1 Mbutukulu ya Yesu Klisto, muana ya Davidi, muana ya Abalahami. 2 Abalahami butaka Isaki; Isaki butaka Yakobo; Yakobo butaka Juda na ba mpangi na yandi; 3 Yuda na Tamala butaka Falesi na Zala; Falesi butaka Esilomi; Esilomi butaka Alami; 4 Alami butaka Aminadabi; Aminadabi butaka Nasoni; Nasoni butaka Salamoni; 5 Salamoni na Lakabi butaka Boasi; Boasi na Luti butaka Obedi; Obedi butaka Isai; 6 Isai butaka Davidi. Ntinu Davidi na nkento na yandi Ulia babutaka Solomo; 7 Solomo butaka Lobohami; Lobohami butaka Abia; Abia butaka Asa; 8 Asa butaka Yosafati; Yosafati butaka Yolami; Yolami butaka Ozia; 9 Ozia butaka Yotami; Yotami butaka Akazi;Akazi butaka Ezekiasi; 10 Ezekiasi butaka Manase; Manase butaka Amoni; Amoni butaka Yosia; 11 Yosia butaka Yekonia na ba mpangi na yandi, na ntangu ba nataka bau na Babiloni. 12 Na manima ya kunayua na Babiloni, Yekonia butaka Sealatieli; Sealatieli butaka Zelubabeli; 13 Zelubabeli butaka Abuidi; Abuidi butaka Eliakimi; Eliakimi butaka Azoli; 14 Azoli butaka Sadoki; Sadoki butaka Akimi; Akimi butaka Eluidi; 15 Eliudi butaka Elasali; Elasali butaka Matani; Matani butaka Yakobi; 16 Yakobi butaka Yosefi, bakala ya Maliya, na yayi butukaka Yesu, ke bokuduluaka Klisto. 17 Na yau, mbandu nionso kubanda na Abalahami tii na Davidi kele kumi na iya, kubanda na Davidi tii na ndatunu na Babeli kele kumi na iya ya mbandu, mpe kubanda na ndatunu na Babeli tii na Klisto kele kumi na iya ya mbandu. 18 Tala mutindu vuandilaka mbutukulu ya Yesu Klisto. Ntangu mama na yandi Malia zolanaka na Yosefi, yandi vuandaka na buemba katukaka na mpeve ya Nlongo, tekila ba vuanda kisika mosi. 19 Bakala na yandi Yosefi vuandaka muntu ya mbote, samuna kufuisa yandi nsoni ve, Yosefi bakaka dibanza ya kubika yandi na kinsueki. 20 Na ntangu yandi vuandaka yindula kusala yau, tala mbasi ya Mfumu biminaka yandi na ndozi, me tuba: Yosefi, muana ya Davidi, kumona wonga ve ya kubaka Malia, nkento na nge, samu muana kele na kivumu na yandi me katuka na Mpeve ya Nlongo; 21 yandi ke buta muana mosi, mpe nge ke pesa yandi nkumbu ya Yesu; yandi ke vulusa nkangu na masumu na yandi. 22 Nionso yina kuizaka samuna ku kukisa yina Mfumu tubaka na inua ya mbikudi: 23 Tala, ndumba ke vuanda na kivumu, yandi ke buta muana, mpe ba ke pesa yandi nkumbu ya Emanueli, ya zola tuba Tata Nzambi kele na beto. 24 Ntangu Yosefi lamukaka, yandi salaka yina mbasi ya Mfumu tuminaka yandi, mpe yandi bakaka nkento na yandi. 25 Kansi Yosefi zabaka nzutu na yandi vi tii yandi butaka muana ba pesaka nkumbu ya Yesu.