¹ Na ntangu yina, na kilumbu ya lumingu, Yesu sabukaka bilanga ya ble. Minlongoki na yandi, yayi vuandaka na nsatu, ba bandaka kubuka ba mbutu mpe kudia yau. ² Ntangu ba falisi monaka mutindu yina, me zabisa yandi: Tala, ba nlongoki na nge kena kusala yina nsiku pesa ve luve ya kusala kilumbu ya lumingu. ³ Kansi Yesu vutudilaka bau: Beno tangaka ve yina salaka Davidi, na ntangu yandi vuandaka na nsatu, yandi na ba yina vuandaka na yandi; ⁴ inki mutindu yandi kotilaka na yinzo ya Nzamlbi, mpe yandi kudiaka mampa ya kubiekua, yina ba pesilaka yandi ve luve ya kudia, mutindu mosi na ba yina vuandaka na yandi, kansi na ba nganga Nzambi kaka e? ⁵ To, beno tangaka ve na nsiku ti, bilumbu ya lumingu, ba nganga Nzambi kena kuibuisa lumingu na kinlongo, kondua kunata nkanu e? ⁶ Kansi, mu kena kuzabisa beno, kima mosi ikele awa me lutila kinlongo na nene. ⁷ Kana beno zabaka yina zola tuba mambu yayi: Mu ke zolaka nkenda kansi minkayilu ya kuyokua ve, beno zolaka zengila kitumbu ve bantu yina salaka kima ya yimbi ve. ⁸ Samu Muana na muntu ikele Mfumu ya lumingu. ⁹ Ntangu Yesu katukaka vana, Yandi mekota na yinzo ya lukutukunu. ¹⁰ Mpe tala, kuna vuandaka na muntu mosi ya kusioka diboko. Ba yuvulaka Yesu: Ya ikele na luve ya kubelusa muntu na bilumbu ya lumingu e? Ya vuandaka samuna kufunda yandi. ¹¹ Yandi vutudilaka bau: Nani kati na beno kana yandi ikele kaka na dimeme mosi, mpe dimeme yina me kubua na dibulu na kilumbu ya lumingu, yandi ke simba yau ve samuna kubimisa yau e? ¹² Na muntu na kibulu, nani me lutisa na ntalu! Na yau, ya ikele na luve ya kusala mbote na bilumbu ya lumingu. ¹³ Bosi yandi tubaka na muntu: Lambula diboko ya nge. Yandi me lambula yau, mpe ya me beluka mutindu mosi na diboko yankaka. ¹⁴ Ba falisi bimaka, mpe ba me yuvasana mutindu ba lendaka fuila yandi. ¹⁵ Kansi ntangu Yesu, zabaka yau, yandi me katuka na kisika yina. Nkangu ya nene landaka yandi. Yandi belusaka ba mbevo nionso, ¹⁶ mpe yandi tubilaka bau, na kubika zabisa yau na bantu, ¹⁷ samu yina sonamaka na ^mbikudi Yesaya ya kokisama: ¹⁸ Tala kisadi na munu mu ponaka, kia zolua ya munu, yina kena kusepedisa muela na munu. Mu ke tula Mpeve na munu na yandi, mpe yandi ke samuna lunungu na munu na makanda. ¹⁹ Yandi ke manga ve, yandi ke boka ve, mpe muntu mosi ve ke kuwa ndinga na yandi na ba balabala. ²⁰ Yandi ke tolula ve mabu yina ya kutoluka, yandi ke zima ve muinda yina kena kufuita muisi, tii yandi ke nungisa lunungu. ²¹ Mpe makanda ke tula kivuvu na nkumbu na yandi. ²² Bosi ba natinaka muntu ya ba mpeve ya yimbi yina vuandaka mpofo mpe dibaba, mpe yandi belusaka yandi, na mutindu ti dibaba tubaka mpe monaka. ²³ Nkangu nionso yitukak mpe vuandaka tubaka: Yandi yayi ve Muana Davidi e? ²⁴ Ntangu ba falisi kuwaka yau, ba tubaka: Muntu yayi kena kukuka ba mpeve ya yimbi na Belesebuli kaka, mfumu ya ba ndoki. ²⁵ Lokola Yesu zabaka mabanza na bau, me tubila bau: Kintinu nionso yina ikele ya kabuka na yau mosi, ya ikele ya kufua, mpe mbanza nionso to yinzo ya kukabuka na yau mosi lenda zingila ve. ²⁶ Kana Satana me kuka Satana , yandi ikele ya kukabuana na yandi mosi; Inki mutindu kintinu na yandi ke zingila e? ²⁷ Kana munu, mu kena kukuka mpeve ya yimbi na Belesebuli, bana na beno, na inki ba kena kukukila yau e. Yau yina bau mosi ke vuanda mimfundisi. ²⁸ Kansi, kana na Mpeve ya Tata Nzambi mu kena kukuka ba mpeve ya yimbi, kintinu ya Tata Nzambi me