¹ Bosi, Na manima kubokila minlongoki na yandi kumi na zole, yandi pesaka bau kilendo ya kukuka ba mpeve ya yimbi, mpe ya ku belusa konso bimbevo mpe konso mutindu ya kuvanguka. ² Tala ba nkumbu ya minlongoki kumi na zole, yantete, Simoni kele ne nkumbu ya Petelo, mpe Andele, mpangi ya yandi; Yakobi, muanaya zebedai, mpe Yoane, mpangi ya yandi; ³ Filipo, mpe Batelemayi, Toma, mpe Matayi, Mfutisi mpaku; Yakobi, muana ya Alafayi, mpe Tadayi; ⁴ Simoni , muntu ya Kana, mpe Yuda Iskalioti, yandi yekulaka Yesu. ⁵ Ba kumi na zole yayi Yesu tindaka, na manima kupesa bau ba nsikudukusuyayi: Beno kuenda na ba pakanu ve, mpe beno kota na ba mbanza yaa Samaliya ve; ⁶ Kansi beno luta kuenda nama meme zimbanaka ya yinzo ya Isaeli. ⁷ Beno kuenda, beno kuenda longa, mpe beno tuba: Kimfumu ya mazulu me finama. ⁸ Beno belusa ba mbevo, beno fulukisa bafua, beno vedisa bantu ya buazi, beno kuka ba mpeve ya yimbi. Beno bakaka nkayilu ya kusumba na mbongo ve, beno pesa na kutikila muntu ve. ⁹ Beno baka wolo ve, ata palate ve, ata mbongo ve, na kati ba nsinga ya beno na luketo; ¹⁰ ata nkutu ve samuna nzietolo, ata biyunga zole ve, ata nsampatu ve, ata nkawa ve; samu kisadi me fuana baka madia ya yandi. ¹¹ Na kati ya ba mbanza to ba buala beno ke kota, beno yuvusa kana muntu ya mbote ikele samuna ku tambula beno; mpe beno vuanda kuna tii kilumbu beno ke katuka. ¹² Ntangu beno ke kota na yinzo, beno pesa bau mbote, ¹³ mpe kana yinzo ieke ya ku fuana na kutambula beno, bika kiyenge ne beno vuanda na bau; kansi kana yau ikele ya ku fuana ve na ku tambula beno, kiyenge ke vutukila beno. ¹⁴ Kana ti ba ke tambula beno ve mpe ba ke kuwa mambu na beno ve, beno bima na yinzo yina to na mbanza yina, mpe beno pupula fundu fundu ya bitambi na beno. ¹⁵ Ya kedika me tubila beno: na kilumbu ya mfundusu, mpasi ya yinsi ya Sodomi na Ngomola, ke vuanda ya fioti kuluta mbanza yina. ¹⁶ Tala, me tinda beno bonso ma meme na kati ya bibulu ya nganzi. Beno vuanda nguenga kuluta nioka, mpe nlembami utindu ikele dibembe. ¹⁷ Beno vuanda kitantu ve na bantu; samu ba ke funda beno na ba yinzo ya mfundusu, mpe ba ke bula beno bikoti na ba yinzo ya tukutukunu, samuna munu, ¹⁸ ba ke nata beno na ntuala minyadi mpe na ntuala ba ntinu, samu ya vuanda kimbangi na ntadisi ya bau mpe ya ba pakanu. ¹⁹ Kansi ntangu ba ke yekula beno, kansi beno vuanda na mayindu ve na mutindu ya kutubila to yina beno ke tuba: yina beno ke tuba ke pesamina beno na ntangu yina kaka, ²⁰ samu beno ve ke tuba, Mpeve ya Tata na beno ke tuba kati na beno. ²¹ Mpangi ke yekula mpangi na yandi na lufua, mpe tata ke yekula muana ya yandi na lufua, bana ke nangumukina bibuti na bau, mpe ba ke vondisa bau. ²² Bantu nionso ke bela beno, samuna nkumbu