^{1 2} Yesu butukaka na Betelemi ya Yuda, na ntangu ya ntinu Elodi, tala ba nduenga katukaka na Este kuizaka na Yelusalemi, mpe ba tubaka: Wapi ntinu ya ba Yudeyo yayi me butuka? samu beto me mona mbuetete na yandi na Este, mpe beto me kuiza samuna kuzitisa yandi. ³ Ntangu ntinu Elodi kuwaka yau, me kuma zengele zengele yandi na Yelusalemi ya mvimba. ⁴ Yandi kutikisaka ba ngudi za nganga nionso mpe na minsoniki ya nkangu, samu yandi zabila yau na bau, inki kisika lendaka butukila Klisto. ⁵ Ba zabisaka yandi: Na Betelemi Na Yuda; samu tala yayi sonikaka mbikudi: ⁶ Nge Betelemi, insi ya Yuda, nge kele ya fioti ve na ba mbanza ya nene ya Yuda, samu na nge ke bimina nyadi ke vuanda kisadi ya bantu na munu, Isaeli. ⁷ Kansi Elodi bokilaka banduenga na kinsueki, mpe na bau yandi bakaka nsikudukusu kubanda inki ntangu mbuetete vuandaka lezima. ⁸ Bosi yandi tindaka bau na Betelemi, yandi tubaka: Beno kuenda, mpe beno baka manzayisu ya kedika samuna fimuana; Kana beno me mona fiau, beno zabisa munu, samu mu diaka; mu kuenda pesa yandi nzitusu. ⁹ Na manima kuwa ntinu, ba kuendaka. Tala mbuetete ba monaka na Este vuandaka kuenda na ntuala bau tii ntangu ya kumaka na zulu ya kisika butukilaka fimuana, mpe ya telamaka. ¹⁰ Ntangu ba monaka mbuetete, ba vuandaka yangalala na kiese ya ngolo. ¹¹ Ba kotaka na inzo, ba monaka fimuana na Malia, mama na yandi, ba fukamaka mpe ba sambilaka; ba zibulaka kimvuama na bau, ba pesaka nkayilu ya wola, libano mpe na mile. ¹² Bosi, ba luengusuaka na ndozi na kuvutuka na Elidi ve, ba vutukaka na insi na bau na nzila y nkaka. ¹³ Ntangu ba kuendaka, tala mbasi ya Mfumu monikinaka Yosefi, mpe me tuba: telama, baka fimuana na mama na yandi, tina na Ngipiti, vuanda kuna tii kilumbu mu ke zabisa nge; samu Elodi ke sosa fimuana samuna kufua yandi. ¹⁴ Yosefi telamaka, bimaka na Ngipiti, mpe yandi tinisaka fimuana na mama na yandi. ¹⁵ Yandi vuandaka kuna tii na lufua ya Elodi, samu yina Mfumu samunaka na mbikudi kukisama: Mu bokilaka muana na munu na nganda ya Ngipiti. ¹⁶ Kansi ntangu Elodi monaka ti banduenga sekininaka yandi, yandi bakamaka nganzi ya ngolo, mpe yandi tindaka ba kufua bana nionso ya ba mvula zole mpe kukita ba mvula yina, vuandaka na Yelusalemi mpe na kizunga na yandi nionso, landila manaka yndi bakaka na ba mbasi. ¹⁷ Na yawu ya me lungana mambu tubaka mbikudi Yesaya: ¹⁸ Ba me kuwa mazu na Lama, bidilu na maniongo: Lakeli kena kudila bana na yandi, mpe yandi zolaka mbombolo ve, samu ba kele diaka moyo ve. ¹⁹ Ntangu Elode kufuaka, tala, mbasi mosi ya Mfumu monikinaka Yosefi na ndozi, na Ngipiti, ²⁰ mpe me tuba: Telama, baka fi muana na mama na yandi, bosi kuenda na insi ya Isaeli, samu ba yina vuandaka zola kufua fi muana me kufua. ²¹ Yosefi telamaka, me baka fimuana na mama na yandi, mpe me kuenda na insi ya Isaeli. ²² Kansi, ntangu yandi kuwaka ti Alakelau kena ku yala Yuda na kifulu ya Elodi, tata na yandi, yandi monaka wonga ya kukuenda kuna; mpe, kansi Tata Nzambi luengisaka yandi na ndozi, bosi yandi katukaka na kitini ya Ngalili, ²³ mpe yandi kuendaka zingila na mbanza kele na nkumbu ya Nazaleti, samu ti yina samunuaka na ba mbikudi: Yandi ke bokudulua na nkumbu ya muntu ya Nazaleti.