¹ Beno kuki kenga na kusala mambu ya lunungu na ntuala ya bantu, samu ba mona nge; kaka ve, nge ke baka nsendo ve na Tata na nge kele na mazulu. ² Na ntangu nge kena ku pesa nkayilu ya nkenda, ku sika mpungi ve na ntuala ya nge, mutindu ke salaka bantu ya disu na yinsi ya dititi na kati ya ba yinzo ya lukutukunu, mpe na ba balabala, samu bantu kembisa bau. Ya kedika me tubila beno, ba me baka nsendo na bau. ³ Kansi ntangu nge kena ku pesa nkayilu ya nkenda, diboko ya lukento zaba ve yina kena kusala diboko ya lubakala, ⁴ samu nkayilu ya nge ya nkenda pasama na kinsueki; bosi Tata na nge kena kumona na kinsueki ke pesa nge nsendo. ⁵ Ntangu beno kena ku sambila, beno vuanda ve bonso bantu ya disu na yinsi ya dititi, ke zolaka ku sambila ya kutelama na yinzo ya tukutukunu mpe na fuma ya balabala, samu bantu mona bau. Ya kedika me tubila beno, ba me baka nsendo na bau. ⁶ Kansi ntangu nge kena kusambila, kota na disuku na nge, kanga kielo na nge, bosi sambila Tata yina kele na kisika ya kinsueki, mpe Tata na nge ke monaka mansueki ke pesa nge yawu. ⁷ Na ntangu ya kusambila, beno buelabuelaka ve mambu me kondua mfunu, mutindu ke salaka ba pakanu, ke yindulaka ti na ku buelabuela ba mambu nde bisambu na bawu ka wakana. ⁸ Beno fuanana ve na bawu; samuna tekila ndombolo na beno, Tata me zaba nsatu na beno. ⁹ Na yawu, tala mutindu beno fueti sambidila: Tata na beto kele na mazulu! Bika nkumbu ya nge ya zitusua; ¹⁰ bika kimfumu ya nge kuiza; bika luzolo ya nge salama mutindu ke salamaka na dizulu. ¹¹ Pesa beto madia madia ya kilumbu na kilumbu; ¹² lemvukila masumu na bebo, mutindu beto mpe ke lemvukilaka ba yina ke salaka beto yimbi; ¹³ ku yambula beto ve na lumpukumunu, kansi tanina beto na bantu ya yimbi. Samu na ngeyo kele na ba mvula nionso, kimfumu, kilendo mpe nkembo. Ameni! ¹⁴ Kana beno me lemvukila bantu mambi na bawu, Tata na beno ya mazulu ke lemvukila beno mpe; ¹⁵ kansi kana beno lemvukila ve bantu, Tata na beno ke lemvukila mambi na beno mpe ve. ¹⁶ Na ntangu beno kena kumina nsoki, beno vuanda ve na yilungi ya kiadi, lokola bantu disu na insi ya dititi, ke bebisaka bizizi na bawu, samuna ku songa na bantu ti ba kena kumina nsoki. Ya kedika me zabisa beno, bawu me baka nsendo na bawu. ¹⁷ Kansi na ntangu nge kena kumina nsoki, kusa bima ya nsunga na yintu mpe sukula kizizi na nge, ¹⁸ samuna ku monisa ve na bantu ti nge kena kumina nsoki, kansi na Tata na nge kele ya kusuama; mpe Tata na nge, kena kumona na kinsueki ke pesa nge yawu. ¹⁹ Beno wungula ve kimvuama ya ntoto yayi, kifulu kele na ba nselele na nkazu nkazu ke fukisaka yau, mpe kele na miyibi ke tobulaka mpe ke yibaka; ²⁰ kansi beno lokuta kimvuama ya dizulu, kuna nselele mpe nkazu nkazu ke bungaka ve, mpe miyibi ke tobulaka ve mpe ke yibaka ve. ²¹ Samu kisika kele kimvuama na ngeyo, vana mpe ke vuanda ntima na ngeyo. ²² Disu kele muinda ya nzutu.Kana disu kele ya mbote, nzutu na nge ya mvimba ke vuanda na kiya; ²³ kansi kana disu na nge kele ya mbote ve, nzutu na nge ya mvimba ke vuanda na kitombe. Na yawu kana kiya kele na nge kele kitombe, yinki mutindu ya nene ke vuanda na kitombe yina! ²⁴ Ata muntu mosi ve lenda vuanda nanga ya ba mfumu zole. Samuna, yandi ke bela yayi mpe yandi ke zola yina yankaka; to yandi kekangama na yayi, mpe yandi ke bika yina yankaka. Nge lenda sadila ve Tata Nzambi na mpeve ya yimbi ya kimvuama. ²⁵ Yawu yina me zabisa beno: Beno vuanda na maniongo ve samuna luzingu ya beno, yina beno ke kudia, samuna nzutu na beno, yina beno ke vuata. Luzingu luta ve madia na mfunu, to nzutu luta ve bilele ? ²⁶ Beno tala ba ndeke na dizulu: ke kunaka ve mpe ke yonzikaka ve, mpe ke tulaka kima ve na kilundulu; kansi Tata ya beno na mazulu ke dikilaka yawu. Beno kele na mfunu mingi kuluta bawu ve? ²⁷ Nani kati na beno na maniongo na yandi, lenda buela bilumbu ya kuzinga na moyo na yandi? ²⁸ Bosi Samuna inki beno kena ku nionga na yina me tadila bilele? Beno tala inki mutindu matiti ya bilanga ke butilaka: Ya ke salaka ve ata kutunga nsinga ve; ²⁹ kansi me tubila beno ti Solomo nkutu, na nkembo na yandi ya mvimbai, vuatusuaka bilele lokola mosi na bawu ve. ³⁰ Kana Tata Nzambi ke vuatisaka matiti na ba bilanga, kena kumonana bubu yayi, mpe ke lozama mbazi na tiya, yandi ke lenda kuvuatisa beno ve, bantu ya fiminu minu? ³¹ Na yawu, beno nionga ve, mpe beno tuba ve: Inki beto ke kudia? Inki beto ke kunua? Inki bilele beto ke vuata? ³² Samuna ba pakanu ke sosaka bima yina. Tata na beno ya mazulu me zaba ti beno kele na nsatu na yawu. ³³ Beno tuama kusosa kimfumu mpe lunungu ya Tata Nzambi; bosi ba ke buedila beno bima nionso yina. ³⁴ Na yawu, beno nionga ve na yina me tadila mbazi; samuna mbazi ke vuanda na mayindu na yandi mosi. Na konso kilumbu me fuana na mpasi na yawu.