na munu; kansi yina ke tatamana tii na nsuka ke vulusua. ²³ Ntangu ba ke zoma beno na kati ya mbanza; beno tina na mbanza yankaka. Ya kedika me tubila beno, Beno ke kukimanisina ku zietila ba mbanza nionso ve ya Isaeli, Muana ya muntu ke kikumila. ²⁴ nlongoki me lutila nlongi na tyandi ve, ata kisadi lutila mfumu na yandi ve. ²⁵ Ya me lunga na nlongoki kuvuanda bonso nlongi na yandi, mpe kisadi bonso mfumu na yandi. Kana ba bokidilaka mfumu ya yinzo Belesebulu, nini me kondua na ku bkidila bantu ya yinzo na yandi mutindu yina! ²⁶ Na yau, beno mona bau wonga ve, samu kima mosi ve ya kusuama yina ke kondua kumonana, ata diambu ya kinsueki yina ke kondua kuzabakana. ²⁷ Yina me tuba na mpimpa, beno tuba yau na muini; et yina ba me tubila beno na dikutu, beno longisa yau na na kuvuanda na zulua banludi ya ba yinzo. ²⁸ Beno mona wonga ve ya bayina ke kufuaka nzutu mpe ba ke lenda kufua muela ve; beno mona wonge ya yina lenda kufua muela na nzutu na kati ya bilungi. ²⁹ Ba ndeke zole ke tekukaka ve samuna bivanza zole ? Yau yina, mosi lenda ku bua ve na ntoto kana na luzolo ya Tata ya beno ve. ³⁰ Ata ba nsuki ya intu na beno : nionso ikele ya kutangua. ³¹ Beno mona wonga mosi ve,samu beno ikele mfunu kuluta ba ndeke mingi. ³² Na yau, konso muntu ke tambula munu na ntuala ya bantu, munu mpe, mu ke tambula yandi na ntuala ya Tata ya munu ikele na mazulu; ³³ kansi yina ka kadila munu nkalu na ntuala ya bantu, munu mpe, mu ke kedila yandi nkalu na ntuala ya Tata na munu ikele na mazulu. ³⁴ Beno banza ve ti me natina beno kiyenge na ntoto, mu kuizaka nata kiyenge ve, kansi kisabala. ³⁵ Samu me kuiza tula kitantu na kati ya muntu na tata na yandi, kati na muana ya nkento na mama na yandi; ³⁶ mpe muntu ke vuanda na mintantu bantu ya yinzo na yandi. ³⁷ Konso muntu ke zola tata to mama na yandi kulutila munu ikele ya kufuana ve na kuvuanda nlongoki na munu, mpe yina ke zolaka muana ya yandi ya bakala to ya nkento kulutila munu ikele ya kufuana ve na kuvuanda nlongoki na munu; ³⁸ Yina ke baka ve dikulunsi na yandi, mpe kena kulanda munu ve, ikele ya kufuana ve na kuvuanda nlongoki na munu. ³⁹ Yina ke lunda muela na yandi, yandi ke zimbisa yau, mpe yina ke zimbisa muela na yandi samuna munu ke mona yau. ⁴⁰ Muntu yina ke tambula beno me tambula munu, mpe muntu yina ke tambula munu, me tambula yina tindaka munu. ⁴¹ Muntu yina ke tambula mbikudi samuna kisalu na yandi ya mbikudi, yandi ke baka nsendo ya mbikudi, mpe konso muntu ke yamba muntu ya lunungu samuna lunungu na yandi ke baka nsendo ya muntu ya lunungu. ⁴² Bosi konso muntu ke pesa dikopo ya maza ya madidi na mosi ya bimbana mbana yayi, samu yandi ikele nlongoki na munu, me tubila beno, yandi ke zimbisa nsendo na yandi. ve.