¹ Ntangu yesu monaka makabu yina, yandi kumaka na mongo; mpe, na manima ya ku kivuandisa, minlongoki na yandi pusanaka kisika yandi vuandaka. ² Bosi, yandi zibulaka yinua mpe longisaka bau, me tuba: ³ Mayangi na ba mputu na mpeve, samu kimfumu ya mazulu kele ya bau! ⁴ Mayangi na ba lembami samu ba ke bombua! ⁵ Mayangi na bantu kele na kiadi, samu ba ke kuvua ntoto! ⁶ Mayangi na ba yina ke kufuaka nsatu na mpuila ya lunungu, samu ba ke yukutusua! ⁷ Mayangi na ba yina ke fuilaka nkenda, samu ba ke fuilua nkenda! ⁸ Mayangi na ba yina kele na ntima ya kuvedila, samu ba ke mona Tata Nzambi! ⁹ Mayangi na ba yina ke pesaka kiyenge, samu ba ke bokudulua bana ya Tata Nzambi! ¹⁰ Mayangi na ba yina ke muesuaka mpasi samuna lunungu, samu kimfumu ya mazulu kele ya bau! ¹¹ Mayangi ke vuanda na beno, ntangu ba ke vuezaka beno, ba ke lunguaka beno kuama mpe ba ke vunina beno mambu nionso ya yimbi, samuna munu. ¹² Beno yangalala mpe beno vuanda na kiese, samu nsendo na beno kele ya nene na mazulu; samu mutindu yina ba zomaka ba mbikudi yayi tekidilaka beno. ¹³ Beno kele mungua ya yinza. Kana nzenzo ya mungua me zimbina, na yinki ba ke zensisila yawu diaka e? Ya me bikana kaka kuloza yau na nganda, mpe ku diatukusua na bantu. ¹⁴ Beno kele kiya ya yinza. Mbanza yina kele ya kutungua na zulu ya mongo lenda suekua ve; ¹⁵ mpe ke pedisaka muinda ve samuna kutula yawu na yinsi ya meza, kensi ba ke tulaka yawu na zulu ya kilundulu ya muinda, mpe ya me kienzula ba yina kele na kati ya yinzo. ¹⁶ Bika kiya ya beno temuka na ntuala ya bantu, samu ba mona mavanga na beno ya mbote, mpe ba zitisa Tata na beno kele na mazulu. ¹⁷ Beno banza ve ti me kuiza katula nsiku to yina tubaka ba mbikudi; me kuiza ve samuna ku katula, kansi samuna ku lungisa. ¹⁸ Samu, ya kedika me zabisa beno, lokola dizulu na ntoto ke vuanda kaka, kima ve ata kisono mosi ya fioti lenda katulua na nsiku to ndambu ya fikisono, tii mambu nionso ke kokisama. ¹⁹ Na yawu, yandi yna ke bebisa ata mosi ya ba nsikudusu ata yina kele na mfunu mingi ve, mpe ke longisa bantu ba sala mutindu mosi, yandi ke vuanda ya fioti na kimfumu ya mazulu; kansi muntu yina ke sadila mpe kulonga yawu na ba yankaka na kusala mutindu mosi, ba ke bokidila yandi ya nene na kimfumu ya mazulu. ²⁰ Samu, me tubila beno, kana lunungu na benoluta ve yayi ya ba mi nsoniki na ba falisi, beno ke kota ve na kimfumu ya mazulu. ²¹ Beno kuwaka yina ba tubilaka ba kulu: Nge ke kufua ve; yina ke kufua muntu ke baka kitumbu ya na ba mfundisi. ²² Kansi munu, me zabisa beno ti muntu nionso ke vuanda na nganzi na mpangi na yandi fueti baka kitumbu na ba mfundisi; konso muntu ke tuba na mpangi na yandi: Nge kele muntu ya mpamba! yandi ke baka kitumbu na ba mayala; mpe yina ka tuba: Zoba nge kele! ke baka kitumbu ya tiya ya bilungi. ²³ Na yawu, kana nge me nata nkayilu na nge na dizikua, mpe nhe me bambuka moyo ti mpangi na nge kele na diambu na nge, ²⁴ bika nkayilu na nge na dizikua, mpe kuenda wizana ntete na mpangi na nge; bosi, nge ke kuiza bika nkayilu na nge. ²⁵ Bongisa malu na muntu yina kele kitantu na nge, na ntangu