¹ Na yau, ba falisi na minsoniki kuizaka na Yesu na Yelusalemi, mpe batubaka: ² Samuna inki banlongoki na nge kena kuvueza ba nsiku ya ba nkuluntu e? Samu ba ke sukulaka maboko ve na ntangu ba ke kudiaka. ³ Yesu vutudilaka bau: Bosi beno, samuna inki beno ke zitisaka ba nsiku ya Tata Nzambi ve, samuna ndandu ya kinkulu na beno e? ⁴ Samu Tata Nzambi tubaka: Zitisa tata na mama na nge; mpe, muntu nionso ke singa tata to mama na yandi, ke baka kitumbu ya lufua. ⁵ Kansi beno, beno kena kutuba: Yina ke tuba na tata to mama na yandi: lusadusu yina mu zolaka pesa na nge ikele minkayilu na Tata Nzambi, ⁶ yau kele luzitu ya kupesa na tata to ya mama na yandi. Beno kena kukatula mambu ya Tata Nzambi samuna kuzitisa kinkulu na beno. ⁷ Bantu ya disu na insi ya dititi, Yesaya bikulaka samuna beno, na ntangu yandi tubaka: ⁸ Nkangu yayi kena kuzitisa munu na nsongi ya bikoba, kansi ntima na yandi ikele ntama na munu. ⁹ Na mpamba ba kena kusambila munu, na ntangu mu kene kulonga nsikudukusu yayi ikele nsiku ya bantu. ¹⁰ Ntangu yandi bokidisaka nkangu, me tubila yau: Beno kuwa, mpe beno bakusa. ¹¹ Yina ke kotaka na yinua ke sumunaka muntu ve; kansi mpova yina ke bimaka na yinua ke babisaka muntu. ¹² Yayu yina banlongoki na tandi finamaka, mpe tubilaka yandi: Nge me zaba ti ba falisi monaka yimbi na kuwa ba mpova na nge? ¹³ Yesu vutudilaka bau: yinti nionso yina Tata na munu kunaka ve, ba ke vuza yau. ¹⁴ Beno bika yau: Bau ikele ba mpofo kena ku tuadisa ba mpofo; kana mpofo kena ku nata mpofo, b au zole ke kubua na dibulu. ¹⁵ Petelo bakaka mpove, me tubila yandio: sasila beto mambu yayi. ¹⁶ Mpe Yesu me tuba: Beno mpe, beno ikele na ngangu ve? ¹⁷ Beno kena ku bakusa ve ti nionso yina ke kotaka na yinua ke kuendakaa na kivumu, bosi ya me losua na kisika ya kusuama e? ¹⁸ Kansi yina ke bimaka na yinua ke katukaka na ntima, mpe yau ke sumunaka ^muntu. ¹⁹ Samu mabanza ya yimbi ke katukaka na ntima, kufua bantu, kinsuza, nsumukunu, moyibi, kimbangi ya luvunu, mvuezolo. ²⁰ Tala bima ke sumukisaka muntu; Kansi kudia kondua kusukula maboko, ke sumukisaka muntu ve. ²¹ Ntangu Yesu katukaka vana, yandi kuendaka na kizunga ya Tilo na Sidoni. ²² Mpe tala, nkento mosi ya Kana katukaka na ndambu yina, kuendaka na Yesu mpe yandi bokaka: Mfumu, Muana ya Davidi, fuila munu nkenda! Muana na munu ya nkento kena ku kuamusua na mpeve ya yimbi ya ngolo. ²³ Yesu vutulaka ata diambu mosi ve, mpe minlongoki na yandi finamaka, mpe bombidilaka yandi: Vutula yandi, samu yandi kena kuboka na manima na beto. ²⁴ Yandi vutulaka: Mu tindamaka kaka na mameme ya yinzo ya Isaeli yayi zimbanaka. ²⁵ Kansi yandi kuizaka fukamma na ntuala na yandi, na kutuba: Mfumu, sadisa munu! ²⁶ Yesu vutulaka: Yau ikele mbote ve na kubaka mampa ya bana, mpe kuloza yau na bimbua mbua. ²⁷ Yabdi me tuba, ingeta, Mfumu, kansi bimbua mbua ke kudiaka bifuesekele ke sotukaka na meza ya nlongi na bau. ²⁸ Bosi Yesu me tubila yandi: Nkento, kiminu na nge ikele ya nene; bika ya salama mutindu nge me zola. mpe, na ntangu yina kaka, muana na yandi belukaka. ²⁹ Yesu katukaka vana yandi vuandaka, kuendaka na penepene ya yimbu ya Ngalili. Ntangu yandi tombukaka na mongo, yandi vuandaka vana. ³⁰ Bosi nkangu ya nene kuizilaka yandi, ba nataka bantu ya kuvanguka, ba mpofo, ba baba, bantu ya makulu ya kufua, mpe na bambevo mingi yankaka. Ba tulaka bau na makulu na yandi, mpe yandi belusaka bau, ³¹ na mutindu ti nkangu vuandaka sepela na kumona ba baba kutuba, bantu ya makulu ya kufua belukaka, ba mvanguki tambulaka, ba mpofo monaka, mpe ba zitisaka Tata Nzambi ya Isaeli. ³² Ntangu Yesu bokilaka minlongoki na yandi, me tuba: mu ikele na kingongo na ntima samuna nkangu yayi; samu, tala bilumbu tatu bau ikele na munu, mpe bau ikele na kima ya kudia ve. Mu zola ku yambula bau na nsatu ve, samu ba kondua ngolo ve na nzila. ³³ Minlongoki tubilaka yandi: Inki mutindu beto fueti sala na kisika yayi ya dikanga samuna kubaka madia ke yukutisa nkangu ya nene mutindu yayi e? ³⁴ Yesu yuvulaka bau: Mampa ikua keke na beno e? Ba vutlaka, nsambuadi, mpe bimbizimbizi. ³⁵ Bosi ba vuandisaka nkangu na ntoto, ³⁶ me baka mampa nsambodia na ba mbizi, bosi na manima kuvutula matondo,yandi bukunaka yau mpe yandi pesaka yau na minlongoki na yandi ba yayi kabulaka yau na nkangu. ³⁷ Bantu nionso kudiaka mpe ba yukutaka, mpe ba lokutaka bitunga nsambodia ya bitini bikanaka. ³⁸ Ba yina ku diaka vuandaka mafunda iya ya ba bakala, ba kento na bana tanguaka ve. ³⁹ Na kulanda, yandi vutulaka nkangu, yandi kotaka na nlungu, mpe yandi kuendaka na kizunga ya Mangadani.