kuiza na beno. ²⁹ To, Inki mutindu muntu lendaka kota na yinzo ya muntu ya ngolo mpe kuziona bima na yandi, Na kukondua ntete kukanga muntu yina ya ngolo e? Bosi yandi ke yiba yinzo na yandi. ³⁰ Yina ikele na munu kintuadi ve, yandi ikele ntantu na munu, mpe yina ke kutakanaka na munu ve, ke zimbana. ³¹ yau yina me tubila beno: Masumu nionso mpe ntiakulu nionso ke lemvukulua na bantu, kansikutiaka Mpeve ya Nlongo lenda lemvukulua ve. ³² Konso muntu yina ke tuba diambu ya yimbi na Muana ya muntu, yandi ke lemvukulua, kansi muntu nionso ke tuba diambu ya yimbi na Mpeve ya Nlongo, lenda lemvukulua ve ata na ba mvula yayi to na ba mvula kena kuiza. ³³ To, tuba ti inti ikele ya mbote mpe mbuma na yau ikele ya mbote, to tuba ti inti ikele ya yimbi mbuma na yau mpe ikele ya yimbi; samu inti ke zabakanaka na mbuma. ³⁴ Makanda ya babuta mpidi, Bantu ya mbalu bonso beno, inki mutindu beno lendaka tuba mambu ya mbote? Samu yinua ke tubaka kana ntima me fuluka. ³⁵ Muntu ya mbote ke bakaka mambu ya mbote na kilundulu na yandi, mpe muntu ya yimbi ke bakaka mambu ya yimbi na kilundulu na yandi. ³⁶ Mu kena kutubila beno: na kilumbu ya mfundusu, bantu ke fundusua na mambu ya yimbi yina ba bimisaka. ³⁷ Samu na mpova na nge, nge ke nungusua; mpe na mpova na nge, nge ke zengulua kitumbu. ³⁸ Na yau, ndambu ya minsoniki mpe ba falisi bakaka mpova, mpe tubaka: Nlongi, beto zola nge sala kimangu. ³⁹ Yandi vutudilaka bau: Mbandu yayi ya mbalu, mpe ya kinsuza kena kulomba kimangu; kimangu yankaka ikele ve ya kupesa beno kana ya mbikudi Yona ve. ⁴⁰ Samu, mutindu mosi Yona salaka bilumbu tatu mpe mpimpa tatu na kivumu ya mbizi ya nene, mutindu mosi Muana ya muntu ke vuanda bilumbu tatu mpe mpimpa tatu na insi ya ntoto. ⁴¹ Bantu ya Ninive ke telama na kilumbu ya mfundusu, kintuadi na mbandu yayi mpe ke zengila yau kitumbu, samu ba bikaka masumu na malongi ya Yona; kansi tala, muntu mosi ikele awa me lutila Yona na nene. ⁴² Ntinu ya nkento ya midi ke telama na kilumbu ya mfundusu, kintuadi na mbandu yayi mpe ke zengila yandi kitumbu, samu ba me katuka na ba nsuka ya ntoto samuna kuwa nduenga ya Solomo, mpe tala, muntu mosi ikele awa me luta Solomo na nzayilu. ⁴³ Ntangu mpeve ya yimbi bimaka na muntu, yau ke kuendaka na kisika ya kuyuma, samuna kusosa kisika ya kuvundila, mpe yau ke mona kisika ve. ⁴⁴ Bosi yau me tuba: Mu ke vutuka na yinzo na munu kisika mu vuandaka; mpe ntangu yau me kuiza, yau ke kuta kima ve na kati, ya kukombulua mpe ya kukubukua. ⁴⁵ Yau ke kuenda, yau me baka diaka mpeve nsambodia yankaka me lutila yina na mbalu; yau ke kota mpe me vuanda na yinzo, bosi, luzingu ya ntete ya muntu yayi me kuma yimbi kulutila luzingu ya ntete yina vuandaka na yandi. Ya ke vuanda mutindu mosi samuna mbandu yayi ya mbalu. ⁴⁶ Lokola Yesu vuandaka tuba diaka na nkangu, tala, mama mpe ba mpangi na yandi vuandaka na nganda, ba sosaka nzila ya kusolula na yandi. ⁴⁷ Muntu mosi me tubila yandi: Tala, mama mpe ba mpangi ya nge ikele na nganda, mpe ba kena kusosa kusolula na nge. ⁴⁸ Kansi Yesu vutulaka na muntu yina vuandaka tubila yandi yau:Nani mama na munu, mpe nani ba mpangi na munu e? ⁴⁹ Bosi, ntangu yandi lambulaka diboko na minlongoki na yandi, me tuba: Mama na munu mpe ba mpangi na munu bau yayi. ⁵⁰ Samu, konso muntu ke sala luzolo ya Tata na munu ikele na mazulu, yandi yina mpangi na munu ya bakala, mpe mpangi ya munu ya nkento, mpe mama ya munu.