beno kele na nzila na yandi, samu yandi yekula nge na mfundisi, mpe mfundisi yekula nge na pulusi ya lunungu, mpe ba tula nge na boloko. ²⁶ Kedika me tubila nge, nge ke bima kuna ve kana nge futa ve mbongo ya nsuka bikanaka. ²⁷ Beno kuwaka ti ya tubamaka: Nge ke sala kinsuza ve. ²⁸ Kansi munu me zabisa beno ti, konso muntu ke tala nkento mosi samuna ku zinina yandi, me sala kinsuza na ntima na yandi. ²⁹ Kana disu na nge ya lubakala kele ntesisi ya sakuba, dokuna yawu mpe loza yanwu ntama na nge; ya kele ndandu samuna nge ku kondua mosi ya bitini ya nzutu na nge, mpe nzutu na nge ya mvimba lozua ve na mbungulu. ³⁰ Mpe kana diboko na nge ya lubakala kele ntesisi ya sakuba, zenga yawu mpe loza yawu ntama na ge; ya kele ndandu samuna ku kondua mosi ya bitini ya nzutu na nge, mpe nzutu na nge ya mvimba kuenda ve na mbungulu. ³¹ Ya tubamaka: Bika muntu yina me kuka nkento na yandi pesa yandi mukanda ya luvambanu. ³² Kansi munu me zabisa beno ti yina me kuka nkento na yandi, kaka samuna kinsuza, me bikidila yandi kituka nsuza, mpe konso bakala me kuela nkento me kukua na makuela, me sala kinsuza. ³³ Beno kuwaka diaka yina ba tubilaka ba nkaka: Nge ke kudia ndefi ya luvunu ve, kansi nge tununa ndefi na nge na Mfumu samuna yina nge ndimaka kusala na ntuala ya nkangu. ³⁴ Kansi munu me zabisa beno na kudia ndefi ata fioti ve, ya vuanda na dizulu ve, samu yawu kele kiti ya kimfumu ya Tata Nzambi; ³⁵ ya vuanda na ntoto ve samu yawu kele tambudi na yandi; ya vuanda na Yelusalemi, samu yawu kele mbanza ya Ntinu ya nene. ³⁶ Kudia mpe ndefi ve na yintu na nge, samu lusuki ya mpembe nge lenda kitula yawu ndombe ve. ³⁷ Bika mpova na nge vuanda inga, inga, ve, ve; yina ke buelamaka ke katukaka na muntu ya yimbi. ³⁸ Beno kuwaka ti ya tubamaka: Disu na disu, mpe dinu na dinu. ³⁹ Kansi munu me zabisa beno, na kukakila ve ntantu na nge. Kana muntu me bula nge na dibundi ya lubakala, pesa yandi diala yina yankaka. ⁴⁰ Kana muntu zola kuenda funda nge, mpe ku baka kinkutu na nge, bikidila yandi diaka kiyunga na nge. ⁴¹ Kana muntu kena ku kuika nge na kudiata kilometa difunda mosi, sala zole kintuadi na yandi. ⁴² Kabila muntu kena kulomba nge, mpe kumanga ve kudevisa yina zola deva nge kima. ⁴³ Beno kuwaka ti ya tubamaka: Nge ke zola mfinangani nange, mpe nge ke fina ntantu na nge. ⁴⁴ Kansi munu me zabisa beno: Beno zola mintantu na beno, beno sakumuna ba yina ke singa beno, beno sala mambote na ba yina ke belaka beno, mpe beno sambidila ba yina ke muesaka beno mpasi mpe ke zomaka beno, ⁴⁵ samu ti beno vuanda bana ya Tata na beno kele na dizulu; samu yandi ke tubulaka ntangu na bantu ya yimbi na ya mbote, mpe yandi ke nokisaka mvula na bantu ya lunungu mpe na ba yina kele na lunungu ve. ⁴⁶ Kana beno ke zala kaka ba yina ke zolaka beno, yinki nsendo beno kena ku baka e? Mi mvakusi ke salaka mutindu yina ve? ⁴⁷ Bosi kana beno ke pesaka kaka ba mpangi na baeno mbote, yinki diambu ya ngitukulu beno ke salaka kuluta ba yankaka? Ba pakanu mpe ke salaka mutindu mosi ve? ⁴⁸ Beno vuanda ya kulunga, mutindu Tata na beno ya mazulu kele ya kulunga.