mina nsoki ntangu yandi ke ntete na bau. Ntangu nionso bake na kintuadi na yandi, balenda mina nsoki ve. ²⁰ Kansi bilumbu ke kuiza yina bake katula ditoko kasi nau, bosi bake mina nsoki. ²¹ Muntu mosi ve ke tungaka kitende ya nlele yimpa sika mosi na nlele ya ntama, kana ve, kitende ya nlele ya yimpa ke pasuka yin aya nyama mpe dibulu ke lutila nene. ²² Muntu mosi ve ketulaka vinu ya yimpa na bamvungu ya nyama. Kana ve vinu ke pasula ba mvungu mpe vinu na bamvungu ke beba. Kasi bake yilaka vinu ya yimpa na ba mvungu ya yimpa. ²³ Kilumbu mosi ya lumingu. Yesu vuandaka luta na kati ya bilanga ya ble, mpe minlonguki na yandi vuandaka buka bambuma ya ble. ²⁴ Bafalisi tubilaka yandi : Tala, samu na nini baka na kusala yina lendaka salama ve na kilumbu ya lumingu ? ²⁵ Yesu vutudilaka bau : Beno tanga ntete ve yina salaka Davidi, ntangu yandi vuandaka na nsukumunu mpe nsatu kangaka yandi, yandi na bantu vuandaka na yandi; ²⁶ Wapi mutindu yandi kotilaka na kinlongo na ntangu Abiatali vuandaka Mfumu ya banganga Nzambi; mpe yansi kudiaka mampa yina yekuluaka na Nzambi ? Yina banganga Nzambi kaka lendaka kudia, Kansi yandi kabulaka mpe yau na bayina vuandaka na yandi! ²⁷ Bosi Yesu me tubila bau : Kilumbu salamaka samu na muntu, kansi muntu salamaka ve samu na kilumbu ya lumingu. ²⁸ Na yau, muana ya muntu kele mpe Mfumu ya kilumbu ya lumingu.