¹ Na ntangu yina, minlongoki finamaka na Yesu, mpe ba tubaka: Nani me luta mbuta na kimfumu ya mazulu e? ² Yesu bokilaka fi muana, yandi tulaka yandi na kati kati na bau, ³ mpe me tuba: Ya kedika me tubila bano, Kana beno vilula ntima ve mpe kana beno kituka bonso bimbana mbana ve, beno ke kota ve na kimfumu ya mazulu. ⁴ Yau yina, konso muntu yina ke kikulula bonso muana yayi ke lutila mbuta na kimfumu ya mazulu. ⁵ Bosi konso muntu me yamba fimuana ya mutindu yayi na nkumbu na munu, yandi me tambula munu mosi. ⁶ Kansi, kana muntu me tesisa masakuba na mosi ya bana yayi kena kulekila munu kiminu, ya me luta mbote samuna yandi ba kanga yandi dibanga na nsingu, mpe ba loza yandi na yinsi ya yimbu. ⁷ Kiadi na bantu ya yinza samuna masakuba! Samu yau ikele mfunu ti masakuba vuanda; kansi kiadi na muntu ke tukisa masakuba! ⁸ Kana diboko to dikulu na nge ikele ntesisi ya masakuba, zenga yau, mpe losa yau ntama na ge; yau ikele mbote samuna nge kukota na moyo ya bamvula na mvula ya kuvanguka to ya kuzengua diboko to dikulu, kansi na makulu to na maboko nionso zole bosi nge losua na tiya ya bamvula na mvula. ⁹ Mpe kana disu na nge ikele samuna nge ntesisi ya masakuba, dokuna yau mpe losa yau ntama na nge; yau ikele mbote samuna nge kukota na moyo ya bamvula na bamvula, kansi na meso zole bosi ba losa nge na tiya na bamvula na mvula. ¹⁰ Beno keba na kuvueza mosi ya bana yayi; samu me zabisa beno ti ba mbasi na mazulu kena kumona ntangu nionso ilungi ya Tata na munu yina ikele na mazulu. ¹¹ Samu Muana ya muntu kuizaka vulusa bayina zimbanaka. ¹² Inki beno kena kubanza e? Kana muntu mosi ikele na nkama mosi ya mameme, bosi mosi na yau me zimbana, yandi lenda bika ve makumi nana na yivuayina na mongo, samuna kusosa yina zimbanaka e? ¹³ Mpe kana yandi me mona yau, ya kedika me tubila beno, yandi ke vuanda na kiese kuluta makumi nana na yivua yina zimbanaka ve. ¹⁴ Mutindu mosi, yau ikele luzolo ya Tata na beno ve ikelel na mazulu ti ata mosi ya bana yayi zimbana. ¹⁵ Kana mpangi na nge sumukaka, kuenda baka yandi beno vuanda kaka beno zole. ¹⁶ Kana yandi me kuwa nge, nge me nunga mpangi na nge. Kansi, kana yandi kuwa nge ve, baka muntu mosi to zole, samu diambu nionso manisa na ntadisi ya bambangi zole to tatu. ¹⁷ Kana yandi zola kuwa bau ve, tuba yau na dibundu; mpe kana yandi zola ve kuwa dibundu, samuna nge yandi vuanda mupakanu to muntu ke futisaka mpaku. ¹⁸ Ya kedika me tubila beno, nionso beno ke kanga na ntoto, ke kangama na dizulu, mpe nionso bano ke zibula na ntoto ke zibuka na dizulu. ¹⁹ Me zabisa beno diaka ti, kana bantu zole me wizana na ntoto samuna kulomba konso kimz, ya ke pesamina bau yau na Tata na munu ikele na mazulu. ²⁰ Samu kisika bantu zole to tatu me kutakana na nkumbu na munu, munu ikele na kati na bau. ²¹ Na yau, finamaka penepene ya Yesu, mpe me tuba: Mfumu, mbala yikua mu lenda lemvukila mpangi na munu, na ntangu yandi me sumukisa munu e? Yau ke vuanda tii nkumbu nsambodia e? ²² Yesu me tubila yandi: Mu tubilange ve tii nkumbu nsambodia, kansi tii na nkumbu makumi nsambodia na nsambodia. ²³ Yau yina, kimfumu ya mazulu me fuanana na ntinu mosi zolaka pesa nsangu na bisadi na yandi. ²⁴ Ntangu yandi vuandaka tanga, ba natinaka yandi montu mosi fueti futa yandi mafunda kumi ya ba talanta. ²⁵ Lokola yandi vuandaka na kima ya kufuta ve, mfumu na yandi tuminaka ba teka yandi, na nkento na yandi na bana na yandi, mpe na bima nionso ikele na yandi, samu mfuka manisa. ²⁶ Kisadi me kilosa na ntoto, me fukama na ntuala na yandi, mpe me tuba: Mfumu, vuanda fioti na mvibudulu na munu, mpe mu ke futa nge nionso. ²⁷ Mfumu ya nanga fuilaka yandi nkenda, mfumu ya kisadi yina me bika yandi kuenda, mpe yambudilaka yandi mfuka. ²⁸ Na manima kubima, kisadi yina kutanaka na mosi ya kisadi yankaka ba ke salaka kintuadi fueti futa mfuka na yandi ya nkama mosi ya denali. Yandi builaka kisadi yina mpe kiniema yandi nsingu, na kutuba: Futa yina nge fuieti pesa munu. ²⁹ Nkundi na yandi ya kisalu me kilosa na ntoto, ya kufukama samuna kubombidila yandi, na kutuba: vibidila munu fioti, mu ke futa nge. ³⁰ Kansi muntu yina nkaka zolaka ve, mpe yandi kuedaka losa yandi na boloko, tii yandi futaka yina yandi fuanaka pesa. ³¹ Ntangu ba kundi na yandi bisadi monaka yina salamaka, ba vuandaka na kiadi ya ngolo, mpe ba kuendaka zabisa mfumu na bau nionso yina lutaka. ³² Bosi mfumu ya bisadi bokidisaka kisadi yina, mpe me tubila yandi: Nge ikele kisadi ya yimbi, mu pesa nge mfuka na nge ya mvimba, samu nge bombidilaka munu, ³³ nge ledaka vuanda na kinkenda na nkundi na nge kisadi ve mutindu mu moninaka nge kenda e? ³⁴ Mpe mfumu na yandi, fuemaka, me yekula yandi na minkuamisi, tii yandi futaka nionso yina yandi lendaka pesa. ³⁵ Tata na munu ya kizulu ke vangila benomutindu yina, kana mosi na mosi na beno ke lemvukila mpengi na yandi ve na ntima ya mvimba.