¹ Ntangu Yesu manisaka kupesa malongi na yandi na ba ntumua na yandi kumi na zole, yandi katukaka kuna, samuna kukuenda longisa mpe kulonga mambu ya Tata Nzambi na ba mbanza ya yinsi. ² Ntangu Yoane kuwaka na kati ya boloko bimangu ya Klisto, ba ntumua na yandi kuendaka yuvula Yesu: ³ Nge ikele muntu yina fuanaka kuiza to beto vingila yankaka e?. ⁴ Yesu vutudilaka bau: Beno kuenda tuba na Yoane yina bano me mona na yina beno me kuwa: ⁵ ba mpofo kena kumona, ma koka me tambula, bantu ya buazi me vedusua, bantu ya kufua makutu me kuwa, mafua me fuluka, mpe Nsangu ya Mbote kena kusamunua na ba mputu. ⁶ Mayangi na yandi yina mu ke tesisa sakuba ve! ⁷ Na ntangu ba vuandaka kuenda, Yesu bandaka kutuba na nkangu, yina me tadila Yoane: Inki beno kuendaka tala na dikanga e? yinti yina kena kunikusua na mupepe? ⁸ Kansi, inki beno kuendaka tala e? muntu vuantaka bilele ya ntalu e? Beno tala, ba yana ke vuataka bilele ya ntalu ke vuanadaka na ba yinzo ya ba ntinu. ⁹ Na yau, inki beno kuendaka tala e? Mbikudi e? Inga, me tubila beno, yandi ikele kuluta mbikudi. ¹⁰ Samuna yandi mambu yayi sonamaka: Tala, me tinda ntumua na munu na ntadisi na nge, samuna ku bongisa nzila na ntuala na nge. ¹¹ Ya kedika me tubila beno, na bantu yina me butuka na bankento, muntu mosi ve monanaka na mfunu kulutila Yoane Mbotiki. Na yau, yina kele ya fioti na kimfumu ya mazulu me lutila yandi na mfunu. ¹² Kubanda na ntangu ya Yoane tii ntangu yayi, kimfumu ya mazulu ikele kena kubakamina na kingolo, mpe ba yina kele ngolo me dindamana yau. ¹³ Samu ba mbikudi nionso mpe nsiku ba bikulaka tii na Yoane; ¹⁴ mpe, kanna beno zola bakusa yandi, yandi ikele Eliya yina fuanaka kuiza. ¹⁵ Bika muntu kele na makutu samuna kuwa yandi kuwa. ¹⁶ Na inki beto ke fuanikisa mbandu yayi e? Ya ikele ya kufuanana na bana me vuanda na kifulu ya bantu mingi, mpe ba kena kutuba na bana yankaka: ¹⁷ Beto budilaka beno matutu, mpe beno kinaka ve; beto yimbidilaka beno, kansi beno niongaka ve. ¹⁸ Samu Yoane kuizaka, kudiakave, kunuaka ve, mpe ba me tuba: yandi ikele na mpeve ya yimbi. ¹⁹ Muana ya Muntu kuizaka, yandi kudiaka mpe kunuaka, mpe ba me tuba: yandi ikele kindiafu mpe muntu ya kukolua, nkundi ya bantu ke yonzikaka mpaku ya bantu ya masumu mpe ya bantu ya luzingu yayimbi. Kansi nduenga na yandi monikaka na mavanga na yandi. ²⁰ Na yau Yesu bandaka kusemba ba mbanza yina yandi vuandaka lutila bimangu na yandi, samu ba vilulaka ntima ve. ²¹ Kiadi na nge, Kolasi! Kiadi na ge, Betesaida! samu kena mambu ya nene salamaka na Tilo mpe Sidonimutindu ya salamaka na beno, ba zolaka viluka banda ntama, na kuvuata ngoto mpe dibombe. ²² Yau yina ^me zabisa bano: Kilumbu ya lufundusu Tilo mpe Sidoni ke mona mpasi ya fioti kansi ya beno ke lutisa na kilumbu ya mfundusu. ²³ Mpe nge Kapenaumi, nge ke tombulua tii na dizulu e? Ve. Nge ke kulumunua tii na yinsi ya bafua; Samu, kana bimangu salamaka kati na nge ya salmaka na Sidoni, ya zolaka sikila diaka tii bubu yayi. ²⁴ Yau yina me tubila beno: na kilumbu ya mfundusu, yinsi ya Sodomi ke mona mpasi ya fioti kuluta ya beno. ²⁵ Na ntangu, yina Yesu me baka ndinga, yandi me tuba: Mu kena sanisina nge, Tata, Mfumu ya dizulu mpe ya ntoto, samu nge me sueka mambu yayi na bantu ya nduenga mpe ya meyele, mpe nge me monisa yau na bantu longukaka ve, mpe nge monisa yau na bana. ²⁶ Ingeta, Tata, Me sanisina nge samu nge zolaka mutindu yina. ²⁷ Mambu nionso yayi pesamelaka munu na Tata munu, mpe muntu mosi ve me zaba Muana kana Tata ve, mpe muntu mosi ve me zaba Tata kana Muana ve, mpe na yina Muana zola monisa yandi. ²⁸ Beno kuiza na munu, beno nionso ikele ya kulembampe kena bifunda, mpe mu ke vundisa beno. ²⁹ Beno baka kizitu na munu mpe beno longuka na munu, samu ikele ya kulembama mpe ntima ya kukita, mpe beno ke baka luvundulu miela na beno. ³⁰ Samu kizitu na munu ikele ya kulembama, mpe kizitu na munu ikele yakiyaki.