¹ Mbadukulu ya Nsangu ya Mbote ya Yesu Klisto Muana ya Nzambi. ² Mutindu sonikaka mbikudi Yesaya : Tala mu me tinda ntumua na munu na ntuala na nge samu na kubongisila nge nzila.

³ Yandi kele ndinga ke na kuboka na yinsi ya kuyuma (dikanga) na kutubaka ti: Beno bongisa nzila ya Mfumu, beno toma lendumuna ba nzila na yandi. ⁴ Yoani me kuiza, yandi me banda ku botika na yinsi ya kuyuma mpe kulonga malongi me tadila mbotokolo mpe mpilulu ya mayele samu na ndemvokolo ya masumu. ⁵ Yinsi yonso ya Yuda mpe bantu ya Yelusami vuandaka kuenda na yandi ; mpe ba vuandaka tambudila masumu na bau, mpe ba vuandaka baka mbotokolo na nzadi ya yodani. ⁶ Yoani vuandaka vuata bilele ya mika ya kamela na nsinga ya mpusu ya kibulu na luketo na yandi. Yandi vuandaka kudia makonko na niosi ya mfinda. ⁷ Yandi vuandaka longa, na kutubaka ti : Muntu ke na kuiza na manima na munu yandi me lutila munu na lulendo mpe muke ya kufuana ve ata na ku nkokama (ku yinama) samu ti mu zibula nsinga ya ba sapaatu na yandi. ⁸ Munu mu me botikila beno na maza ; kansi yandi ke kuiza botikila beno na Mpeve ya Nlongo. ⁹ Na bilumbu yina, Yesu katukaka na mbanza Nazaleti na kizunga ya ngalili, mpeYoani botikaka yandi na nzadi ya yodani. ¹⁰ Na ntangu yandi vuandaka bima na maza, yandi monaka mazulu zibukaka, mpe Mpeve ya Nzambi kitilaka yandi mutindu dibembe, ¹¹ Mpe ndinga wakanaka na mazulu : ‘’Nge kele muan’amunu ya luzolo, yina muke zolaka mingi. ¹² Kaka na ntangu yina, Mpeve ya Nzambi nataka Yesu na yinsi ya kuyuma, yandi vuandaka kuna bilumbu makumi yiya, mpe Satana vukumunaka yandi, ¹³ Yandi vuandaka sika mosi na bibulu ya mfinda, mpe ba mbasi ya Nzambi vuandaka sadilaka yandi. ¹⁴ Na manima ya nkangulu ya Yoani, Yesu kuendaka na Ngalili, mpe vuandaka na kulongisa Nsangu ya Mbote ya Nzambi.

¹⁵ Yandi vuandaka tuba: Ntangu me koka, mpe kimfumu ya Nzambi me kuma penepene. Beno balula nkatulu ya beno, mpe beno kuikila Nsangu yaMbote. ¹⁶ Ntangu yandi vuandaka kuluta penepene ya yimbu ya Ngalili, yandi monaka Simoni na Andele, bau vuandaka kuloza dikonde na yimbu; samu ba vuandaka minlobi ya mbizi.

¹⁷ Yesu tubaka na bau: Beno landa munu, mu ke kumisa beno minlobi ya bantu. ¹⁸ Na mbala mosi, bau bikaka makonde na bau mpe ba landaka yandi. ¹⁹ Na ntangu yandi me pusana fioti na ntuala, yandi me mona Yakobi muana ya Zebedayi, na Yoani, mpangi na yandi, bau diaka vuandaka na kati ya nlungu mpe bau vuandaka kulonda makonde.

