¹ Na ntangu yina, Yoane mbotiki bimaka, mpe yandi vuandaka longa na dikanga ya Yuda. ² Yandi vuandaka tuba: Beno vilula ba ntima, samu kimfumu ya mazulu kele penepene. ³ Yoane kele muntu yayi mbikudi Yesaya samunaka, ntangu yandi me tuba: Yau yayi ndinga ya muntu kena kuboka na dikanga: Beno kubika nzila ya Mfumu, beno lendumuna ba nzila na yandi. ⁴ Yoane vuandaka na bilele ya mika ya kamela, mpe na nsinga na luketo ya nkanda ya kibulu. Yandi vuandaka kudia makonko na niosi ya mfinda. ⁵ Bantu ya Yelusalemi, ya Yudayo ya mimba mpe na insi ya mvimba ya kizunga ya Yolodani vuandaka kuenda na Yoane; ⁶ mpe, ba vuandaka funguna masumu na bau mpe ku baka mbotokolo na Yoane na nzadi ya Yolodani. ⁷ Kansi yandi monaka ba falisi na ba saduki mingi kuendaka na mbotokolo na yandi, mpe me tubila bau: dikanda ya mpidi, nani longaka beno mutindu ya kutina nganzi kena kuiza e? ⁸ Beno buta mbutu ya mbote ya mpilulu ya diela, ⁹ mpe beno vunda na dibanza ya kitubila beno mosi ve: Tata na beto kele Abalahami! Samu mu kena ku zabisa beno ti na mabanga yayi, Tata Nzambi lenda fulukisa bana na Abalahami. ¹⁰ Kiubi me tuluaka na mianzi ya inti: inti nionso ke butaka mbutu ya mbote ve, ke zengua mpe ke lozua na tiya. ¹¹ Munu kena ku botika beno na maza, samuna ku nata beno na mpilulu ya diela; kansi Yesu kele muntu kena kuiza na manima na munu me lutila munu na kilendo, yandi ke botika beno na Mpeve ya Nlongo mpe na tiya. ¹² Kivevomono na yandi kele na diboko; yandi ke sukula kivevo na yandi, mpe ke yonzika mbongo na yandi na kilundulu, kansi yandi ke yoka nianga na tiya yayi ke kufuaka ve. ¹³ Na yau, Yesu katukaka na Ngalili, kuenda na Yoane na Yodani, samuna ku botukua. ¹⁴ Kansi Yoane zolaka ve, na kutuba ti : Munu kele na nsatu nge botika munu, kansi nge muntu me kuiza na munu! ¹⁵ Yesu vutudilaka yandi: Na ntangu yayi, bikidila yau, samu ya me mbote ti beto fuanisa nionso yina kele ya lunungu. Bosi Yoane kakidilaka diaka ve. ¹⁶ Kaka ntangu Yesu botukuaka, yandi bimaka na maza. Mpe tala, dizulu zibukaka, mpe yandi monaka Mpeve ya Tata Nzambi kitaka bonso dibembe kuizaka mianta yandi. ¹⁷ Bosi, tala, ndinga ya Tata Nzambi katukaka na mazulu wakanaka na kutuba ti: Yandi yayi kele Muana na munu ya luzolo, na yandi mu tulaka nzolakani na munu.