¹ Na manima ya bilumbu sambanu, Yesu bakaka Petelo, Yakobi, mpe na Yoane, mpangi na yandi, mpe ba nataka yandi pembeni na zulu ya mongo. ² Yandi kituluaka na ntuala na bau; ilungi na yandi kulezimi neti ntangu, mpe bilele na yandi kitukaka mpembe neti kiya. ³ Bosi, Mose na Eliya biminaka bau, samuna kusolola na yandi. ⁴ Petelo bakaka mpova, mpe tubaka na Yesu: Yau ikele mbote beto vuanda awa; kana nge me zola, mu ke tunga mafokula tatu awa, mosi samuna nge, mosi ya Mose, mpe mosi samuna Eliya. ⁵ Lokola yandi vuandaka tuba ntete, dituti ya kiya fukaka bau. Bosi tala, ndinga wakanaka na dituti na kutuba mambu yayi: Yandi yayi ikele Muana na munu ya luzolo, na yandi me tula nzolakani na munu ya mvimba: beno kuwa yandi! ⁶ Ntangu ba kuwaka ndinga yina, minlongoki kubuaka na ilungi na bau, mpe wonga bakaka bau. ⁷ Ntangu Yesu pusanaka, yandi simbaka bau, mpe me tuba: Beno telama, beno mona wanga ve! ⁸ Ba sendulaka meso, mpe ba monaka kaka Yesu yandi mosi. ^{9 10} Lokola yandi vuandaka kulumuka na mongo, Yesu pesaka bau nsikudukusu: beno tuba nsongolo yayi na muntu ve, tii Muana ya muntu ke fulukusua na bafua. Minlongoki yuvulaka yandi: Na yau, samuna inki minsoniki tubaka ti Eliya fueti tekila kukuiza ntete ? ¹¹ Yandi vutulaka: Ya kedika ti Eliya fueti kuiza,; mpe kutula bima nionso. ¹² Kansi me tubila beno ti Eliya me kuizaka, ba zabaka yandi ve, mpe ba salaka yandi mutindu ba zolaka. Mutindu mosi Muana ya muntu ke mona mpasi samuna bau. ¹³ Minlongoki kuizaka bakusa ti yandi vuandaka tubila bau yina me tadila Yoane mbotiki. ¹⁴ Ntangu ba kumaka penepene ya nkangu, muntu mosi kuizaka kiloza na kufukama na ntuala ya yandi, mpe me tuba: ¹⁵ Mfumu fuila muana ya munu kiadi, samu kana ngonda me bima yandi ke monaka mpasi mingi; ntangu mingi yandi ke kubuaka na tiya, mpe na maza. ¹⁶ Mu nataka yandi na minlongoki ya nge, kansi ba kokaka kubelusa yandi ve. ¹⁷ Yesu vutulaka, dikanda yayi ke tulaka kiminu na Tata Nzambi ve mpe ya zaba mbote na yimbi ve, ntangu yikua mu ke vuanda na beno? Ntangu yikua mu ke kanga ntu=ima samuna beno e? Beno natina munu yandi awa. ¹⁸ Yesu tubaka na lulendo nionso na mpeve ya yimbi, mpe ya bimaka na nzutu ya muana, mpe muana belukaka na ntangu yina kaka. ¹⁹ Na yau minlongoki finamaka na Yesu, mpe ba tubaka na yandi na kuvengama: Samuna inki beto lendaka ve kukuka mpeve yayi ya yimbi e? ²⁰ Yesu tubilaka bau, samuna kukanga ba ntima na beno, ya kedika me tubila beno, kana beno ikele na kiminu bonso mbuma ya mutade, beno ke tuba na mongo yayi: Nanguka awa, mpe yau ke lenda kunanguka; kima mosi ve ke kondua kusalama. ²¹ Kandi mutindu ya mpeve ya yimbi yayi ke bimaka kaka na lusambulu na kumina nsoki. ²² Na ntangu ba vuandaka zietila na Ngalili, Yesu tubilaka bau: Muana ya muntu ke yekulua na maboko ya bantu; ²³ ba ke vondisa yandi, mpe na kilumbu ya tatu yandi ke futumuka. Kiadi ya ngolo bakaka bau. ²⁴ Ntangu ba kumaka na Kapenaumi, ba yina vuandaka baka bampaku nionso zole ya kinlongo sololaka na Petelo, mpe ba tubilaka yandi: Ya kedika ti longi na beno ke futaka ve bampaku nionso zole ya kinlongo ? ²⁵ Yandi me tuba, Ingeta. Mpe ntangu yandi kotaka na yinzo, Yesu kebisaka yandi, mpe me tuba: Simoni, inki nge kena kubanza? ba ntinu ya ntoto, ke bakaka ba mpaku ya bima to ya yinsi ke vuandaka ya nani e? Ya bana na bau to ya ba nzenza e? ²⁶ Simoni me tubila yandi: Na ba nzenza. Mpe Yesu vutudilaka yandi: Na yau, bana ikele ya kuvambulua na mambu yina. ²⁷ Kansi, samuna kutesisa bau sakuba ve, kuenda yimbu, loza ndobo, mpe benda mbizi ya ntete ke kuiza, zibula yinua na yandi, bosi nge ke mona mbongo mosi ya kisangua. Baka yau, pesa bau yau, samuna munu mpe samuna nge.