¹ Ya kele samuna kimpuanza Klisto kulaka beto. Beno telama na kekete, mpe beno kukitula diaka na insi ya bizitu ya kinanga ve. ² Tala, munu Paulu, me zabisa beno, kana beno me ndima kukizanga, Klisto ke vuanda mfunu na beno ve. ³ Mpe na mbala yayi diaka mu kene ku tuba ve, na muntu ke zengua, yandi fueti sadila nsiku ya mvimba. ⁴ Beno nionso ke sosaka lunungu na nsiku, beno kele ya kuvambana na Klisto, beno kele na nganda ya nlemvo. ⁵ Samuna beto, na Mpeve beto kevingilaka kiminu na kivuvu ya lunungu. ⁶ Samu, na Yesu Klisto nzengolo to nzengolo ve kele mfunu, kansi kiminu ke salaka na luzolo. ⁷ Beno tomaka zawula mbote: nani dingimisaka beno, samuna kukakidila beno na kutumama na kedika e? ⁸ Ku bondila yina me katuka na yandi ve kena kubokila beno. ⁹ Filufunusu ya fioti kena kuvimbisa nteke nionso. ¹⁰ Na kati na Mfumu, mu kena kutula kivuvu na beno, ti beno ke yindula mutindu yankaka ve. Kansi yina kena kutula beno keti keti, ke fundusua. ¹¹ Ba mpangi, samuna munu, kana mu kena kulonga diaka nzengolo, samuna inki mu kena kuzomua e? Nteso ya masakuba me zimbala! ¹² Ba yina kena kutula beno keti keti, ba lenda kuandi vambusua! ¹³ Ba mpangi, ba bokilaka beno samuna kimpuanza, kansi beno kitula kimpuanza yina luve ya kuzinga na nsuni ve; kansi beno salasana na zola, bisielo bayayi na bayina. ¹⁴ Samu nsiku nionso me lungana na diambu mosi kaka, na yayi: Nge ke zola mpangi na nge bonso nge mosi. ¹⁵ Kansi kana beno me tatasana mpe disasana, beno kiluengisa samu beno lenda manasana. ¹⁶ Me zabisa beno: beno diata na Mpeve, mpe beno ke lungisa nzinunu ya nsuni ve. ¹⁷ Samu nsuni kele na nzinunu ya kitantu na yina ya Mpeve, mpe Mpeve kele na yina kele kitantu na yina ya nsuni; bau kele disuasuani bau na bau, samu beno sala ve yina beno mosi me zola. ¹⁸ Kana Mpeve kena kutuadisa beno, beno kele na insi ya nsiku ve. ¹⁹ Nzoka, mavanga ya nsuni ke monanaka, yau yayi: ku yanga, kinsuza, nsumukunu, nzinunu ya imbi, ²⁰ nsambudulu ya biteki, minkisi, kitantu, minzonza, kimpala, nganzi, mpaka, mpambanu, ba nsambudulu yankaka, ²¹ yandu ya meso, kinduvu, kindiafu, mpe bima me fuanana na yau. Mu tekaka tubila beno, lokola mu zabisaka beno yau, ti ba yina ke salaka ba mambu ya mutindu yina ke baka difua ya kimfumu ya Tata Nzambi ve. ²² Kansi mi mbutu ya Mpeve kele: zola, kiese, yenge, mvibudulu, mbote, nlembami, kinkuikizi, ²³ kimpombo, kiyala, ; nsiku kele kitantu ve na mambu yina. ²⁴ Ba yina kele na Yesu Klisto me masaka koma nsuni na dikulunsi kintuadi na nzinunu mpe na ba nsatu. ²⁵ Kana beto kele moyo na Mpeve, bika beto diata mpe na Mpeve. ²⁶ Beto sosa nkembo ya mpamba ve, na kukisosila mambu, na kuyandasana meso.