¹ Na ntangu Yesu kulumukaka na mongo, nkangu ya nene landaka yandi. ² Bosi tala, ntangu muntu ya buazi pusanaka, yandi fukamaka na ntuala naa yandi, mpe me tuba: Mfumu, kana nge zola, nge lenda belusa munu. ³ Yesu lambulaka diboko, simbaka yandi, mpe me tuba: me zola, beluka. Na mbala mosi yandi belukaka. ⁴ Bosi Yesu me tubila yandi: Keba, kutuba ve na muntu; kuenda kimonikisa na nganga, mpe nata nkayilu yayi Mose sikidisaka, samuna kutela bau yawu kimbangi. ⁵ Ntangu Yesu kotaka na Kapenawumi, nkuluntu ya binuani sololaka na yandi, na kubondila ⁶ mpe yandi tubaka: Mfumu, kisadi ya munu kele ya kuleka na inzo, na kimbevo ya buka buka mpe yandi kele na mpasi mingi. ⁷ Yesu me tubila yandi: Mu ke kuenda mpe mu ke belusa yandi. ⁸ Nkuluntu ya binuani vutulaka: Mfumu, Mu kele ya kufuana ve samu nge kota na inzo na munu; kansi tuba kaka diambu mosi, mpe kisadi ya munu ke beluka. ⁹ Samu, munu yayi ke tumamaka na ba kuluntu, mu kele na binuani yina ke tumaminaka munu; mu ke tuba na yandi yayi: kuenda! mpe yandi me kuenda; na yankaka: kuiza! mpe yandi me kuiza, bosi na kisadi na munu: sala kisalu yayi! mpe yandi me sala yawu. ¹⁰ Na manima ya kuwa yandi, Yesu yitukaka, mpe me tuba na ba yina vuandaka landa yandi: Ya kedika me tubila beno, ata na Isaeli mu mona ntete ve muntu ya kiminu ya nene mutindu yayi. ¹¹ Nzoka mingi ke katuka na kisika ke biminaka mpe ke diminaka ntangu, mpe ba ke kudia kintuadi na meza na Abalayami, Isaki, na Yakobo na kimfumu ya mazulu. ¹² Kansi bana ya kimfumu ke lozama na kitombe ya nganda, kuna ke vuanda bidilu mpe kukueta meno. ¹³ Bosi Yesu me tuba na nkuluntu ya binuani: Kuenda, ya salama mutindu kele kiminu na nge. Mpe na kilokula yina kaka kisadi me beluka. ¹⁴ Na manima na yawu, Yesu kuendaka na inzo ya Petelo, kuna yandi kutaka bokilo ya kento ya kuleka, samu yandi vuandaka na yukuyuku. ¹⁵ Yesu simbaka yandi na diboko mpe yukuyuku manisaka; bosi yandi telamaka, samuna kusadila yandi. ¹⁶ Na nkokila, ba nataka na ntadisi ya Yesu bantu mingi vuandaka na ba mpeve ya yimbi. Yandi kukaka ba mpeve ya yimbi na mpova na yandi, mpe yandi belusaka ba mbevo nionso, ¹⁷ samu ti yina mbikudi Yesaya samuna kokisama: Yandi bakaka bimbevo na beto, mpe yandi kituikilaka mayela na beto. ¹⁸ Ntangu Yesu monaka nkangu ya nene me zungidila yandi, me pesa yinsua ya ku luta na disimu yankaka. ¹⁹ Nsoniki mosi pusanaka, mpe me tubila yandi;: Nlongi, Mu ke landa nge kisika nionso nge ke kuenda. ²⁰ Yesu vutudilaka yandi: Mbulu kele na nluka, mpe ba ndeke ya dizulu kele na mazala; kansi Muana Ya muntu kele na kisika ve ya ku tula yintu na yandi. ²¹ Yankaka kati na ba ntumua tubilaka yandi: Mfumu, pesa ntete munu yinua ya ku kuenda zika tata na munu. ²² Kansi Yesu vutudilaka yandi: Landa munu, mpe bika mafua zika mafua ya bau. ²³ Yandi kotaka na bota, mpe ba ntumua landaka yandi. ²⁴ Bosi tala, mupepe ya ngolo telamaka na yimbu, bota zingamaka na mayo, kansi Yesu vuandaka leka. ²⁵ Ba ntumua pusanaka samuna ku lamusa yandi, mpe me tuba: Mfumu vuluza beto, beto zola kufua! ²⁶ Yandi tubilaka bau: Samuna inki beno kele na wonga, bantu ya fikiminu minu? Na yawu yandi telamaka, yandi sembaka mupepe na yimbu, mpe nionso dingamaka pii. ²⁷ Bantu yitukuaka, mpe tubaka: Ata mupepe mpe na yimbu kena ku tumamina muntu yayi, nani yandi kele? ²⁸ Ntangu ba kumaka na disimu yankaka, na yinsi ya bantu ya Ngadala, bantu zole vuandaka na mpeve ya yimbi bimaka na biziami, kuizaka na ntuala ya Yesu. Ba vuandaka na nganzi mpe muntu move lendaka lutila vana. ²⁹ Bosi tala, ba bokaka: Inki diambu kekel kati na beto na nge, Muana Tata Nzambi? Nge me kuiza awa samuna ku kuamisa beto tekila ntangu yina Mfumu kubikilaka beto? ³⁰ Ya vuandaka ntama ve na kamba ya ba ngulu yina vuandaka kudia vana. ³¹ Ba mpeve ya yimbi lombaka Yesu, na kutuba: Kana nge me kuka beto, tinda beto na kamba ya ba ngulu. ³² Yesu me tubila bawu: Beno kuenda! Ba mpeve ya yimbi bimaka, mpe ya kotaka na ba ngulu. bosi tala, kamba ya mvimba ya ba ngulu kuendaka nengumuka ya kuvenga tii na yimbu, mpe ba ku fuaka na maza. ³³ Bantu yina vuandaka dikila yawu masaka tina, mpe ba kuendaka na mbanza samuna kutuba nionso yina lutaka mpe kuminaka bantu vuandaka na ba mpeve ya yimbi. ³⁴ Na yawu, mbanza ya mvimba bimaka samuna ku kutana na Yesu; mpe ntangu ba monaka yandi, ba bombidilaka Yesu, yandi bima na insi na bawu.