²⁰ Na mbala mosi, yandi me bokila bau ; mpe, bau bikaka tata na bau Zebedayi na kati ya nlungu kintuadi na bisadi, mpe bau landaka yandi. ²¹ Bau kuendaka na Kapenaume mpe na kilumbu ya lumingu, Yesu kotaka ntete na yinzo ya lusambulu, mpe yandi vuandaka kulonga. ²² Bau yitukaka samu na ndongosolo n’andi, samu yandi vuandaka kulonga mutindu yina muntu yina ke na lulendo, kansi mutindu ya minsoniki na bau ve. ²³ Na kati na yinzo’a bau ya lusambulu monanaka mntu mosi vuandaka na mpe ya yimbi, mpe bokaka (mutindu yayi): ²⁴ Yinki diambu kele beto na nge, Yesu ya Nazaleti ? Nge me kuiza fukisa beto. Munu me zaba ti nge kele musantu ya Nzambi. ²⁵ Yesu Klisto me semba mpeve ya yimbi, yandi me tuba : Kanga yinua nge, mpe bima na nzutu ya muntu yayi. ²⁶ Bosi mpeve ya yimbi bimaka na kuningisa yandi na ngolo nionso, mpe na kuboka na ndinga ya ngolo. ²⁷ Bau nionso pamukaka, mpe kukiyuvulaka bau na bau : Yinki yayi? Ndongolo ya yimpa! Yandi ke na ku kuka(ku tinda) na ba mpeve ya yimbi na lulendo nionso, mpe yau ke na ku tumamana yandi! ²⁸ Bosi, na mbala mosi, nsangu n’andi muanganaka na bifulu nionso me zungidila Ngalili. ²⁹ Ntangu ba bimaka na nganda ya yinzo ya lusambulu, ba kuendaka: Yakobi na Yoani na yinzo ya Simoni mpe ya Andele; ³⁰ Kuna na yinzo ya Simoni, bokilo n’andi vuandaka ya kuleka, samu yandi vuandaka na yukuyuku; na mbala mosi ba zabisaka Yesu. ³¹ Bosi yandi pusanaka, yandi me simba mbevo na diboko samu na kulamusa yandi, mpe na mbala mosi yukuyuku manisaka. Bosi yandi (bokilo ya Simoni) sadilaka bau. ³² Na nkokila, ntangu buisi yilaka, ba natinaka Yesu ba mbevo nionso mpe bantu yina vuandaka na ba mpeve ya yimbi. ³³ Bantu nionso sanganaka na ntuala ya muelo ya mbanza n’andi.

³⁴ Yandi belusaka bantu mingi yina vuandaka na bimbevo ya mutinduna mutindu, yandi bimisaka diaka ba mpeve ya yimbi mpe yandi pesaka bau ve yinsua ya kutuba samu ti ba zabaka yandi. ³⁵ Na nsuka, ntangu kitombe vuandaka ntete yandi telemaka mpe yandi kuendaka na yinsi ya kuyumana kusambila. ³⁶ Simoni na bayina vuandaka na yandi kuendaka sos’andi. ³⁷ Na ntangu ba monak’andi, ba zabisak’andi : Bantu nionso ke na kusosa nge. ³⁸ Yandi vutudilaka bau : Beto kuenda sika ya nkaka na babuala ya penepene. Mu fueti longa mpe kuna samu ti yau mu kuizilaka.

³⁹ Mpe yandi kuendaka na ba yinzo ya lusambulu na kizunga nionso ya Ngalili mpe yandi bimisaka ba mpeve ya yimbi. ⁴⁰ Muntu mosi ya buazi kuizaka na Yesu. Yandi fukamaka na ntuala n’andi, mpe yandi bombidilak’andi na kutubaka : Kana nge zona, nge lenda vedisa munu. ⁴¹ Yesu fuilk’andi kiadi lambulaka diboko n’andi, yandi simbak’andi mpe tubaka : Mu me zona yau, vedila. ⁴² Kaka na ntangu yina, buazi ya muntu yina manisaka, mpe yandi vedilaka. ⁴³ Kaka nakilokula yina, Yesu vutulaka yandi mpe kebisaka yandi mbote mbote na kutubaka, ⁴⁴ Kutubaka yau na muntuve.Kansi kuenda kuki monisa na nganga Nzambi, mpe pesa minkailu ya luvedoso yina Mose tindaka samu yavuanda kimbangi samu na bau. ⁴⁵ Kani muntuyina kuendaka mpe muangisaka na bisika nionso mambu yina kuminaka yandi. Samu na yau, Yesu lendaka diaka kota na yuti na manga mosi ve. Yandi kumaka kuvuanda na nganda ya mbanza, na bisika yina ke na bantu ve, mpe bantu vuandaka bimina bisika nionso samu na ku kuenda sika yandi vuandaka.