¹ Yesu kotaka na bota, me sabukaka yimbu, mpe kuendaka na mbanza na yandi. ² Mpe tala, ba natinaka yandi muntu ya ku tila mianzi lekusuaka na mfulu. Ntangu Yesu monaka kiminu na bawu, me tuba na muntu ya ku tila mianza: Muana na munu, vuata kibakala, masumu na nge me lemfukulua. ³ Na diambu yina, ndambu ya minsoniki tubaka na kati ya ba ntima na bawu: Muntu yayi kena ku tiaka. ⁴ Bosi ntangu Yesu, zabaka mabanza na bawu, me tuba: Samuna inki beno kele na mabanza ya yimbi kati ya bantima na beno e? ⁵ Samu, nini me luta pepele na ku tuba: Masumu na nge me lemvukulua, to na ku tuba: Telama nge, mpe tambula e? ⁶ Nzoka, samu beno zaba ti Muana ya muntu kele na kilendo awa na ntotoya ku lemvukila masumu: Yesu me tuba na muntu ya ku tila mianzi, telama nge, baka mfulu na nge, mpe kuenda na yinzo na nge. ⁷ Yandi telamaka, mpe yandi kuendaka na yinzo ya ynadi. ⁸ Ntangu nkangu monaka mutindu yina, nkangu ya mvimba bakamaka na wonga, mpe ba zitisaka Tata Nzambi, muntu pesaka kilendo ya mutindu yayi na bantu. ⁹ Ku katuka vana, yandi kuendaka ntama, Yesu monaka muntu mosi na nkumbu ya Matai, ya kuvuanda kisika ba ke futilaka mpaku. yesu me tubila yandi: Landa munu. Matai telamaka, mpe landaka yandi. ¹⁰ Lokola Yesu vuandaka na meza na kati ya yinzo, tala, mimvakusi mingi mpe na bantu ya luzingu ya yimbi kuizaka vuanda na meza kintuadi na yandi na ba ntumua na yandi. ¹¹ Ntangu ba falisi monaka mutindu yina, ba tubaka na ba ntumua ya yandi: Samuna inki Nlongi na beno kena kudia na mimvakusi mpe na bantu ya luzingu ya yimbi e? ¹² Kansi Yesu kuwaka yau, yandi me tuba: ba yina kele mavimpi ikele na nsatu ya nyakisi ve, kansi ba mbevo. ¹³ Beno kuenda, mpe beno longuka yina zola tuba: Mu ke sepelaka na kinkenda, kansi na nkayilu ya kuyokua ve. Samu mu kuizaka sosa bantu ya lunungu ve, kansi bantu ya masumu. ¹⁴ Na yau, ba ntumua ya Yoane kuizaka na Yesu, mpe ba tubaka: Sa^muna inki beto na ba falisi ke minaka nsoki, kansi ba ntumua na nge ke minaka nsoki ve? ¹⁵ Yesu vutudilaka bau: Ba kundi ya ditoko ya ndambi ba lenda kuandi vuanda na kiadi, na ntangu ba ikele kintuadi na ditoko ya ndambisa e? Bilumbu ke kuiza kuandi yina ditoko ya ndambisa ke katulua bau, bosi nde ba ke mina nsoki. ¹⁶ Muntu mosi ve ke tungaka kitende ya nlele ya yimpa, ku sangisa yau na ya ntama; samu ya ke natumuna fi ndambu ya kitende, mpe ku tiazuka ke vuanda ya nene kuluta. ¹⁷ Ba ke sangisaka ve vinu ya yimpa na kilundulu ya ntama; na kutubila mutindu yankaka, kilundulu ya ntama me zengana, vinu me tiamuka, mpe bilundulu me zimbana, kansi ba ke tulaka vinu ya yimpa nabilundulu ya yimpa, mpe na vinu na bilundulu kena kulundua. ¹⁸ Na ntangu yandi vuandaka zabisa bau mambu yina, tala, nkuluntu mosi kuizaka, me fukama na ntuala na yandi, mpe ma tuba: Muana na munu me kufua ntama mingi ve; kansi kuiza, tula yandi ma boko, mpe yandi ke vutuka vuanda ya moyo. ¹⁹ Yesu telamaka, mpe ba landaka yandi na ba ntumua na yandi. ²⁰ Mpe tala, nkento mosi vuandaka kukula menga, ya me luta ba mvula kumi na zole, finamaka manima manima, mpe simbaka nsongi ya mvuela ya Yesu. ²¹ Samu yandi vuandaka kitubla yandi mosi: Kana me simba kaka nsongi ya mvuela na yandi, mu ke beluka. ²² Yesu balukaka, mpe ntangu yandi monaka nkento yina, me tuba: Muana na munu ya nkento, vuanda kibakala, kiminu na nge me belusa nge. Bosi, nkento yina belukaka na ntangu yina mpe kaka. ²³ Ntangu Yesu kumaka na yinzo ya nkuluntu, mpe yandi monaka bantu ke bulaka mapitulu na nkangu ya mayoyila, ²⁴ me tubila bau: Beno katuka awa; samu ntuenia ya nkento ikele ya kufua ve, kansi yandi kena kuleka. mpe nkangu vuandaka sevila yandi. ²⁵ Na manima nkangu kubima na nganda, Yesu kotaka, me simba diboko ya ntuenia ya nkento, mpe ntuenia ya nkento telamaka. ²⁶ Nsangu muanganaka na kizunga ya mvimba. ²⁷ Ntangu yandi katukaka vana, ba mpofo zole landaka Yesu, ba vuandaka boka: Fuila beto nkenda Muana ya Davidi! ²⁸ Ntangu yandi kumaka na yinzo, ba mpofo pusanaka na ntuala na yandi, mpe Yesu me tubila bau: Beno ^me leke kiminu ti mu lenda sala yau e? Ba vutulaka, ingeta, Mfumu. ²⁹ Bosi yandi simbaka bau meso,na kutuba: Bika ya salama mutindu ikele kiminu na beno. ³⁰ Mpe meso na bau zibukaka. Yesu me kanikina bau, me tuba: Beno keba, muntu mosi ve zaba yau. ³¹ Kansi, ntangu kaka ba bimaka, ba muangisaka nsangu na yinsi ya mvimba ³² Na ntangu yandi vuandaka kuenda, ba natinaka Yesu baba mosi vuandaka na ba mpeve ya yimbi. ³³ Na manima kukuka mpeve ya yimbi, baba kuizaka tuba. Bosi nkangu yitukaka, mpe ba tubaka: Diambu ya mutindu yayi tekaka salama ve na Isaeli ya Mvimba. ³⁴ Kansi ba falisi tubaka: Na nkuluntu ya mpeve ya yimbi yand ke kukilaka ba mpeve ya yimbi. ³⁵ Yesu vuandaka zietila ba mbanza nionso mpe ba buala, yandi vuandaka longa na ba yinzo ya tukutukunu, yandi vuandaka longa Nsangu ya mbote ya kimfumu ya mazulu, mpe yandi vuandaka belusa konso mayela, mpe konso kimbevo. ³⁶ Ntangu yandi monaka nkangu, yandi fuilaka bau nkenda, samu ba kuamusuaka mpe ba sansukusuaka, neti kaka ma meme ikele na mvungi ve. ³⁷ Na yau, yandi tubaka na ba ntumua na yandi: Bilanga ikelele ya nene, kansi bisadi ikele ya fioti. ³⁸ Beno sambila Mfumu ya ngionzokolo yandi tinda bisadi na bilanga na yandi.