¹ Ku fundisa ve, samu ti beno fundusua ve. ² Samuna ba ke fundisa beno mfundusulu beno kena kufundisila, mpe ba ke tezila beno na kitezolo beno kena kutezila. ³ Samuna inki nge kena kumona fidititi na disu ya mpangi na nge, bosi nge kena kumona ve mfumfuta kele na disu na nge? ⁴ To inki mutindu nge lenda tuba na mpangi na nge: Bika mu katusa fidititi na disu na nge, nge yayi kele na mfumfuta na disu na nge? ⁵ Muntu ya disu na insi ya dititi, katusa ntete mfumfuta kele na disu na nge, mpe bosi nge ke mona inki mutindu ya ku katusila fidititi kele na disu ya mpangi na nge. ⁶ Beno pesa ve bima ya nlongo na ba mbua, mpe beno loza ve nzimbu na beno na ntuala ya ba ngulu, kana ve ba ke timbula yawu na makulu na bau, ba vutukila beno mpe ba zenga beno bitni bitini. ⁷ Beno lomba mpe ba ke pesa beno; beno sosa, mpe beno ke mona; beno konkota, mpe ba ke zibudila beno. ⁸ Samuna yina ke lombaka ke bakaka, yina ke sosaka ke monaka, mpe ba ke zibudilaka yina ke konkutaka. ⁹ Nani kati na beno ke pesa dibanga na muana na yandi, kana yandi me lomba dimpa? ¹⁰ To kana yandi me lomba mbizi, ke pesa yandi nioka? ¹¹ Na yawu,, kana bantu ya yimbi bonso beno, beno me zaba kupesa bima ya mbote ne bana na beno, inki diambu ke sala ti Tata na beno ya mazulu ke pesa ve bima ya mbote na ba yina kena kulomba yandi yawu. ¹² Nionso yina beno kena kusosa ba sadila beno na bantu, beno sadila bau yau, samiu yawu Mose na ba mbikudi kena kulonga na Masonukua. ¹³ Beno kota na kielo ya fioti. Samu kielo kele ya nene, nzila ke nataka na nzimbusu kele ya kuyalumuka, mpe bantu mingi ke kotikaka na nzila yina. ¹⁴ Kansi kielo kele ya kufietama, nzila ya kele ya fioti yina ke nataka na moyo, mpe bantu fioti kaka ke monaka yawu. ¹⁵ Beno luenga na ba mbikudi ya luvunu. Ba ke kuizaka na bilele ya mameme, kansi na kati ba kele ba mevua kibakila. ¹⁶ Beno ke zabila bau na ba mbutu na bau. Ba ke bukaka mbutu ya vinia na ba nsende, to mbutu ya kuyu na nsolokoto ? ¹⁷ Yinti nionso ya mbote ke vuandaka na mbuma ya mbote, kansi yinti ya yimbi ke butaka mbutu ya yimbi. ¹⁸ Yinti ya mbote lenda buta ve mbutu ya yimbi, ata yinti ya yimbi lenda buta ve mbutu ya mbote. ¹⁹ Yinti yina ke butaka ve mbutu ya mbote fueti zengua mpe kuloza yawu na tiya. ²⁰ Na yawu, beno ke zabila yawu na mbutu na yawu. ²¹ Ba yina ke tubilaka munu; Mfumu, Mfumu! bau nionso ve ke kota na kimfumu ya mazulu, kansi muntu yina kaka ke salaka luzolo ya Tata na munu kele na mazulu. ²² Kilumbu yina bantu mingi ke tubila munu: Mfumu, Mfumu, beto bikulaka ve na nkumbu na nge? Beto kukaka ve ba mpeve ya yimbi na nkumbu nange? Mpe beto salaka ve bimangu mingi na nkumbu na nge? ²³ Na yawu, mu ke tubila bau: Mu salaka zaba beno ve, beno katukila munu, beno bantu ya kitombe. ²⁴ Yawu yina, konso muntu kena kuwa mambu yayi mu kena kutuba mpe me sadila yawu, yandi ke fuanana na muntu ya mayele tungaka yinzo na yandi na zulu ya mabanga. ²⁵ Mvula nokaka, maza fulukaka, kitembo fulaka mpe bulaka yinzo; kansi ya kubuaka ve, samu ti ya tunguaka na zulu ya mabanga. ²⁶ Kansi konso muntu ke kuwaka mambu yayi mu kena kutuba, mpe kena kusadila yawu ve, ke fuanana na zoba me tunga yinzo na yandi na zulu ya zielo. ²⁷ Mvula nokaka, maza fulukaka, kitembo fulaka mpe bulaka na yinzo yina ; ya kubuaka, mpe kisumbula vuandaka ya ngolo. ²⁸ Na manima ntangu Yesu manisaka kutuba, nkangu simbamaka na ndgosolo na yandi; ²⁹ samu yandi vuandaka longa lokola muntu kele na lulendo, bonso mi nsoniki ve.