¹ Ba falisi na ba saduki kuendaka mona Yesu mpe samuna ku tonta yandi, ba lombaka, yandi sadila bau kimangu yina me katuka na dizulu. ² Yesu vutudilaka bau: Na nkokila beno kena kutuba: Kilumbu ya mbote, samu dizulu ikele mbuaki; ³ bosi na nsuka: Kitembo ya ngolo ke vuanda bubu yayi, samu dizulu ikele ya kulomba. Beno me zaba ku suasisa dizulu ya mvula na nsuke mpe kitembo na nkokila, mpe beno lenda suasisa bidimbu ya ntngu. ⁴ Mbandu yayi ya mbalu mpe kinsuza kene kulomba dkidimbu; kidimbu yankaka ya kupesa yandi ikele ve kaka ya Yona. Bosi yandi bikaka bau, mpe yandi kuendaka. ⁵ Na ntangu ba lutaka na ndambu yankaka, minlongoki zimbakanaka kubaka mampa. ⁶ Yesu me tubila bau: Beno keba na kifunusu ya falisi na ba saduki. ⁷ Na ntangu yina minlongoki vuandaka yindula, mpe ba tubaka: Samu beto bakaka mampa ve. ⁸ Ntangu Yesu kuizaka zaba yau, me tuba: Samuna inki, beno bantu ya kiminu ya fioti kena kuyindula beno mosi ti beno bakaka mampa ve? ⁹ Beno ikele kaka bantu ya kukondua ngangu, mpe beno kena kubambuka diaka moyo ve na mampa tanu yayi kudiaka mafunda tanu ya bantu, mpe bitunga ikua beno natataka ya bitini, ¹⁰ mpe ata mampa nsambodia ya mafunda ya bantu, mpe bitunga ikua beno nataka e? ¹¹ Inki mutindu beno kena kubakusa ve ti mu kena kutubila beno samuna yina me tadila mampa ve ? Beno keba samuna kifunusu ya ba flisi na ya ba saduki. ¹² Bosi ba kuizaka bakusa ti ya vuandaka kifunusu ya dimpa ve yandi tubilaka beto keba, kansi na malongi ya ba falisi na ba saduki. ¹³ Ntangu Yesu kumaka na kizunga ya Kaisalia ya Filipo, yandi yuvulaka minlongoki na yandi: Bantu kena kutuba inki samuna munu, Muana ya muntu e? ¹⁴ Ba vutulaka: Ba yayi kena kutuba nge ikele Yoane mbotiki; bayankaka, Eliya; bayankaka, Yelemiya, to mosi ya ba mbikudi. ¹⁵ Mpe yandi yuvulaka bau, bosi beno, inki beno kena kutuba yina mu ikele? ¹⁶ Simoni Petelo me vutulaka: Nge ikele Klisto, Muana ya Tata Nzambi amoyo. ¹⁷ Yesu bakaka mpove, mpe yandi tubaka: Myangi ikele na nge Simoni, muana ya Yona; ya ikele menga na nsuni ve me songa nge yau, kansi Tata na munu ikele na mazulu. ¹⁸ Mpe munu, me zabisa nge ti nge ikele Petelo, mpe na zulu ya dibanga yina mu ke tungila dibundu na munu, mpe bielo ye insi ya bafua lenda kubuisa yau ve. ¹⁹ Mu ke pesa nge ba nsabi ya kimfumu ya mazulu: yina nge ke kanga na ntoto ke kangama na mazulu, mpe yina nge ke zibula na ntoto ke zibuka na mazulu. ²⁰ Bosi yandi tuminaka minlongoki ya yandi ba tuba na muntu ve ti yandi ikele Klisto. ²¹ Ku banda ntama Yesu vuandaka tubila minlongoki na yandi ti yandi fuana kuenda na Yelusalemi, kuna ba kuluntu ke monisa yandi mpasi mingi, ba ngudi anganga mpe ba minsoniki, yandi vondisaka, mpe yandi fulukisaka na kilumbu ya nsuka. ²² Lokola Petelo tuluaka pembeni, yandi bandaka kubaka yandi, mpeme tuba: Nzitusu na Tata Nzambi, Mfumu! mambu yina ke kumina nge ve. ²³ Kansi na ntangu Yesu balukaka, me tuba na Petelo: Katukila munu, Satana! Nge kena kutesa munu sakuba; samu mabanza na nge ikele ya Tata Nzambi ve, kansi ya ikele ya bantu. ²⁴ Na yau, Yesu tubaka na minlongoki na yandi: Kana muntu me zola kukuiza na manima na munu, yandi kukimanga yandi mosi, yandi nata dikulunsi na yandi mpe yandi landa munu. ²⁵ Samu, yina lendaka vuluza moyo na yandi ke zimbisa yau, kansi yina ke zimbisa yau samuna munu, ke mona yau. ²⁶ Bosi inki ndandu ikele na muntu yandi nunga bantu nionso, kana yandi me zimbisa muela na yandi e? to, inki muntu lendaka pesa na kisika ya muela na yandi e? ²⁷ Samu Muana ya muntu fuana kuiza na nkembo ya Tata na yandi, kintuadi na ba mbsi na yandi; bosi yandi ke pesa muntu na muntu na nsendo na yandi. ²⁸ Ya kedika ma zabisa beno: Ndambu ya ba yina ikele awa ke kufua ve, kana ba mona Muana ya muntu ve kukuiza na kimfumu ya yandi.